ISAYA 11 - Embimbiliya - Bíblia Sagrada em Umbundu

¹ Ocinjovelela ci tunda kocisingi ca Jese, kuenje ocanja ci tunda kolombombo viaco.

² Espiritu lia Yehova li kala laye, Espiritu liolondunge luloño, Espiritu lielungulo lunene, Espiritu liukũlĩhĩso lusumba wa Yehova.

³ Esanju liaye li kala koku sumbila Yehova; Ka tetulula ndeci ci lete ovaso aye, pamue oku teta onimbu ndeci ci yeva ovatũi aye,

⁴ puãi o tetuluila olosuke lesunga, kuenje o tetela omanu vaño voluali olonimbu via sunguluka. O veta oluali lohunya yomẽla waye, kuenje ipa vakuevĩho lofela yovomẽla waye.

⁵ Esunga li linga uvia wovohepu yaye, luyito u linga uvia wovombunda yaye.

⁶ Ombinji yi tunga pamuamue lomõla omeme, kuenda ongue yi lala lala lomõla ohombo; onãle leyove liohosi vi endela pamuamue, kuenje okamõla ka vi songuila.

⁷ Onjindi kuenda ursu vi lila kumuamue; omãla vavio va pekaila pamuamue, lohosi yi lia lia owangu ndongombe.

⁸ Ocisembe ci mangalela kututa wa sailili; lomõla wa sumũha imba okuokuo veleva liondala.

⁹ Ka va lingi cĩvi ndaño oku nyõla komunda yange yosi yi kola, momo kilu lieve ku yuka ukũlĩhĩso wa Yehova ndeci ovava e yuka vokalunga.

¹⁰ Eteke liaco olumbombo lua Jese lu linga ndepandela ku vakualofeka. Olofeka vi lipungikila kokuaye, kuenje ocitumãlo caye ci linga culamba.

¹¹ Keteke liaco Ñala imba vali eka liaye oku yovola ocisupe comanu vaye ava va supa ka Asuria lo ke Egito, kuenda ko Patirosi, lo ko Kusi, kuenda ke Elami, lo ko Sinare, kuenda ko Hamati, lo kovifuka viokalunga.

¹² Ikila olofeka epandela ha konguisa va Isareli va tundisilue, loku ongolola va Yuda va sandokalaile kolonẽle vikuãla violuali.

¹³ Okukuatela Efarimi esepa ku imũha lava va katukila Yuda va nyolẽha. Efarimi ka kuatela vali Yuda esepa, Yuda ka lingi vali cĩvi Efarimi.

¹⁴ Puãi va endela pamosi, va lupukila kutakelo koviwulu via va Filisiti kuenje va pundila pamosi omanu vokutundilo. Va ka kuata Edome la Moavi kuenda va Amoni va va pokola.

¹⁵ Kuenje Yehova o nyõla olumue elimi lio kalunga ke Egito. Eka liaye o li oluila Olui o lu veta lofela yaye yi tokota ha lu lingi olondui epanduvali, oco o yowisilako omanu va wala olohaku.

¹⁶ Kuenje ku kala elila li tunda ka Asuria, omu mu pita ocisupe comanu vaye, ndeci va Isareli va sanga elila eteke va tunda vofeka ye Egito.