ISAYA 16 - Embimbiliya - Bíblia Sagrada em Umbundu

¹ Ko Sela va tuma olomeme viulambu kombiali yofeka, okuti komunda yomõla a Siono ukãi. Via pita vekalasoko.

² Eci omãla va Moavi akãi va kasi kolonjiva via Arinone, va soka ndolonjila vi tuñayãla pamue ndotunjila tua tundisua vocanju.

³ Lungula. Tetulula olondaka lesunga. Vokati kutanya undembo wove u linge nduteke; vundisa ava va tundisiwa; ku ka pakule ava va tila.

⁴ Ava va inasiwa ko Moavi va sange ocitumãlo vokati kove. Linga ocikolo cava va tila unyõli. Eci ondiandia ya taka, lokunyõla kua imũha, kuenje vofeka olongangala via puamo,

⁵ oco ocalo ci valekiwa locisola ka ci pongoloka. Ci kala vombalaka ya Daviti, kuenje ku tumãla umue ukuacili. O litumbika oku tetulula lesunga. O tuwa oku teta olonimbu viesunga.

⁶ Tua yeva okulisola kua Moavi, okuti o lisole enene, ukueyengu, o lituna calua haeye ukuakutondala. Okulipanda kuaye kuesanda.

⁷ Oco Moavi a litetele ño. Vosi va litetelele Moavi. Liteteleli lutima wa teka akende ayuva a Kiriharesete.

⁸ Momo ovapia a Hesivone a linga ovipembe, ndaño uyuva wa Sivima. Olombiali violofeka via teya ovianja viawo via posoka, evi via pitilile ko Yasere, haivio via yandelele vekalasoko. Ovisapa viawo via yandelele kupãla toke kesinya liokalunga.

⁹ Oco ndi lililavo kumue la Yasere eci a lilila uyuva wa Sivima. A Hesivone, a Eleale, ndu tapela lasuelẽla ange, omo onjuela yocilunga ya yevala kapako ove, kuenda koku ungula kuove.

¹⁰ Kuenje esanju lonjolela vi upiwa vepia liove liocili. Voviumbo viayuva ka va imbilamo ovisungo, ka mu kala oku yuela lesanju, ka ku kala ukosi o kosela ovinyu vovitunyu viaco; nda imũla evilikiyo lioku kosa ovinyu.

¹¹ Oco utima wange u lisiõsuĩla Moavi ndohalupa; vonũlo yange mu lisiõsuĩla Kiriharesi.

¹² Oco ndaño Moavi enda konumbuko kuenje o likavisa lolohutililo, pamue iñila vocitumãlo caye ci kola oku likutilila, haimo ka cu kuatisa cimue.

¹³ Eyi oyo ondaka ya Moavi ya popia ale Yehova.

¹⁴ Cilo puãi Yehova wa popia hati, Osimbu anyamo atatu ka a puile, ndanyamo ondingupange, oco ulamba wa Moavi u sepuiwa ndaño owiñi waco wakahandangala; kuenje ava va supapo va kala vañamiñami, haivo ka va kala longusu.