II TIMOTEO 3 - Embimbiliya - Bíblia Sagrada em Umbundu

¹ Puãi, limbuka eci okuti, koloneke via sulako kuiya otembo yohali.

² Momo omanu va linga vakuakulisola, vakuakusola olombongo, vakuakulipandiya, vakueyengu, vakuakatombangunja, haivo va siñaila olonjali viavo, vakualutukãi, ka va kuete efendelo,

³ ka va kuete ocikembe la vangandiavo. Va linga vakuamanya, vakualundi, haivo ka va tẽla oku likandangiya, va linga olongangala, ka va sole eci ciwa,

⁴ haivo olomakuli, vakuacipango, vakuepela, vakuakusola ca lua esanju, Suku ci sule.

⁵ Va limolehisa nda vakuekolelo lioku kolela Suku, puãi va likala unene walio. Oco litepa lavo.

⁶ Momo pokati kavo pali ava va liyombaika volonjo, kuenje va kuata akãi ka va lungukile, haivo va lemiwa lakandu, kuenje va kokiwa ño loloñeyi viñi viñi.

⁷ Ovo va yevelela ño ku wosi o seteka oku longisa, puãi ka va tẽla oku pitila kukũlĩhiso wovina viocili.

⁸ Ndeci Jane la Jambre va patãlẽle Mose, haico alume vaco va patãla eci cocili, haivo omanu va nyõleha vutima, kuenje ekolelo liavo ka li silivila.

⁹ Puãi ka va ami kupãla momo uveke wavo u limbukiwa lomanu vosi ndeci una wa Jane la Jambre.

¹⁰ Ove puãi wa mola okulongisa kuange, lovilinga viange, lonjongole yange, lekolelo liange, lolupili luange, locisola cange, lepandi liange,

¹¹ lakangiso ange, lohali yange, lovina via ndingiwa ka Antiokea, lo ki Ikoniyu, lo ko Lustra. Wa kũlĩha okuti, ndaño nda pandikisa koku kangisua, haimo Ñala wa mopela kovina viaco viosi.

¹² Ocili, vosi va panga oku kala lomuenyo wesunga lia Suku vu Kristu Yesu va kangisiwa,

¹³ osimbu omanu vãvi lolohembi vamamako loku linga cĩvi haivo va kemba kemba loku kembiwa.

¹⁴ Ove puãi, kala lovina wa lilongisa haivio wa kolela, loku limbuka ava va ku vi longisa.

¹⁵ Ivaluka ndomo, tunde kuñaña, wa kũlĩha ovisonehua vi kola, haivio vi tẽla oku ku longisa ndomo o tẽla oku popeliwa lekolelo lioku kolela Kristu Yesu.

¹⁶ Ovisonehua vi kola viosi ovitumasuku, kuenje vi silivila oku longisa, loku lungula, loku pindisa, loku ikisa esunga,

¹⁷ okuti omunu wa Suku o loñoloha, haeye angiliyiwila ovopange osi awa.