II TIMOTEO 2 - Embimbiliya - Bíblia Sagrada em Umbundu

¹ Oco ove amõlange, kolisiwa vocali ci kasi vu Kristu Yesu.

² Ovina wa yeva kokuange kovaso olombangi via lua vi kundika komanu va kolelua, haivo va tẽla oku longisavo vakuavo.

³ Kolisako oku tala ohali ndesualali liwa lia Kristu Yesu.

⁴ Lalimue esualali, osimbu li kasi kusualali, li sakalala lovina vikuavo viomuenyo ulo, omo o livela lika oku sanjuisa u wo sonehisa kusualali.

⁵ Kuenda omunu, nda wa yoloka oku litunda, ka tambula ekolowa, te wa yoloka locihandeleko caco.

⁶ Ongunja ka yi talavaya ciwa ka yi sangi ovaima awa.

⁷ Sokolola eci mopia, momo Ñala o ku iha olondunge vovina viosi.

⁸ Ivaloka Yesu Kristu u wa pinduiwa kuava va fa, haeye ukuepata lia Daviti, ndeci ndo lombolola eci nda kunda ondaka yiwa.

⁹ Ondaka yaco oyo ñasilili lohali, haiyo nda kutiwila lalienge ndondingaĩvi. Ondaka ya Suku puãi ka ya kutiwile.

¹⁰ Oco mandikisa lovina viosi okuti ava va noliwa va kuata eyovo li sangiwa vu Kristu Yesu, kuenda ulamba ko pui una wendela kumuamue lalio.

¹¹ Ondaka yimue ya kolelua yeyi, okuti, Nda tua fila kumue laye tu muila omuenyo kumue laye.

¹² Nda tu pandikisa tu vialela kumue laye. Nda tu u likala eye o tu likalavo.

¹³ Nda ka tu u kolela eye haimo o kolelua. Momo eye ka tẽla oku likala eye muẽle.

¹⁴ Va ivaluisa ovina evi loku va lunguila kovaso a Suku okuti ka va ka liyenjaile olondaka. Oco ka ci silivila, kuenje ci tatamisa ava va ci yeva.

¹⁵ Kolisako oku lilekisa ku Suku ndu we lipua, ndondingupange ka yi kuete eci ci yi kutisa osõi, haiyo yi kunda lesunga ondaka yocili.

¹⁶ Puãi yuvula olombangulo vietombo lumamõhe, momo vi songuila omanu koku amako letombo lioku tomba Suku.

¹⁷ Kuenje olombangulo viaco vi takĩla ndepute liosembuembue. Pokati kavo pali Humeneo la Filetu.

¹⁸ Ovo va pambuka kondaka yocili, momo va linga vati, Epinduko lia pita ale. Va kasi loku nyõla ekolelo lia vamue.

¹⁹ Haimo ociseveto ca Suku ca sevetiwa ciwa, haico ci ñuãi, kuenda ci kuete ocisonehua eci, Ñala wa kũlĩha ava vaye, kuenda vali ceci, Wosi o tukula onduko ya Ñala a litepe levĩho.

²⁰ Vonjo yimue yinene ka muli lika ovikuata viulu levi viopalata, puãi mulivo evi viuli levi viotuma, vikuavo vietepo, vikuavo viesepu.

²¹ Omunu, nda o liyelisa kovina via vĩha, o linga ocikuata cesumbilo, haico ci kola, kuenje ca sungulukila muẽleanjo, haico ca sokiyiwila ovilinga viosi viwa.

²² Oco, yuvula oloñeyi viamalehe. Loña kesunga lekolelo, kuenda kocisola lombembua. Loñelako kumue lava va vilikiya ku Ñala lovitima vie lipua.

²³ Ku ka iñile volombangulo violonamalala viuveke levi vionumbi. Wa ci kũlĩha okuti vi koka ovoyaki.

²⁴ Okuyaka ka kua sungulukilile ukuenje wa Ñala, te oku omboka la vosi, loku linga ulongisi uwa, loku pandikisa la vakualonamalala.

²⁵ Ava va patãla o va pengulula lumbombe okuti, nda ci tava, Suku o va iha utima woku likekembela akandu loku kũlĩha ocili.

²⁶ Nda oco va linga, va puluka vonjanjo yeliapu, momo va kuatiwa laye ha va lingi ocipango caye.