II SAMUELE 6 - Embimbiliya - Bíblia Sagrada em Umbundu

¹ Daviti wongolola vali akui atatu kolohũlũkãi vialume va noliwa va Isareli.

² Daviti wa katuka, wa enda kumosi lomanu vosi va kala laye ko Baale Yuda, wa enda oku kopa ocikasia ca Suku ca kalako. Ocikasia caco ca lukiwa londuko ya Yehova Ukualohoka. Eye, Yehova Ukualohoka, o tumala ndosoma kilu lia vakeruvi.

³ Ocikasia ca Suku va cupa vonjo ya Avinadave ya kala komunda, va cambatela vekãlu liokaliye. Usa la Ahiyo, omãla va Avinadave, ovo va endisa ekãlu liaco liokaliye.

⁴ Usa ukuakuendisa, eye wa endela konẽle yocikasia. Ahiyo, eye wa pita kovaso yocikasia.

⁵ Daviti la va Isareli vosi va enda loku yolela calua Suku Yehova, va imba ovisungo, va cĩla, va sika olohalupa lolombendo lalimba lotulialia kuenda olondingu.

⁶ Eci veya kocisaselo ca Nakonu oco olongombe via fetika oku tatama oku enda. Usa yu wolõla okuokuo, wa kuata ocikasia ca Suku leka liaye.

⁷ Onyeño ya Yehova ya wengukila Usa kuenje Suku wo veta omo olũila ocikasia okuokuo. Paco opo haipo a fila, konele yocikasia ca Suku.

⁸ Daviti wa tema omo Yehova wa veta Usa. Kuenje toke etali lilo usenge waco u tukuiwa Okuvetiwa-kua-Usa.

⁹ Eteke liaco Daviti wa yokokela Yehova. Wa pula hati, Ocikasia ca Yehova ciya ndati kokuange?

¹⁰ Oco Daviti ka tavele oku tuala ocikasia ca Yehova vimbo lia Daviti. Daviti puãi wa ci tiñuluila konjo ya Ovededome u Giti.

¹¹ Ocikasa ca Yehova ca kala vonjo ya Ovededome u Giti olosãi vitatu. Kuenje Yehova wa sumuluisa Ovededome lonjo yaye yosi.

¹² Va sapuila Soma Daviti vati, Yehova wa sumuluisa onjo ya Ovededome, la cosi caye omo ocikasia ca Suku ca kalamo. Oco Daviti wa enda, wopilila ocikasia ca Suku vonjo ya Ovededome, wa ci nena lonjolela kimbo lia Daviti.

¹³ Eci ava vambata ocikasia ca Yehova vamako olomãi epandu oco wa lumba ongombe lomeme ya netisua.

¹⁴ Daviti wa cĩla lutima waye wosi kovaso a Yehova. Daviti wa wala efonde liovalatanya.

¹⁵ Oco Daviti la va Isareli vosi va nena ocikasia ca Yehova, va ci nena loku ulula loku sika olumbeta.

¹⁶ Eci ocikasia ca Yehova ca kala loku iñila vimbo lia Daviti oco Mikale, omõla a Saulu, wa lengelela konjanela kuenje wa mõla Soma Daviti oku somboaka loku cĩla kovaso a Yehova kuenje wo helula vutima.

¹⁷ Va nena ocikasia ca Yehova, va ci tumbika komangu yaco vombalaka Daviti a ci sokiyila. Daviti yu wa lumbila Yehova ocilumba coku pia elisi leci combembua.

¹⁸ Eci Daviti a mala oku lumba ocilumba coku pia elisi leci combembua oco wa yalula omanu loku va sumuluisa londuko ya Yehova Ukualohoka.

¹⁹ Kuenje wamuila omanu vosi va Isareli, vosi muẽle, lalume lakãi, omunu lomunu, ombolo yimosi lokasitu kuenda ekende liayuva. Oco vosi va enda, omunu konjo yaye, omunu konjo yaye.

²⁰ Daviti wa tiukila oku sumuluisa vakuanjo yaye muẽle. Puãi Mikale, omõla a Saulu, wa tunda oku ñualehela la Daviti. Wa popia hati, Soma ya va Isareli etali avoyo! wa likokela esumbilo! Etali wa lulila kovaso afeko vakuenje vaye ndeci vakuesanda, haivo va pua osõi, va lula lula.

²¹ Daviti wa popia la Mikale hati, Ca kala kovaso a Yehova, una wa nola ame loku imbapo soyove lepata liaye liosi. Wa nola kuenje wa mbialeka Soma ya va Isareli, haivo omanu va Yehova. Ndi cĩla muẽle loku yolela kovaso a Yehova.

²² Mbokinyako vali oku linga eci ci nombisa. Sawuka muẽle kovaso ove. Puãi kovaso afeko vana ove wa tomba sumbiwa.

²³ Mikale, omõla a Saulu, wa fa ño, ka la cita omõla.