ISAYA 15 - Embimbiliya - Bíblia Sagrada em Umbundu

¹ Ocitumasuku ca tumiwila Moavi. Omo Are lia kunduiwa uteke oco Moavi wa sakalala. Omo Kiri lia kunduiwa uteke oco Moavi wa sakalala.

² Omõla a Divoni ukãi wa lamana kolonumbuko oku ka lila. Moavi yi lilila Nevo kuenda Medeva. Ovitue viavo viosi vieya avangu, olonjele viavo viosi via pemuĩwa.

³ Valuwa avo va wala ikẽlẽi; kilu liolonjo viavo kuenda povila viavo vosi va kua kua loku lila ca lua.

⁴ Hesivoni li liyula kuenda Eleale; ondaka yavo yi yevala toke ko Yahasi; oco asualali va Moavi va liyula, utima waye u lulumĩla vokati.

⁵ Utima wange u sumuĩla Moavi; olombuale viaye vi tilila ko Zoar, kuenda ko Eglati-sielisiya. Momo va londa kovulu wa Luhiti loku lila. Vonjila yoko Horonayi va kaluka loku lilila enyolẽho.

⁶ Ovava oko Nimiri a kotoka, owangu wa kukuta, lonjovo ya kawuka. Ka ku li vali ikũla vi talala.

⁷ Oco ovaima avo a lua, leci va seleka va enda laco kesinya liolui luatamba.

⁸ Momo evilikiyo lia yevala kaluvumba a Moavi, okulila kuaco kua pitila ke Eglayi, okulila kuaco kua pitila ko Beer-elimi.

⁹ Momo ovava a Divoni e yuka osonde. Haimo mbokiyako kohali ya Divoni, numa olohosi kuava va tila ko Moavi ha va puluka.