II SAMUELE 8 - Embimbiliya - Bíblia Sagrada em Umbundu

¹ Kovaso yaco Daviti wa yula va Filisiti kuenje wa va vumbisa. Daviti wa va nyeha unene wombala yavio.

² Wa yulavo va Moavi. Wa va kapa kovilala loku va pekelisa posi. Wa tepapo ovilala vivali, hati, Va fe. Ulala umosi wo supisapo. Va Moavi va linga akuenje va Daviti kuenje vo lambuila ulambu.

³ Daviti wa yulavo Hadadesere, omõla a Rehova, osoma ya Sova, osimbu a kala vonjila yoku enda oku ka tumbulula uviali waye kolui Ferati.

⁴ Daviti wo nyeha ohulukãi kovita epanduvali via vakuakuendela kotuvalu, lakui avali kolohũlũkãi viasualali vakuakuendela posi. Daviti yu wa teta akanja otuvalu tuosi tua koka akãlu, puãi wa supisapo otuvalu tuocita cakãlu.

⁵ Eci va Suria voko Damasko veya oku kuatisa Hadadesere, osoma ya. Sova, oco Daviti wa ipaya akui avali lavali kolohulukãi via va Suria.

⁶ Oco Daviti wa kapa ovisoko viasualali vo Suria ya Damasko, yu va Suria va linga vakuakuvumba Daviti kuenje vo lambuila ulambu. Yehova wa yulaisa Daviti kuosi a enda.

⁷ Daviti wa punda olotevele viulu viambatiwile lakuenje va Hadadesere kuenje wa vi nena ko Yerusalãi.

⁸ Ko Beta loko Berotiai, ovaimbo a Hadadesere, Daviti wa punda osipi yalua.

⁹ Eci Toi, osoma ya Hamati, a yeva okuti Daviti wa yula ovita viosi via Hadadesere,

¹⁰ oco Toi wa tuma omõlaye Yorama kosoma Daviti oku ko lama loku u panduila ndomo a yaka la Hadadesere lomo o yula. Momo Hadadesere wa yaka yaka calua la Toi. Yorama wa nena ovikuata viopalata lulu kuenda osipi.

¹¹ Evi laviovo Soma Daviti wa vi tumbika ku Suku kumue levi viulu lopalata a punda komanu vosi a yula,

¹² okuti ku va Edome, la va Moavi, ku va Amoni la va Filisiti la va Amaleke, kolohute via Hadadesere, omõla a Rehova, osoma ya Sova.

¹³ Oluhimo lua Daviti lua kemãlisa onduko yaye. Eci a tiuka wa ipaya ekui lecelãla kolohũlũkãi via va Edome vocimbota comongua.

¹⁴ Wa kapa ovisoko viasualali ve Edome. Ve Edome yosi wa kapa ovisoko viasualali kuenje va Edome va linga vakuakuvumba Daviti. Yehova wa yulaisa Daviti kuosi a enda.

¹⁵ Oco Daviti wa viala va Isareli vosi kuenje wa tepasaila omanu vaye vosi lesunga locili.

¹⁶ Yoava, omõla a Ceruya, wa kala kesongo liovita. Yehosofata, omõla a Ahilude, eye wa kala ulombololi wovisonehua.

¹⁷ Sadoke, omõla a Ahituva, kuenda Ahimeleke, omõla a Aviatare, ovo va kala ovitunda. Seraya eye wa kala usonehi.

¹⁸ Benaya, omõla a Yehoyada, wa kala usongui wa va Kereti la va Peleti. Omãla va Daviti va kala ovitunda.