ISAYA 2 - Embimbiliya - Bíblia Sagrada em Umbundu

¹ Ondaka ya Isaya, omõla a Amose, yina a mũila Yuda la Yerusalãi.

² Ci kala okuti koloneke viesulilo omunda yonjo ya Yehova yi velapo koku lepa pokati kolomunda viosi, yi pitahãla ovivulu; kuenje omanu volofeka viosi volumũhĩlako.

³ Olofeka via lua vi popia viti, Enjui, tu lamani komunda ya Yehova, konjo ya Suku ya Yakoba, okuti o tu longisa ovituwa viaye ha tu endaela volonjila viaye. Momo okulongisa ku tunda ko Siono kuenda ondaka ya Yehova yi tunda ko Yerusalãi.

⁴ Eye o tetuluila pokati kolofeka, haeye o tetela omanu va lua olonimbu. Va tẽla olosipata viavo ha vi lingi atemo olosaluwa, kuenda ovonga avo ha a lingi otutana. Olofeka ka vi likatukila vali losipata, ndaño ovita ka va vi lilongisa vali.

⁵ Anjo ya Yakoba, enjui, tu endeli vocinyi ca Yehova.

⁶ Momo wa pukula omanu vove, okuti onjo ya Yakoba, omo ve yuka vakuakutãha va tunda kutundilo, ve yukavo ovimbanda ndevi via va Filisiti, kuenje va likuata ovaka la vakualofeka.

⁷ Ofeka yavo ye yuka opalata kuenda ulu, ka ku li esulilo liukuasi wavo. Ofeka yavo ye yuka otuvalu, kuenje ka ku li esulilo liakãlu avo.

⁸ Ofeka yavo ye yuka oviteka; va fendaila upange wovaka avo muẽle, eci ca tunga imuĩne viavo muẽle.

⁹ Oco omunu o ketisua. Omanu va sepuisua. Ku ka va ecele.

¹⁰ Iñilã vohanda kuenje vunda voneketela oku tila esaluiso lia Yehova kuenda ulamba wunene waye.

¹¹ Okupekũlũla kuomanu ku tepuluiwa, lemande liomanu li ketisua. Yehova lika o kemãla keteke liaco.

¹² Momo kuiya eteke lia Yehova Ukualohoka kovina viosi vioku lisola kuenda emande, kuenje ovina viosi vi likapa kunene vi enda posi.

¹³ Eteke liaco liya kolocedro viosi via Levanone via lepa, haivio via katuka, lokovilemba viosi via Basiyane;

¹⁴ liya kolomunda viosi via lepa kuenda kovivulu viosi via katuka;

¹⁵ liya kolombonge viosi via lepa kuenda kocimbaka cosi ca pama,

¹⁶ liya kolonaviyu viosi vioko Tarsisi, kuenda kalavelo osi a posoka.

¹⁷ Kuenda okulisola kuomanu ku ketisua lemande liomanu li petamisua. Yehova lika o kemainyaiwa keteke liaco.

¹⁸ Oviteka vimũha.

¹⁹ Omanu va iñila valeva ovawe lovalungi oposi, oku tila esaluiso lia Yehova kuenda ulamba wunene waye, eci a katuka oku yokokisa oluali.

²⁰ Keteke liaco oviteka viopalata levi viulu va vi pangela oku fendela, va vi imba kolonete kuenda kolondilili,

²¹ ha va iñila valeva ovawe kuenda vovitelele viovawe a toka, oku tila esaluiso lia Yehova kuenda ulamba wunene waye eci a katuka oku yokokisa longusu.

²² Ku ka kolele vali omunu o fuimĩla vanyulu. O silivila nye?