ISAYA 13 - Embimbiliya - Bíblia Sagrada em Umbundu

¹ Ocinjoinjoi ca mõla Isaya omõla a Amose. Wa ci muĩla Bavulono.

² Iki epandela komunda ya tonyõha, va vilikiyi. Va payuli okuti va iñilila volombundi violombuale.

³ Ame muẽle nda handeleka ava va litumbika kokuange; lasualali vange haivo va lipandela ulamba wange, ame muẽle nda vongolola ha va tẽlĩsa onyeño yange.

⁴ Yeveleli! Onjuela kolomunda, ya soka leyi yowiñi walua. Yeveleli! Onjuvungo yovoviali!— yolofeka via likongela. Yehova Ukualohoka o kasi loku kongela olohoka viocilunga.

⁵ Vi tunda kofeka yi kasi kupãla, ndaño kesulilo lilu, okuti Yehova lovimalẽho vionyeño yaye viyilila oku nyõla oluali luosi.

⁶ Liyuli, momo eteke lia Yehova li kasi ocipepi, liya ndoku nyõla kua Cimalomata.

⁷ Oco ovaka osi a leñela lovitima viomanu vosi vi yenguluka;

⁸ kuenje va yokoka! Va kuata olongembia kuenda olosongo; va kala lolongembia ndukãi o cita. Va livanja locisalu, ovipala viavo vi kusuka ndulienge wondalu.

⁹ Tala, eteke lia Yehova liya, li yuka ungangala lekangiso lonyeño ya sanya. Li pongolola ofeka okuti yi linga ekalasoko, kuenje li nyõla vakuakandu vaco.

¹⁰ Momo olombungululu viokilu lovisoko viavio ka vi eci ocinyi cavio. Ekumbi eci li tunda li fa, losãi ka yi eci owi wayo.

¹¹ Njambuila oluali ũvi waluo, kuenda vakuevĩho evĩho liavo. Nyimũla okulituna kuava va lisole. Nyimũla okulikapa kunene kuolongangala.

¹² Omunu ndu tĩlisa, okuti ulu wa fina u sule, ndaño ulu u yela wa Ofiri u sule, omunu wa velapo.

¹³ Oco ndulumisa ovailu, longongo yi lisenga, kuenje yi sondoluiwa pocitumãlo cayo lonyeño ya Yehova Ukualohoka, keteke liokutema kuaye kua tokota.

¹⁴ Kuenje omunu omunu enda ku vangandiaye. Va tilila, omunu kofeka yavo, omunu kofeka yavo. Omunu omunu o tila ndonusi ya lupuisua, pamue ndomeme ka yi kuete ungombo.

¹⁵ U wosi o sangiwa, o tomiwa; kuenje wosi o kuatiwa o kupuka losipata.

¹⁶ Otuñaña tuavo tu nyanyohaila kovaso avo, olonjo viavo vi pundiwa, kuenje akãi vavo va pekelisiwa.

¹⁷ Tala, ñasi loku va katuila va Mede, ovo ka va yonjiwa lopalata, kuenje ndaño ulu ka vo sanjukila.

¹⁸ Olohonji viavo vi kupula akuenje. Ka va kuete ohenda lepako limo; iso liavo ka li sipo omõla.

¹⁹ Kuenje Bavulono olio imbo lia piãla kulamba pokati kovoviali hailio eposo kuenda esanju lia va Kaldea, li linga nda Sodomo la Gomora eci Suku a a nyõla.

²⁰ Ka mu kala vali omanu, ka mu tungiwa vali kovitumbulukila viosi. Lomue u Arabia o tamuluĩlãko ombalaka yaye, lovangombo ka va pekelisako oviunda viavo;

²¹ te ovinyama viovusenge ovio vi pekelako. Volonjo viaco mu yuka olombulu, kuenda olombo vi kalako; lolohoka vio vekalasoko vi sombokalamo.

²² Olonguli vi lilila volombonge vialio, lolombulu vi lilila volonjo vialio via posoka. Otembo yalio yi kasi ocipepi, oloneke vialio ka via luile.