ISAYA 23 - Embimbiliya - Bíblia Sagrada em Umbundu

¹ Ocitumasuku ca tumiwĩla Turo. Alonaviyu via Tarsisi, liyuli, momo Turo ya nyolẽha. Ka ku li vali onjo ndaño ocipundo. Poku pitila kofeka ya Kupro oco va va ci sapuila.

² Ene wa tungi konẽle yokalunga, uhĩ. A vakuakufũla va Sidono, olonumiwa viene via pita pita votukalunga

³ Onganyu yene ya tunda kotiliku yonguiwa vo Nilu. Ene wa fũli fũli lolofeka.

⁴ A Sidono, ucikolo cokalunga, osõi yi ku kute omo okalunga ka popia, kati, Sia la kala lolongembia vioku cita, ndaño oku cita. Sia la pindisa akuenje, ndaño oku tekula afeko.

⁵ Eci ondaka yi yevala ve Egito va sumua enene oku yeva ndomo ca pita la Turo.

⁶ Ene wa tungi konele yokalunga, liyuli, tilili ko Tarsisi.

⁷ Eli olio imbo liene lionjolela lia vetiwa kosiahũlu? Eli olio imbo olomãi vialio via li tuala ha li tungi ocipãla?

⁸ Eci, wa ci pangela Turo helie? Eye wa kaile ongavi yakolowa, vakuakufũla vaye olosoma, vakuakupilisa vaye ovo va kemãlẽle ca velapo voluali.

⁹ Yehova Ukualohoka eye wa ci panga, ha lavisa okulipanda kulamba wosi, loku sepuisa vosi va kemãla voluali.

¹⁰ Amõla a Tarsisi ukãi, pita vofeka yove loku supoka ndeci Nilu a supoka, momo ka pali vali eci ci tateka.

¹¹ Eye woluĩla eka liaye kilu liokalunga, wa lulumisa olofeka; Yehova wa tuma oku nyõla olombonge via Kanana.

¹² Kuenje hati, Ofeko, amõla a Sidono wa sumua. Ku yolela vali. Katuka, yokila ko Kupro, puãi ndaño oko, ku sangi epuyuko.

¹³ Tala ofeka ya va Kaldea! ovo muẽle omanu vaco, va Asuria havoko. Ovo va eca Turo kovinyama viovusenge; va tunga alavelo avo, kuenje va nyõla olonjo violosoma vialio, va li lingisa elunda.

¹⁴ Alonaviyu via Tarsisi, liyuli, momo ombonge yene ya nyõlẽha.

¹⁵ Kuenje keteke liaco Turo yivaliwa akũi epanduvali kanyamo ndoloneke viosoma yimuamue. Kesulilo liakui epanduvali kanyamo cipita la Turo ndocisungo cocipuepue:

¹⁶ Acipuepue ca ivaliwa, nyañula okacẽke, ka ñuale imbo. Ka sike ciwa, ka imbe ovisungo via lua oco wivalukiwe.

¹⁷ Oco, kesulilo liakui epanduvali kanyamo, Yehova ivaluka Turo kuenje Turo o fetika vali oku limuisa, o kala ndocipuepue kolofeka viosi vi kasi kilu lieve.

¹⁸ Kuenje onganyu yaye yi tunda koku fũla, leyi yi tunda kupuepue, viosi vi tumbikiwa ku Yehova, ka vi kongeliwa ndaño oku selekiwa. Puãi kokufũla kuaye ku tunda okulia ku tẽla oku tekula ava va fendela Yehova, ku tundavo uwalo wavo wa fina.