II VA KORINDO 8 - Embimbiliya - Bíblia Sagrada em Umbundu

¹ Cilo, a vamanji, tu vu lomboluila ndomo ocali ca Suku ca eciwa kakongelo o ko Makedonia!

² Momo, ndaño va nyikiwa ca lua lohali, haimo esanju liavo lia piãla lusuke wavo wa lua wa koka okulumba kuna kuocili.

³ Momo ndi va imbila uvangi okuti, ocipango cavo muẽle va lumba ndeci va tẽla. Oku popia ocili, va lumba eci ca pitahãla eci va tẽla.

⁴ Va tu pinga lolupili lua lua okuti tu tava okuti lavovo va eca kocilumba coku kuatisa olosandu.

⁵ Ndeci etu tua va lavokaila hacoko va linga, puai tete va litumbika ku Ñala, noke kokuetu locipango ca Suku.

⁶ Oco tua vetiya Tito okuti, ndeci a fetika ale upange wocilumba caco cocisola, haico cilo u malusula poku tambula eci ene weci.

⁷ Oco, ndeci vu supoka lovina viosi, okuti lekolelo, luloño woku kunda, lukũlĩhiso, lombili yosi, kuenda ocisola cene kokuetu, haico cilo, esunga liene li supoke vupange wocilumba cilo cocisola.

⁸ Si popi ndoku handeleka puãi, poku sokisa ombili yene leyi ya vakuavo, njongola oku nyika ocisola cene nda cocili nda ndati.

⁹ Momo ocali ca Ñala yetu Yesu Kristu vu ci, cokuti ndaño wa kala ohuasi, haimo mekonda liene, wa linga osuke, okuti kusuke waye vu muilako ukuasi.

¹⁰ Kondaka eyi yombango, elungulo liange lieli, co velelipo oku malusula eci ene tete wa sokoluili, haico wa fetikili enyamuali.

¹¹ Malusuli muẽle oku ci linga okuti, ndeci wa kali lombili yoku ci fetikisa, haico vu malusula poku lumba ndeci vu kuete.

¹² Momo, nda kuli utima woku lumba, omunu o panduiwa nda o lumba ndeci a kuete. Suku ka kisika eci omunu ka kuete.

¹³ Eci ka ca lombolokele okuti vakuavo va lipolapo osimbu ene vu lemiwa enene. Oco hacoko.

¹⁴ Ocisimilo cange ceci, okuti, vu likuatisa pokati, okuti cilo, omo wa salali, ene vu va kuatisa omo ovo va kamba; onjanja yikuavo ovo, eci va salala, vo kuatisi ene nda wa kambi. Oco ca lomboloka oku likuatisa pokati.

¹⁵ Ndeci ca sonehiwa okuti, U wa nyomola ca lua ka co supilile, lu wa nyomola citito ka co kambisile.

¹⁶ Puãi pandu pandu ku Suku u wa kapa vutima wa Tito ocisola coku vu wivaluka ca soka locisola cetu.

¹⁷ Momo ka ci kasi lika okuti wa tava omo tuo pinga, puãi, omo a kasi lombili ya lua, oco o kasi loku iya kokuene ocipango caye muẽle.

¹⁸ Tuo tuma la manjetu wa kemalela okukunda kuaye ondaka yiwa vakongelo osi.

¹⁹ Hacoko lika, wa noliwavo lakongelo oku tu sindikila osimbu tu kasi lupange u wocilumba cocisola. Upange waco tu kasi loku u lingila ulamba wa Ñala, kuenda oku lekisa utima wetu woku likuatisa pokati.

²⁰ Tu yongola okuti lomue o tu vetisila evelo ocilumba eci cocisola tu kasi loku amũla.

²¹ Momo tu livela lika oku linga eci ca sunguluka, hakovaso a Ñalako lika, puãi lo kovaso omanu le.

²² Tua va tuma la manjetu u tua nyika nyika olonjanja via lua, kovina via lua, kuenje tua sanga okuti ukuambili, cilo puãi ombili yo luila vali enene omo wo koleli ca lua.

²³ Oco Tito ndu tukula, siti, Eye ukuetu haeye oñuatisi yange koku vu vumba, vakuetu ndi va tukula siti, Ovo olomunga viakongelo, haivo ulamba wa Kristu.

²⁴ Oco, lekisi kokuavo kovaso akongelo okuti ocisola cene cocili, kuenda okuti, oku vu lipandiyila kuetu lakovo kuocili.