II SAMUELE 9 - Embimbiliya - Bíblia Sagrada em Umbundu

¹ Daviti wa popia hati, Kua siala hẽ umue ukuepata lia Saulu okuti ndu kuatisa omo nda ivaluka calua Yonatão?

² Kua kala ukuenje umue wa kala vonjo ya Saulu, onduko yaye Siva. Vo kovonga kuenje weya ku Daviti. Soma wo pula hati, Ove muẽle Siva? Wa kumbulula hati, A Kuku, ame.

³ Soma wo pula vali hati, Kua siala hẽ umue kepata lia Saulu okuti ndu lekisa ohenda ya Suku? Siva yu wa kumbulula Soma hati, Kuli omõla a Yonatão, eye wa lemãla kolomãi.

⁴ Soma wo pula, hati, O kasi pi? Siva wa kumbulula Soma, hati, O kasi ko Lodevare, konjo ya Makiri, omõla a Amieli.

⁵ Oco Soma Daviti wa tuma ko Lodevare oku ko wupa vonjo ya Makiri, omõla a Amieli.

⁶ Kuenje Mefivosiete, omõla a Yonatão, omõla a Saulu, weya ku Daviti, wa wila posi, wo fendela. Daviti wo vanja, hati, A Mefivosiete. Eye wa kumbulula hati, Ukuenje wove yulo.

⁷ Daviti wa popia laye hati, Ku ka kuate usumba, omo hu lingila ohenda oku panduila ocisola ca soyove Yonatão. Ovapia osi a sokulu yove Saulu ndi a tiula kokuove. Love o lialia komesa yange omuenyo wove wosi.

⁸ Eye wa livondela hati, Ukuenje wove eye elie okuti ove o vanja ombua yaño ndame?

⁹ Oco Soma wa pañinya Siva, ukuenje wa Saulu, kuenje wa popia laye hati, Cosi ca tiamẽla ku Saulu lonjo yaye yosi nda ceca komõla a cime cove.

¹⁰ Ove lomãla vove lakuenje vove, ene vu u limaila ovapia loku ungula ovaima okuti omõla a cime cove o sanga ombolo yoku lia. Mefivosiete puãi, omõla a cime cove, eye o lialia komesa yange. Siva wa kala lekũi liomãla komãla vatãlo valume, kuenda akũi avali kakuenje.

¹¹ Siva wa popia la Soma, hati, Cosi ca tumĩla cime cange Soma ukuenje waye, oco ukuenje wove a linga. Oco Mefivosiete wa lialia komesa ya Daviti ndomõlaye muẽle.

¹² Mefivosiete wa kala lokamõla kulume, onduko yaye Mika. Vosi va kala vonjo ya Siva va linga akuenje va Mefivosiete.

¹³ Mefivosiete wa tumãla vo Yerusalãi momo wa lialia komesa ya Soma. Eye wa lemãla kolomãi viaye, kavali kavio.