ISAYA 21 - Embimbiliya - Bíblia Sagrada em Umbundu

¹ Ocitumasuku ca tumiwĩla ekalasoko liokokalunga. Ndeci ko Sul ovipepe vi pita loku komba, vi tunda vekalasoko vofeka yi linga usumba, haico ocitumasuku ci yokokisa ci sapuiwa kokuange.

² Ukuakupunda o punda. Ukuakunyola o nyola. A Elami, lamanelãko; a Mẽdia, ñuala ocingonja. Nda sulisa okuleñaleña kuosi eye a koka.

³ Oco oviongo viange via lisipata, olongembia via ñuata ndolongembia viukãi o cita. Nda liketika okuti si yevi; nda suvala okuti si lete.

⁴ Utima wange wa tokotelua, ocilulumu ca njula. Okaluvumbulu nda livelele ka mongolokelamo ha ka lingi ocilulumu.

⁵ Va yala omesa, va kapa olotapete, va lia, va nyua. Votoki alombuale, waveki otevele.

⁶ Momo eci Yehova a popia lame ceci, hati, Kuende, ka kape ondavululi; eye a sapule eci a mõla.

⁷ Eci a mõla vakuakuendela kotuvalu va enda vavali vavali, pamue vakuakuendela kovimbulu kuenda vakuakuendela kolongamelo, oco a yevelele lepandi kuenda lutate wa lua.

⁸ Oco u wa kala loku lavulula wa popia hati, A Ñala, utanya wosi ñala ño-o kutala welavelo. Ovoteke osi ñasi kupange wange woku lavela.

⁹ Kuenje tala, kuiya vakuakuendela kotuvalu, va enda vavali vavali. Oco umue wa kumbulula, hati, Wa kupuka, Bavulono wa kupuka; oviñumañuma viaye viosi via nyanyohãila posi.

¹⁰ Amolange wa sasiwa, haive wa pekuiwa! Alomema viocisaselo cange; Eci nda yeva ku Yehova Ukualohoka, Suku ya Isareli, oco hu sapuila.

¹¹ Ocitumasuku ca tumiwĩla Duma. Ko Seire umue wa mbilikiya hati, Andavululi, uteke u tãi pi? Andavululi, uteke u tãi pi?

¹² Ndavululi hati, Omẽle yo yiya, luteke le. Nda vu yongola oku pula, puli ño; tiuki vali.

¹³ Acitumasuku ca tumiwĩla Arabia. Avando a va Dedani vu ka lala vovisitu via Arabia.

¹⁴ Alongunji viofeka ya va Tema, eci ovava kuava va kasi lenyona; eci okulia kuava va kasi loku tila.

¹⁵ Momo va tila olosipata. Va tila muẽle osipata ya somuiwa, kuenda ohonji ya nãlĩwa lohali yovita.

¹⁶ Momo eci Ñala a popia lame ceci, hati, Osimbu anyamo atatu ka a tẽlẽle okuti anyamo ondingupange, oco ulamba wosi wa Kedare wimũha;

¹⁷ kuenda ocisupe ca vakualohonji pokati kasualali vomãla va Kedare ci linga citito. Momo Yehova, Suku ya Isareli, wa popia.