II TIMOTEO 4 - Embimbiliya - Bíblia Sagrada em Umbundu

¹ Hu lunguila kovaso a Suku lo kovaso a Kristu Yesu, u o tukuluka oku viala kuenje o tetuluila ava va kasi lomuenyo lava va fa, siti,

² Kunda ondaka. Kolisako, ndaño kotembo yaco, ndaño hakotembo yacoko. Tamalala lava va yi pengisa. Lemela. Lungula. Ku ka tepuluke kepandi ndaño koku longisa.

³ Momo kuiya oloneke okuti omanu ka va tava kokulongisa kuocili, puãi, omo va kasi lovatui a yua, oco va liongoluila alongisi ndovipango viavo,

⁴ kuenje vopa ovatui koku yevelela ovina viocili ha va yapukila kolosapo viaño.

⁵ Ove puãi, lilava kovina viosi. Pandikisa kohali. Linga ukundi wondaka yiwa. Tẽlisa ocikundi cupange wove.

⁶ Momo ame ñasi loku peseliwa ale ndocitundasonde. Otembo yange yoku enda yeya.

⁷ Nda yaka uyaki uwa. Oku yoloka nda mala. Koku tata ekolelo nde lipua.

⁸ Pa siala ekolowa liesunga lia solekiwila. Ñala onganji yesunga o li eca kokuange keteke liaco, hakokuangeko lika puãi ku vosi va sola etukuluko liaye.

⁹ Yayulako oku iya kokuange ndopo.

¹⁰ Momo Dema wa njanduluka omo a sola oluali lulo, kuenje wa enda ko Tesalonike. Kreske wa enda ko Galatia, Tito ko Dalmatia.

¹¹ Luka lika o kasi lame. Pitula Marko hu iya laye momo o ñuatisa ca lua kupange wange.

¹² Tukiko ndo tuma ke Efeso.

¹³ Eci wiya, enju lokapote nda sia ko Torasi ku Karpo, lalivulu le, cinene ya ovipa.

¹⁴ Alexandro, uteli wosipi, wa ndinga ca lua cĩvi. Ñala u fetuluinya ndovilinga viaye.

¹⁵ Lovevo lunguka laye, momo wa patãla ca lua olondaka vietu.

¹⁶ Kekanga liange liatete lomue wa ñaila onyima, puãi vosi va njanduluka. Ka ci ka kapiwe kokuavo.

¹⁷ Puãi Ñala, eye wa ñaila onyima, haeye wa nyiha ongusu yoku kunda ondaka okuti vakualofeka vosi va yi yeva. Oco nda popelua vomẽla wohosi.

¹⁸ Ñala o muluisa kevĩho liosi, kuenje o mopela okuti nyiñila vusoma waye wokilu. Kokuaye ku kale ulamba oloneke vi enda ño-o hũ, ka vi pui. Amene.

¹⁹ Lamapo Priska la Akula kuenda onjo ya Onesiforo.

²⁰ Erasto wa siala ko Korindo. Trofimo ndo sia ko Miletu, o vela.

²¹ Yayulako oku iya osimbu ombambi ka yeyile. Eubulo wa ku lamapo, la Pudeni la Linu la Klaudia la vamanji vosi.

²² Ñala a kale lutima wove. Ocali ci kale lene.