ISAYA 12 - Embimbiliya - Bíblia Sagrada em Umbundu

¹ Keteke liaco o linga hati, A Yehova, hu pandula inomo ndaño wa nemelẽle, haimo okutema kuove kua imũha kuenje wa ndembeleka.

² Tala, Suku eye eyovo liange. Ñolela kuenje si kuata usumba momo Suku Yehova eye ongusu yange, haeye ocisungo cange kuenje wa linga eyovo liange.

³ O tapa lesanju kolono vieyovo.

⁴ Kuenje keteke liaco o popia huti, Panduli Yehova, vilikiyi onduko yaye, sapuili olofeka ovilinga viaye. Sapuli okuti onduko yaye ya kemãla.

⁵ Imbili Yehova ovisungo viesivayo momo wa linga ovina vinene. Ci kũlĩhĩwe voluali luosi.

⁶ A va Siono, liyuli lolukandi, imbi lesanju, momo U o kola wa Isareli o kasi lunene pokati kene.