II SAMUELE 7 - Embimbiliya - Bíblia Sagrada em Umbundu

¹ Eci Soma a kala vonjo yaye kuenje Yehova wo puluyuisa kovanyãli vo ñuala,

² oco Soma a popia luprofeto Natana hati, Tala, ame ñasi vonjo yocili yolo-cedro, ocikasia ca Suku puãi ci kasi ño vombalaka.

³ Natana wa kumbulula Soma, hati, Kuende, ka linge cosi ci kasi vutima wove momo Yehova o kasi love.

⁴ Uteke waco puãi ondaka ya Yehova yeya ku Natana, yiti,

⁵ Kuende ka sapuile ukuenje wange Daviti, huti, Ca popia Yehova ceci, hati, O nungila nga onjo yoku kalamo?

⁶ Sia la kala vonjo tunde keteke ndopa va Isareli ke Egito toke ketali lilo. Puãi pokuñualañuala kuange, ombalaka oyo ya linga onjo yange yoku kala.

⁷ Kuosi nda ñuala ñuala lomanu vange va Isareli hẽ, kuli limue eteke nda pula asongui va va Isareli, vana nda kapa ndangombo vomanu vange va Isareli, siti, Nye ka wa nungilili onjo yavaya oviti viocedro?

⁸ Oco, popia lukuenje wange Daviti, huti, Ca popia Yehova Ukualohoka ceci, hati, Nda kupa kovisenge koku tata olomeme okuti o linga Soma yomanu vange va Isareli.

⁹ Nda kala kala love kuosi waendaenda. Nda nyõla ovanyãli vove vosi kovaso ove Hu muisa onduko ya kemãla ndonduko yava va kemãla palo posi.

¹⁰ Kuenje mongiyila omanu vange va Isareli ocitumãlo. Ndi va tumalisa ciwa okuti va kala kocitumãlo cavo muẽle, ka va sakalaisua vali. Olongangala ka vi va talisa vali ohali ndeci via lingainga ale osimbu,

¹¹ tunde kotembo nda nolela omanu vange va Isareli olonganji. Hu puyuisavo kovanyãli vove vosi. Kuenda vali Suku wa ku sapuila hati, Hu tungila onjo.

¹² Eci oloneke viove vi telisua love o pekela lolosekulu viove, oco noke ñatula omõlove wa tunda koviongo viove muẽle kuenje numalisa uviali waye.

¹³ Eye o tungila onduko yange onjo, lame numalisa hũ uviali waye,

¹⁴ Ame ndinga soyaye, leye o linga omõlange, Eci o lueya ndu yambula lombueti yomanu pamue lolohava viomãla vomanu.

¹⁵ Puãi ocisola cange ka ci pongoloka si cupi kokuaye ndeci nda cupile ku Saulu una wa livanga oku viala.

¹⁶ Epata liove luviali wove vi kolisua kovaso ange otembo ka yi pui. Omangu yove yi tumãla hũ otembo ka yi pui.

¹⁷ Natana yu wa sapuila Daviti olondaka evi viosi kuenda cosi cocinjonde caco.

¹⁸ Daviti wa iñila kuenje wa tumãla kovaso a Yehova, wa pula hati, A Yehova Suku, ame hẽ elie? Vakuepata liange hẽ velie okuti wa nena toke palo?

¹⁹ Haimo lumue, a Yehova Suku, kovaso ove eci cosi ca linga citito. Wa vokiyako vali oku tukula epata liukuenje wove okuti li enda ka ku ci. Wa ndekisavo ovitumbulukila viya kovaso, a Yehova Suku.

²⁰ Daviti hẽ, o popia vali nye love? Momo ove wa kũliha ukuenje wove, a Yehova Suku.

²¹ Omo wa ci likuminya lomo utima wove u kuete esunga oco wa linga ovina evi viosi vinene loku vi lomboluila ukuenje wove.

²² Oco ove onene, a Yehova Suku. Ka kuli u wa lisoka love. Ka kuli Suku yikuavo te ove, ndeci tua yeva yeva lovatui etu.

²³ Palo posi omanu vakuavo va lisoka lomanu vove va Isareli velie? Ovo muẽle, Suku a yovola ha va lingi omanu vaye. Wa lisokiyila eye muẽle onduko, kuenje wa va lingila ovina vinene haivio vi komohisa poku tundisa kovaso omanu vaye ofeka lolosuku viayo.

²⁴ Kuenje wa litumalisila omanu vove va Isareli ha va lingi omanu vove otembo ka yi pui. Love, a Yehova, wa linga Suku yavo.

²⁵ Kaliye, a Suku Yehova, kolisa ondaka wa popela ukuenje wove lepata liaye. Yi kolisa otembo yi pui. Linga muẽle ndeci wa popele.

²⁶ Kuenje onduko yove yi kemãla otembo ka yi pui, vati, Yehova Ukualohoka, eye Suku va Isareli. Onjo yukuenje wove Daviti, layovo, yi kolisua kovaso eve.

²⁷ Momo ove a Yehova Ukualohoka, haive Suku ya va Isareli, ove wa ci situluila ukuenje wove, huti, Hu tungila onjo. Oco ukuenje wove a kuete utõi woku likutilila kokuove ohutililo evi.

²⁸ Kaliye a Yehova Suku, ove muẽle Suku. Olondaka viove viocili. Wa likuminya eci ciwa lukuenje wove.

²⁹ Oco cilo, a Yehova Suku, ndo sumuluise onjo yukuenje wove okuti yi kala ño hũ kovaso ove. Momo ove, a Yehova Suku, wa popia, kuenje lesumuluho liove onjo yukuenje wove yi sumuluha otembo ka yi pui.