ISAYA 24 - Embimbiliya - Bíblia Sagrada em Umbundu

¹ Tala, Yehova o kundula oluali, kuenje o lu lingisa ekalasoko; o tingulula osi yaluo kuenje o sandola olonungi vialuo.

² Kuenje ndeci ci lingiwa lomanu va sule haico ci lingiwa loci tunda; ndeci ci lingiwa lukuenje haico la cime caye; ndeci ci lingiwa lufeko haico la ndona yaye; ndeci ci lingiwa lukuakulanda haico lu o landisa; ndeci ci lingiwa lukuakulevalisa haico lu o levala; ndeci ci lingiwa lu o tambola osindike haico lu eca osindike.

³ Oluali lu kunduiwa, cosi ci kasimo ci pundiwa, momo Yehova wa lu tetuluila londaka eyi.

⁴ Ongongo yi liyula kuenda yuwuka; oluali lu totomẽla, kuenda luwuka; ilu li totomẽla kumue longongo.

⁵ Ongongo ya vihisua lolonungi viayo, omo via lueya ovihandeleko viaco, via sama oviholo viaco, kuenje via nyõla ocisila ka ci pui.

⁶ Oco esiñalo lia lia oluali, kuenda ava va tungamo va pia; oco ava va tunga voluali va sekala, kuenje pa supa vañamiñami lika.

⁷ Ovinyu vi litetela kuenda uyuva vuvuka. Vosi va tuwa oku sanjuka va tula tula imuenyo.

⁸ Esanju lioloñoma li liweka, onjuela yava va yolela yi sulila, lesanju Ũotucẽke li imũha.

⁹ Ka va nyui vali ovinyu loku imba ocisu ngo. Ovinyua vi koluisa vi pongoloka oku lula kuava va vi nyua.

¹⁰ Imbo lia siwa lia nyõlẽha, olonjo viosi via yikiwa okuti lomue iñilamo.

¹¹ Volokololo mũ lĩ oku lisiõsiõla omo ka muli ovinyu; esanju liosi lia imũha, okunyamula kuosi kuovofeka kua sulila.

¹² Ovingululu lika via siala vimbo, ndaño olombundi vialio via nyolẽha pe.

¹³ Momo voluali kuenda pokati komanu, ci kala ndeci ci kala kala eci va tuñunya uti woliveira, pamue ceci va nyañolõla ayuva eci va mala oku kela ovinyu.

¹⁴ Va kaloka londaka, va imba oku sanjukila uwale wa Yehova. Vakuotakelo vo yolela.

¹⁵ Vakuotundilo vo sambiliya. Vakualofeka vi lisungue lokalunga va muisa ulamba onduko ya Yehova, Suku ya va Isareli.

¹⁶ Tunde kasulilo oluali tua yeva ovisungo viesivayo, viti, Ukuesunga wa muisua ulamba.— Ame puãi ndinga siti, Nda kopa, nda kopa. Ngongo yange we! Vakuakufũla loku nyana, va nyana, ocili va nyana ca lua.

¹⁷ Usumba, kuenda okueve, kuenda onjanjo viu ku lavekela, anungi yovoluali.

¹⁸ U o tila onjuela yusumba o fa vokueve, lu o tunda vokueve o fa vonjanjo. Momo olonjanẽla viokilu via yuluka, kuenje ociseveto congongo ca lisenga.

¹⁹ Ongongo ya toka, ongongo ya towiwa pokati, ongongo ya tuñunyiwa.

²⁰ Ongongo yi yengenga ndoholua, kuenda yi hunga ndowanda; okulueya kuayo ku yi lema, yi kupuka kuenje ka yi votoka vali.

²¹ Keteke liaco Yehova kilu o yambula avanda vokilu, kuenda kilu lieve o yambula olosoma violuali.

²² Vi ongoluiwila pamosi ndolomandekua vocitunyu. Vi yikiwa vokayike kuenje kovaso yoloneke via lua vi yambuiwa.

²³ Oco osãi yi munihĩsua kuenda ekumbi li kutisiwa osõi; momo Yehova Ukualohoka o viala komunda ya Siono. Kuenje vo Yerusalãi lokovaso yakulu vaye o molẽhĩsa ulamba waye.