ISAYA 19 - Embimbiliya - Bíblia Sagrada em Umbundu

¹ Ocitumasuku ca tumiwĩla Egito. Ota, Yehova o kasi loku endela velende liolupesi, kuenje iya ke Egito; oco oviteka vie Egito viu lulumĩla kuenda utima wa va Egito u yenguluka vokati kavo.

² Va Egito ndi va katuila va Egito ha va liyaki vosi, omunu lamanjaye, kuenda vosi, omunu lu a lisungue laye; imbo limbo, usoma lusoma.

³ Utima wa Egito u linga ociyayala vokati kayo. Ndi nyõla ahala avo. Kuenje va pula koviteka kuenda ku vanalunja, kuenda kovilũlũ, lo ku vakuakutãha.

⁴ Ngeca va Egito peka lia cime cungangala. Osoma ya tema yi va viala. Oco ca popia Yehova Ukualohoka.

⁵ Kuenje ovava a Nilu a takata, olui lu tepuluka loku kukuta.

⁶ Ololekua vialuo vi venga; lotundui tua Nilu lu kasi ve Egito tu tepuluka kuenje noke tu kotoka. Oloneva kuenda asisa owuka.

⁷ Owangu wosi u kasi kocingẽingẽi ca Nilu u kukuta. Cosi ca limiwa ocipepi loko Nilu cuwuka kuenje cambatiwa lofela. Ka cimi vali.

⁸ Anyanga olõsi va lila. Vosi va pipa pipa vo Nilu va lisiõsiõla, lava va imba awanda voviva va kuata epõi.

⁹ Ava va talavaya oku fuakũla alinyu va suvala enene, ndaño ava va tuta onanga yi yela.

¹⁰ Vosi va kasi ndasongui vofeka va nyanyoha, kuenje vosi va talavaya loku fetiwa va teka vutima.

¹¹ Olombuale via Coana via linga aveke a piãla, lolosekulu via Fareo via piãla kolondunge vi lungula lesanda. O popia ndati la Fareo huti, Ndimõla ombanga, haime ndimõla olosoma viosiahũlu?

¹² Olombanga vi kasi pi? Vi ku sapuile loku ku lomboluila eci Yehova Ukualohoka a simĩla Egito.

¹³ Olombuale via Coana via linga aveke, lolombuale via Memefisi via kembiwa. Ava va kasi ndovawe evindi apata a Egito ovo vo lueyisa.

¹⁴ Yehova wa kapa vokati kaye olondunge vionjile. Va yengengisa Egito kovilinga viaye viosi, ndeci oholua yi yengengela vosanjo yayo.

¹⁵ Ke Egito upange ka ku li, ndaño wowu wu lingiwa lutue pamue lucĩla pamue lolunavi pamue lolunelenge.

¹⁶ Eteke liaco va Egito va linga ndakãi. Va luluma lusumba omo Yehova a voluĩla eka.

¹⁷ Kuenje ofeka ya Yuda yi yokokisa va Egito. Nda onduko yaco yi tukuilua umue eye o yokoka. O yokokela eci ca va simila Yehova Ukualohoka.

¹⁸ Keteke liaco vofeka ye Egito mu kala ovaimbo atãlo a popia elimi lia Kanana, kuenje va lisinga la Yehova Ukualohoka. Pokati kovaimbo aco limue li tukuiwa Imboliekumbi.

¹⁹ Keteke liaco vokati kofeka ye Egito mu kala utala wa Yehova, kuenda kongave yayo ku kala ongunji ya Yehova.

²⁰ Vi linga ondimbukiso kuenda uvangi ku Yehova Ukualohoka vofeka ye Egito. Eci va vilikiya Yehova mekonda liava va talisa ohali eye o va tumisa upopeli, haeye o va yakela loku va popela.

²¹ Kuenje Yehova o lilimbukisa ku va Egito. Eteke liaco va Egito va kũlĩha Yehova, vo fendela lovilumba kuenda alembe, va likuminya ohuminyo la Yehova kuenje va ci linga.

²² Yehova o veta Egito, o yi veta kuenda o yi veluisa. Va tiukila ku Yehova, kuenje eye o yeva oku likutilila kuavo loku va veluisa.

²³ Keteke liaco ku kala elila li tunda ke Egito li enda ka Asuria. Va Asuria veya ke Egito, kuenda va Egito va enda ka Asuria. Kuenje va Egito va fendelela kumue la va Asuria.

²⁴ Keteke liaco Egito la Asuria la Isareli, katatu kavo, va sumũluĩsa oluali.

²⁵ Momo Yehova Ukualohoka wa va sumũlũisa hati, Va Egito va sumũlũha, haivo omanu vange, kuenda Asuria, haiyo upange wovaka ange, kuenda Isareli ocipiñalo cange.