II VA KORINDO 3 - Embimbiliya - Bíblia Sagrada em Umbundu

¹ Tu fetika hẽ oku lisivaya vali etu muẽle? Tu sukila oku liecela pokati ovikanda viuvangi? Tu sukila, nda vamue, ovikanda viuvangi, ndeci evi vietu vioku eca kokuene, pamue vievi viene vioku tuiha?

² Ene, ene vukanda wetu wuvangi, haiwo wa sonehiwa kovitima vietu, okuti u kũlĩhiwa loku tangiwa lomamu vosi.

³ Kuenda vali vu limbukiwa okuti ene wukanda wa Kristu, wa sonehiwa letu, ka wa sonehiwile lotinda, te le Espiritu lia Suku ukuamuenyo, ka wa sonehiwile kovitale viovawe, te kovitale viositu ndokuti ovitima.

⁴ Ekolelo liaco tu li kuetele Suku omo tua kũlĩha Kristu.

⁵ Ka ci kasi okuti etu tua likolela kuenje tu popia tuti, Ca tunda kokuetu. Okutẽla kuetu ku tunda ku Suku,

⁶ u wa tu iha unene woku linga oloñuatisi viupange wocisila cokaliye. Locisila caco ha coku sonehako, te ce Espiritu, momo ocisila ca sonehiwa ci tiamisa kokufa, Espiritu puãi o muisa omuenyo.

⁷ Cilo, ocisila cokufa, cina ca sonehiwa loku sokotola kovitale viovawe, nda ca kala lulamba, okuti va Isareli ka va tẽlele oku tulukila kocipala ca Mose mekonda liokunina kuocipala caye, ndaño okunina kuaco kua senguluka,

⁸ upange wocisila ce Espiritu hẽ, ka u kala lulamba wa piãla?

⁹ Momo nda ocisila cepiso ca kala lulamba, siti ocisila cesunga nda ci piãla vali enene kulamba?

¹⁰ Momo cilo, eci ca kaile lulamba ka ci kuete vali ulamba, omo kuli ulamba ukuavo wo piãla.

¹¹ Momo nda eci ca senguluka ale ca kaile lulamba, siti eci ci tumala hũ ci piãla vali enene kulamba?

¹² Omo tu kuete elavoko ndeli oco tu popia lutõi wa lua.

¹³ Ka tu lingi nda Mose, u wa vuvika ocipala caye okuti va Isareli ka va moli efulilo liulamba u senguluka.

¹⁴ Ovitima viavo puãi via tĩlisua, momo toke ketaili lilo, eci va tanga ocisila cale, okuvuvika kuaco muẽle haiko ku kasi, momo oku ku imula kuiya lika la Kristu.

¹⁵ Omo toke ketaili lilo, eci Mose a tangiwa, okuvuvika kuaco haimo ku kasilili kovitima viavo.

¹⁶ Puãi, eci omunu a pongolokela ku Ñala, okuvuvika kuaco ku u upiwa.

¹⁷ Momo Ñala eye Espiritu, kuenje oku kuli Espiritu lia Ñala haiko ku tavela oku linga omãla vamãle.

¹⁸ Etu vosi, locipala ca sikũlũha, eci tu molehisa ulamba wa Ñala ndeci olumuĩlo, oco tu pongoluiwa esetahalo liaye tunde kulamba ta kulamba, ndeci ca panga Espiritu lia Ñala.