ISAYA 18 - Embimbiliya - Bíblia Sagrada em Umbundu

¹ Afeka yoku vakula kuavava, yina yi kasi kesinya liolondui vioke Etiõpia;

² haiyo yi tuma olomunga vi endela vawato oloneva a pita volui Nilu. Ene alomunga violupesi, kuendi kofeka yava va lepa, haivo va sielena. Kuendi komanu va lingisa usumba, ci kale ocipepi, ci kale kupãla. Ofeka yavo ya pama haiyo yeyulo; osi yaco ya tepiwa lolondui.

³ Amanu voluali, ene wa tungi kilu lieve, Eci epandela likiwa kilu liolomunda, vanji. Eci olumbeta lu sika, yevi.

⁴ Momo Yehova wa popia lame hati, Ñala vocitumãlo cange. Ndavulula ndowuya wokutua kutanya pamue ndelende liombundu pokati kowuya woku ungula.

⁵ Momo osimbu ka vonguile handi, kuenje okutelẽha kua pita lolonẽlẽho via linga ayuva a pia oco a teta ovianja lolomĩla, kuenda ovianja via yanda vi tetiwa kuenje vi upiwako.

⁶ Viosi vi sialela olonjila viokolomunda lovinyama viovusenge. Kuenje olonjila viovinyõi vi kalako vondombo, lovinyama viovusenge vi kalako kokuenye.

⁷ Kotembo yaco ovilumba vi neniwa ku Yehova Ukualohoka, vi tunda kofeka yomanu va lepa, haivo va sielena, vi tunda komanu va lingisa usumba, ci kale ocipepi, ci kale kupãla. Ofeka yavo ya pama haiyo yeyulo, osi yaco ya tepiwa lolondui. Ocilumba caco va ci tuala komunda ya Siono, haiyo ocitumãlo conduko ya Yehova Ukualohoka.