ISAYA 20 - Embimbiliya - Bíblia Sagrada em Umbundu

¹ Kunyamo onguluvulu yinene yina ya tumiwa la Sarigono, Soma ya Asuria, yeya ka Asidode, ya yaka layo kuenje ya li kuata,—

² kotembo yaco oco Yehova a popele ale la Isaya omõla a Amose, hati, Ku ende, ka lule ocikẽlẽi covombunda yove lolohaku kolomãi viove. Kuenje wa ci linga, yu wa enda ño epõlõla lolomãi viaño,—

³ oco Yehova wa linga hati, Ndeci ukuenje wange Isaya a enda ño epõlõla lolomãi viaño anyamo atatu oku lingila Egito kuenda Etiopia ondimbukiso kuenda elungulo,

⁴ haico osoma ya Asuria ambata olohute vie Egito kuenda olohuate via Etiopia, amãlẽhe kuenda akongo. Va enda epõlõla lolomãi viaño, va enda ño ndoto hã ha ci kutisa Egito osõi.

⁵ Kuenje omanu va yokoka, loku sakalala mekonda lia Etiopia elavoko liavo kuenda Egito ulamba wavo.

⁶ Keteke liaco ava va lisungue lokalunga kaco va popia vati, Tala, eci oco ca pita lava va kaile elavoko lietu kuenje kokuavo tua tililile ha tu popeliwa kosoma ya Asuria. Kaliye etu hẽ tu puluka ndati?