ISAYA 17 - Embimbiliya - Bíblia Sagrada em Umbundu

¹ Ocitumasuku ca tumiwila Damasko. Tala, Damasko ka li lingi vali imbo, li lingaño ekundu.

² Ovikanjo vialio vi linga alunda; oviunda violomeme vi pekailamo kuenje lomue o vi lingisa usumba.

³ Ombonge yoke Efarimi yimũha, kuenda usoma woko Damasko. Kuenje ocisupe ca Asuria ci taka ndeci ulamba wa va Isareli. Oco ca popia Yehova Ukualohoka.

⁴ Keteke liaco ulamba wa Yakoba u tepuluka, kuenda okulẽla kuetimba liaye ku kopa.

⁵ Ci linga ndeci ukuakungula ongula olomema, o teta apunga lokuokuo kuaye; pamue ci linga ndeci umue ongolola apunga vomaka ya Refaimi.

⁶ Ku kala vimue via siwa, ndeci koku tuñunya oliveira, ku siala apako avali pamue atatu kolonavi viokilu; pamue kuti wepako ku siala apako akuãla pamue atãlo kolonavi viokilu. Oco ca popia Yehova Suku ya Isareli.

⁷ Keteke liaco omanu va imba ovaso ku Usovoli wavo, kuenje ovaso avo a sumbila U o kola wa Isareli.

⁸ Ka va imbi vali ovaso kovotala, upange wovaka avo, ha va sumbila eci ca tunga imuĩne viavo, ndaño olongunji vi kola, pamue ovotala insensu.

⁹ Keteke liaco ovaimbo avo olombonge a linga ndalunda a va Hivi la va Amori, ovaimbo ana a linga alunda momo va lupuisua la va Isareli. Ofeka yi linga ekalasoko.

¹⁰ Momo wa ivali Suku yeyovo liene, kuenje ka wa ivalukili Ewe liocikolo cene. Oco ndaño vu kũla ikũla viesanju loku tuikamo olomeko viosuku yimue hayeneko—

¹¹ ndaño eteke wa vi tuika hailio wa vi kulisa, pamue omẽle wa vi waya haiyo wa vi tẽlẽhisa— haimo elombolo li takata veteke liohali lolongembia via kãla.

¹² Yeveleli! onjuela yolofeka via lua, vi yuela ndoku yuela kuokalunga. Yeveleli! onjuvungo yolofeka via lua onjuvungo yavio ya soka lonjuvungo yovava a lua.

¹³ Olofeka vi linga onjuvungo ndonjuvungo yovava a lua, puãi eye o vi lemẽla kuenje vi tilila kupãla, vi punguiwa lofela ndovisaikiti viokolomunda, vi votuiwa ndoneketela yi votuiwa lofela yehunguhungu.

¹⁴ Tala! Koñolosi, ocinjoko ceci! Osimbu ka kua tile handi ka veko vali! Eyi oyo onima yava va tu punda, haiyo eyambulo liava va tu nyẽha.