ISAYA 1 - Embimbiliya - Bíblia Sagrada em Umbundu

¹ Ocinjoinjoi Isaya, omõla a Amose, a mũila Yuda la Yerusalãi kovava a Usiya, la Yotama kuenda Ahasi la Hesekiya olosoma via Yuda.

² Yevelela, ailu. Kulula atũi, angongo. Momo Yehova wa popia. Wa linga hati, Nda tekula omãla, yu nda va pinda puãi va ngendela usuanji.

³ Ongombe ya kũlĩha cime cayo, kuenda ocimbulu ca kũlĩha osila yacime caco; Isareli puãi ka kuete ukulihiso, omanu vange ka va sokolola.

⁴ Afeka yakandu, amanu ve yuka olohole, ambuto yolondingaĩvi, amãla vahuku! Va pukula Yehova, va pembula U o kola wa Isareli, va tiukila konyima.

⁵ Nye vu totiwila ño-o omo wamamiko ño-o oku ñualẽlãpo? Utue wosi u vala, kuenda utima wosi wa leñela.

⁶ Tunde pomãi toke kutue lapamue pa ñuai, ovisimbimbi kuenda apute lolongase vi pita osonde. Ka via sĩliwile, ka via kutiwilue, pamue oku wavekiwa lulela.

⁷ Ofeka yene ya siala upolokoso, ovaimbo ene a pia londalu. Ulimo wene vamue vaiñi vo lila kovaso ene kuenje wa siala upolokoso ndu wa nyõliwa lomanu vaiñi.

⁸ Kuenje omõla a Siono ukãi wa siala ndosinge vocumbo cayuva, pamue ndocipundo vepia litende, pamue ndelavelo.

⁹ Nda Yehova Ukualohoka ka tu sililepo okacisupe katitotito, nda tua linga nda Sodoma kuenda nda tua lisoka la Gomora.

¹⁰ Yevi ondaka ya Yehova, alombiali via Sodoma. Kuluili ovatũi kovihandeleko via Suku yetu, a va Gomora.

¹¹ Yehova hati, Ondunda yovilumba viene yi ndinga nye? Ovilumba viene vioku yoka ovitupi, kuenda ulela wovinyama via netisua, via ñuma. Si sanjukila osonde yolonũi pamue yomãla volomeme, pamue yovitupi violohombo.

¹² Eci wiyi oku masula elie wo kisiki oku kosa ovitali viange?

¹³ Ko ka neni vali ovilumba viesanda, suvuka insensu. Oku mõlẽha kuosãi, kuenda esambata, kuenda oku kovonga olohongele, lohongele yoku fendela kuesanda, kuenda evĩho, viosi si vi tẽla.

¹⁴ Okumõlẽha kuolosãi kuenda ovisunji viene utima wange u vi nyãle; vi natamisa, oku vi yeva nda kava.

¹⁵ Eci vu tulika ovoko ene ndu sitikili ovaso ange, leci vu likutilila olohutililo via lua siu yevi, momo ovaka ene a kusuka ngẽ osonde.

¹⁶ Lisukuli; liyelisi; evĩho liovilinga viene li upi kovaso ange. Liweki oku linga cĩvi.

¹⁷ Lilongisi oku linga ciwa. Sandi esunga; tamãlãli la vakuakukangisa ha vu va sunguluisa. Lingi olonganji violosiwe; lingi onyima yovimbumba.

¹⁸ Ca popia Yehova ceci, hati, Enjui, tu lisunguluisi. Ndaño akandu ene a kusuka ngẽ ndonanga yohusu, a yela ndocikokoto; ndaño a kusuka ndohusu a linga ndutele.

¹⁹ Nda vu tava kuenda vu pokola oco vu lia elau liofeka;

²⁰ puãi nda vu patãla loku ñualẽlãpo vu liwa losipata, momo omẽla wa Yehova wa popia.

²¹ Imbo lia kolelelue hailio lie yukile esunga lia pongolokela ndati kukahokolo? Mua tungile esunguluko cilo puãi lia linga liolomondi.

²² Opalata yove ya pongoloka ovaña opalata, ovinyu viene via tengiwa lovava.

²³ Olombiali viene violonamalãla haivio via linãla lovimunu. Viosi vi sole ovitukiko kuenje vi kuama olombanjaile. Ka vi lingi olonganji violosiwe, ndaño ondaka yocimbumba ka yiya kokuavo.

²⁴ Oco Ñala Yehova Ukualohoka, eye Fũ ya Isareli, a popela hati, Ococo, sukumuĩla olonjaki viange onyeño yange, ndi fetuluinya ovanyãli vange;

²⁵ Ndi ku pongoluila eka liange, njenguluila ovaña opalata yove vocilenga, hu upa onengululua yove.

²⁶ Numbulula olonganji viove ndeci via kala ale; numbulula olondunguli viove ndeci viosimbu. Noke o tukuiwa imbo liesunga, imbo lia kolelua.

²⁷ Siono li yovuiwa lesunga, kuenda omanu vaco ava va litavela va yovuiwa lesunguluko.

²⁸ Puãi vakuakuñualẽlãpo kuenda vakuevĩho va nyolẽhẽla kumuamue, kuenda ava va sia Yehova va taka.

²⁹ Momo vu kuatela osõi ovilemba wa sanjukililili, kuenje vu tatamisilui oviumbo wa nõli.

³⁰ Momo vu linga ndulemba wa loluka amẽla, pamue ndocumbo ka ci kuete ovava.

³¹ Kuenje u wa pama o linga ndofukutu, lovilinga viaye vi linga ndolusãse. Kavali kavio vi taimĩla pamosi, lomue o vima.