ISAYA 14 - Embimbiliya - Bíblia Sagrada em Umbundu

¹ Yehova o lingila Yakoba ohenda, o nõla vali Isareli kuenje o va tungisa vofeka yavo muẽle. Vakualofeka veya kokuavo, va litumbika konjo ya Yakoba.

² Kuenje vakualofeka va enda lavo oku va nena kocitumãlo cavo, kuenje onjo ya Isareli yi va fukila vofeka ya Yehova ha va lingi akuenje lafeko vavo. Ava va va kuatele va linga olohuate viavo, kuenje va viala ava va va talisa ohali.

³ Eci Yehova a ku puyuisa kasakalalo ove lo kohali yove loku ku yovola kupange wove wa tĩla woku vumba,

⁴ oco o tela osoma ya Bavulono olusapo olu luolonukowaila huti, Haka! Ongangala ya liweka! Ondiandia ya tula!

⁵ Yehova wa teya ombueti yukuevĩho, haiyo epangati liolombiali;

⁶ oyo ya veta veta omanu lonyeño, kuenje ka ya liwekele oku veta, haiyo ya viala olofeka lonyeño, yu ya vi talisa ño-o ohali, kuenje lomue wo tateka.

⁷ Oluali luosi lua puyuka, kuenje lua talala; va imba ovisungo.

⁸ Ovinendele viu ku sanjukila, ndaño oviti violo-cedro via Levanone, viti, Tunde wa kupuiwila posi lomue utimbuli wa tu katukila.

⁹ Kosi Njembo wa yolela oku ñualẽhẽla love keteke lioku pitila kuove. Wa ku katuila ilũlũ ndaño viava va velelepo voluali, kuenje wa ku votuila kovialo viavo olosoma viosi violofeka.

¹⁰ Viosi vi votoka ha vi popi love viti, Love le wa lendavo ndetu? Wa lisoka hẽ letu?

¹¹ Ulamba wove wa kupuilua vonjembo, kuenda okusika kuotucẽke tuove. Ovanyo a linga ula wove, lasunjulu a linga onyime yove.

¹² A Tanda, amõla omẽle, wa kupuka ndati kilu? Wa timbuiwa ndati ove, haive wa kupula olofeka?

¹³ Wa popele vutima wove huti, Ndonda kilu, ñapa ocalo kilu liolombungululu via Suku, kuenje numãla komunda yekongelo, kupãla ko Norte;

¹⁴ ndonda kilu lialende, ndi lisoka la Cimãlõmata.

¹⁵ Puãi wa kupuilua vonjembo toke kosi yocitunyu.

¹⁶ Va ku mõla va ku tala, ha va ku sokoluila vati, Omunu u eye una wa lulumisa oluali, kuenda ovosoma osi?—

¹⁷ Eye una wa lingisa oluali ndekalasoko, kuenje wa nyõla ovaimbo aco?— Eye una ka ecele olomandekua viaye ha vi endi kovaimbo avo?

¹⁸ Olosoma viosi violofeka, vi pekela vulamba, osoma veyambo liaye, osoma veyambo liaye.

¹⁹ Ove puãi winasiwa ño ndocife caño, kupãla leyambo liove. O sikĩlĩliwa lava va tomiwa losipata haivo va lokila kovawe ovocitunyu, ndocivimbi ca kosiwa.

²⁰ Ku kendiwa kumue lolosekulu viove momo wa nyõla ofeka yove, wa ipa omanu vove. Ombuto yolondingaĩvi ka yi ka tukuiwe vali.

²¹ Angiliyi oku ponda omãla vaye mekonda liongole ya vaisiavo, sanga va katuka, ha va fuki vali oluali, loku yukisa kilu lieve ovaimbo.

²² Yehova Ukualohoka wa linga hati, Ndi va katukila. Nyimũla ko Bavulono onduko kuenda ocisupe, omõla kuenda onekulu. Oco ca popia Yehova.

²³ Ndi yi lingisa usenge wocisaka kuenda oviva viovava. Ndi yi komba lolueyo luoku nyõla. Oco ca popia Yehova Ukualohoka.

²⁴ Yehova Ukualohoka wa lisila hati, Ocili ndeci nda sima haico ci lingiwa, ndeci nda panga haico ci kala;

²⁵ okuti u Asuria vofeka yange ndu tepamo, ndu kosela lolomãi kolomunda viange. Okanga yaye yi va tunda kuenda ocitele caye ci tunda povitãi viavo.

²⁶ Eci oco ocipango ca pangiwila oluali luosi; eli olio eka lia nyanyumũilua olofeka viosi.

²⁷ Momo Yehova Ukualohoka wa ci panga kuenje o cimũla helie? Eka liaye lia nyanyumuĩwa, kuenje u o li tiulula helie?

²⁸ Ulima wa fa Soma Ahase oco kueya ocitumasuku eci:—

²⁹ Ene vosi, vu va Filisiti ko ka yoleli, omo ombueti yo veteli ya teka; momo kolumbombo luonyõha ku tundila ekuiva, kuenje epako lialio ondala.

³⁰ Kuenje uveli wosuke o lia, lolosuke vi pekela lombembua, puãi olumbombo luove ndu lu ipa lonjala. Njipãla ocisupe cove.

³¹ Liyula, a Mbundi; lila, a Imbo; Yenguluki lusumba, ene vosi vu va Filisiti. Momo ko Norte ku tunda owisi, kuenje vovilala viavo lomue o tundamo.

³² Omunu o kumbulula ndati olomunga viofeka? O kumbulula hati, Yehova wa sovola Siono, kuenje omanu vaye va tala ohali va tilailamo.