II YOANO 1 - Embimbiliya - Bíblia Sagrada em Umbundu

¹ Ame ndukulu, ndi sonehela Ndona wa noliwa kuenda omãla vaye. Ndi va solele vocili, hameko lika ndi va sole, puãi va soliwa la vosi va kũlĩha Ocili,

² mekonda liocili ci kasi volonulo vietu kuenje ci kala letu oloneke ka vi pui.

³ Ocali lohenda lombembua yi tunda ku Suku Isia, kuenda ku Yesu Kristu Omõla a Isia, yi kala letu locili locisola.

⁴ Nda yolela cimue momo nda sanga vamue omãla vove va enda enda locili ndocihandeleko tua tambula ku Tate.

⁵ Kaliye, a Ndona, hu livondela, okuti tu lisola pokati. Si ci lingi ndoku ku sonehela ocihandeleko cokaliye, momo ocihandeleko coku lisola pokati tu kasi laco tunde kefetikilo.

⁶ Ocisola haeci okuti tu pokola kovihandeleko viaye. Locihandeleko caco coku endaila vocisola wa ci yevi tunde kefetikilo.

⁷ Olondimbiki via lua via sandukila voluali. Ka vi tava okuti Yesu Kristu weya letimba. Omunu o longisa ndomo eye ondimbiki, haeye antikristu.

⁸ Litati okuti ka vu pesela eci wa talavayeli, puãi vu tambula onima yosi yocili.

⁹ Wosi o liamisako ño lesanda kuenje ka kala vovilongua via Kristu, ka kuete Suku. U o kala vovilongua via Kristu eye o kuete Isia kuenda Omõla.

¹⁰ Umue nda iya kokuene kuenje ka ambatele ovilongua viaco ko ko tambuli vonjo ndaño oku u lama.

¹¹ Momo u u lama wa tava kovilinga viaye vĩvi.

¹² Ndaño ñuete ovina via lua oku vu sonehela, haimo si yongola oku vi soneha lopapelo lotinda, puãi ndavoka oku iya kokuene si popi lene omẽla lomẽla, oco esanju lietu li suepo.

¹³ Omãla va manjove ukãi wa noliwa va ku lama.