ISAYA 22 - Embimbiliya - Bíblia Sagrada em Umbundu

¹ Ocitumasuku ca tumiwĩla omaka yocinjoinjoi. Ci kasi ndati okuti vosi wa londim kovailu olonjo?

² Ene we yuki onjuela. Imbo liene imbo lieyuala lonjolela. Vene va ipaiwa ka va ipawaile losipata, ndaño oku fa ka va filile vocilungunga.

³ Olombiali viene viosi via tilila kumuamue, via kuatiwa ño, ohonji lakamue. Omanu vene vosi va sangiwa va kuatiwa, ndaño va tilila ale kupãla.

⁴ Oco nda pinga siti, Nunde oco ndile ca lua. Ku ka likavise ño oku ndembelekela okunyolẽha kuomõla ukãi omanu vange.

⁵ Momo Yehova Suku yolohoka o kuete eteke lieyuala vomaka yocinjoinjoi, hailio eteke lioku kosiwa loku tatamisua. Ovimbaka vi teyiwa kuenje va vilikiya kolomunda.

⁶ Elami wa ambata ohombe yovisongo, kuenda akãlu ovita la vakuakuendela kotuvalu. Kiri wa sikulũla otevele.

⁷ Olomaka viove via velapo vie yuka akãlu ovita, kuenje vakuakuendela kotuvalu va liongaikaila kolombundi.

⁸ Levi Yuda a limãlẽhĩsa lavio via situluiwa. Keteke liaco wa imbila ovaso ovimãlẽho vio vonjo yolongunji,

⁹ kuenje wa mõla apangu imbo lia Daviti okuti a lua, wa kongeli ovava ocisimo cokombuelo;

¹⁰ wa tendi olonjo via Ye Yerusalãi, kuenda wa tungululi olonjo ho kolisa ocimbaka.

¹¹ Pokati kovimbaka vivali wa tungipo ocisimo covava ocisimo cale. Puãi ka wa sokoluili tungi waco ndaño oku sumbila u wa ci sokiya.

¹² Keteke liaco Suku Yehova Ukualohoka wo laleki oku lila loku litetela kuenda oku lipemũla, loku wala ikelẽi.

¹³ Puãi tali, onjolela kuenda esanju vievi! Olongombe vi topuiwa lolomeme vi ipaiwa, lositu yi liwa lovinyu vi nyuiwa, vati, Tu li, tu nyui, momo hẽla tu fa.

¹⁴ Yehova Ukualohoka wa lisituluila kokuange, hati, Ocili, ekandu eli ka liu wecelui toke vu fa. Oco ca popia Ñala Yehova Ukualohoka.

¹⁵ Ca popia Yehova Ukualohoka ceci, hati, Kuende ku kalei kaco, haeye Sevena, u o lava onjo. Popia laye huti,

¹⁶ Nye o linga kulo? O kasi lelie kulo okuti wa lisokotuila eyambo vewe? Wa lisokotuila eyambo kilu, haive wa lisokotuila onjo vewe.

¹⁷ Amunu wa pama, tala! Yehova o ku imba longusu ha ku inasi. O ku kuata longusu.

¹⁸ O ku iña, ha ku imbi ndombunje vofeka yinene, oko o ka fila, haiko ku kala akãlu ulamba wove, ove, asõi yonjo ya cime cove.

¹⁹ Hu tundisa kukalei wove, kuenje wupiwa komangu yove.

²⁰ Eteke liaco ñovonga ukuenje wange Eliakimi, omõla a Hilikiya.

²¹ Ndu walisa onanga yove, loku u witika uvia wove. Uviali wove ndu kapa peka liaye, kuenje eye o linga ndaisia yolonungi via Yerusalãi haeye isia yonjo ya Yuda.

²² Ñapa pocitãi caye osapi yonjo ya Daviti. Eye o yulula, kuenje lomue o yika; eye o yika kuenje lomue o yulula.

²³ Ndu kolisa ndombambo vocinendele kuenje o linga ndocalo culamba vonjo yaisiaye.

²⁴ Va kapa kokuaye ocikele cosi conjo yaisiaye, cokuti omãla vaco la vangandi aco vosi kumue lovikuata viosi, tunde koloneka vi sule toke kasanga a velapo.

²⁵ Yeho va Ukualohoka wa popia hati, Keteke liaco ombambo ya kolisua vocinendele yi fuomohamo, yi tukũiwamo kuenje yi loka. Ocitele va patekeleko ci kupuka. Momo Yehova wa popia.