ISAYA 10 - Embimbiliya - Bíblia Sagrada em Umbundu

¹ Ava va handeleka ovihandeleko haviesungako, ngongo yavo! Lasonẽhi va sonẽha evi viakãngiso,

² okuti va tateka olohũkũi oku tetuluiwa lesunga, kuenje va limĩla olosuke viomanu vange esunga, okuti ovimbumba vi linga ocikumba cavo, lolosiwe vi linga ohute yavo—lavovo, ngongo yavo!

³ Vu linga ndati veteke lieyambulo kuenda vekungukungu li tunda ocipãla? Kulie vu tilila ho kuatisa? Kuenje ku pi vu sia ukuasi wene?

⁴ Lacimue ca siala te lika oku liketisa pokati kolomandekua, pamue oku kupukila pokati kava va fa. Haimo onyeño yaye ka ya imũhĩle kuenje eka liaye lopo liõlõha.

⁵ Asuria, eye ohunya yonyeño yange, haeye ombueti yokutema kuange.

⁶ Ndu tuma kofeka ya tomba Suku, kuenje ndu kundikila omanu vonyeño yange ondaka okuti o kuata ocikumba, kuenda ohute, loku va kosa ndonata yovoluwa.

⁷ Haimo eye ka pangele ndomo, ndaño utima waye ka wa simile ndoco, puãi eci ci kasi vutima waye ceci, oku kundula loku nyõla olofeka via lua.

⁸ Momo eye hati, Vakesongo liange nga havosiko olosoma?

⁹ Kalino hẽ, ka lisokele la Karikemisi? Hamati hẽ, ka lisokele la Aripade? Samaria he, ka lisokele la Damasko?

¹⁰ Ndeci eka liange lia kuata ovosoma oviteka, ndaño oviñumañuma viao via velapo, okuti evi via Yerusalãi levi via Samaria vi sule,

¹¹ oco hẽ, si lingi la Yerusalãi loviteka viaye ndeci nda linga la Samaria loviteka viaye?

¹² Eci Yehova a mala upange waye wosi komunda ya Siono loko Yerusalãi oco o yambula okulituna kuosoma ya Asuria kuenda epela liokulipanda kuaye.

¹³ Momo wa linga hati, Nda ci linga longusu yeka liange, kuenda lolondunge viange momo nda lunguka. Nda sondolola olongave violofeka kuenje nda punda ukuasi wavio. Lunene walua nda kupula ava va tumãlẽle kovialo.

¹⁴ Eka liange lia sanga ukuasi wolofeka ndoku sanga ocanju; kuenje ndeci va vutola asaila a siwa haico nda vutula oluali luosi, kuenje lomue wa lisenga kavava ndaño oku asama, ndaño oku linga kueo.

¹⁵ Ondiaviti hẽ, yi lipandela u o timbula layo? Oselalo hẽ, yi livelisapo okuti u o talavaya layo o sule? Ndeci nda ohunya yi nyuña u o yi yelula, pamue ombueti yi tumũla eci hotiko!

¹⁶ Oco Ñala, Yehova Ukualohoka, o tuma ekopo pokati kava vaye va lẽla, kuenje vemẽhi liulamba waye mu timĩhĩwa okutaima ndokutaima kuondalu.

¹⁷ Ocinyi ca Isareli ci linga ondalu, kuenda U waye o kola o linga ulienge, kuenje u yoka loku lia olosongo viaye kuenda olosanyanya viaye veteke liongongo.

¹⁸ Yehova o nyõla ulamba wesisi liaye lowu wofeka yaye yovaima a liwewa, u nyõla pe, letimba lutima. Ci kala ndeci ci kala kala eci ombei yamamako koku kopa.

¹⁹ Oviti vi supa viesisi liaye vi linga viñamiñami okuti ndaño omõla o tẽla oku vi tenda.

²⁰ Eteke liaco ocisupe ca Isareli lava va puluka konjo ya Yakoba, ka va kolela vali unyali wa va veta, puãi va kolela ocili Yehova haeye U o kola wa Israeli.

²¹ Ocisupe ci tiukila ku Suku Tõlo, okuti ocisupe ca Yakoba.

²² A Israeli, ndaño omanu vove va soka ndeseke liokalunga, ocisupe cavo lika ci tiuka. Okunyolẽha kua pangiwa lokunyolẽha kuaco ku supoka esunga.

²³ Momo Ñala Yehova Ukualohoka o sulisa cosi pokati koluali luosi ndeci ca pangiwa.

²⁴ Oco Ñala Yehova Ukualohoka a linga hati, Amanu vange vu kasi vo Siono, ko ka kuati usumba wa va Asuria eci vo tatuli loluhava pamue vo yeluili ombueti yavo ndeci ca lingainga va Egito.

²⁵ Momo okasimbu kaño oco onyeño yange yimũha, kuenje okutema kuange ku pongolokela kokuavo.

²⁶ Kuenje Yehova Ukualohoka o va hanekela ombueti ndeci ca kala eci a veta va Midiani kesenje lia Horeve. Ombueti yaye yi kala kilu liokalunga, o yi tumũla ndeci a lingile ve Egito.

²⁷ Eteke liaco ocilemo caye ci tunda kocitãi cene lokanga yaye yi tunda kosingo yene. Wa tunda ko Rimone,

²⁸ weya ka Ayate, wa pitahãla Migirono, ovikuata viaye wa vi sia ko Mikimasa.

²⁹ Va pita vomaka, va lala ko Geva; Rama o luluma; Givea ya Saulu wa tila.

³⁰ Liyula londaka yove, okãi, omõla a Galimi, yevelela a Laisa, u kumbulula, a Anatote.

³¹ Madimana o kasi ale loku tila. Va Gevi va tila ha va lipopela.

³² Etali muẽle o talama ko Nove; o lipañela eka liaye komunda yomõla a Siono ukãi oyo owulu wa Yerusalãi.

³³ Tala, Ñala, Yehova Ukualohoka, o sonja ovianja longusu ya piãla. Evi via lepa vi timbuiwa, levi vi sõvi vi kupuiwa.

³⁴ O timbula ovisitu viesisi londiaviti. Levanone loviti viayo via posoka vi kupuka.