II SAMUELE 5 - Embimbiliya - Bíblia Sagrada em Umbundu

¹ Oco apata osi a va Isareli eya ku Daviti ko Hevirone, va popia vati, Tuakepa vove, tusitu yove.

² Konyima, eci Saulu a kala Soma yetu, ove, ove wa songowaila va Isareli kolongenda viavo viosi. Kuenje Yehova wa popia love hati, Ove o linga ungombo womanu vange va Isareli, o lingavo Soma ya va Isareli.

³ Oco, akulu vosi va va Israeli veya ku Soma ko Hevirone, kuenje Soma Daviti wa lisila lavo kovaso a Yehova vo Hevirone. Yu va waveka Daviti ha lingi Soma ya va Isareli.

⁴ Daviti wa kala lanyamo akui atatu eci a fetika oku viala. Wa viala akui akuãla kalima.

⁵ Vo Hevirone wa viala va Yuda alima epanduvali kuenda olosai epandu. Vo Yerusalãi wa viala va Isareli la va Yuda akui atatu latatu kalima.

⁶ Soma lalume vaye va enda ko Yerusalãi ha va yaki la va Yevusi haivo vakuafeka yaco. Va popia la Daviti vati, Ku iñila mulo. Olomeke lovilema vi ku tiuwiya,— omo va simile vati, Daviti ka tẽla oku iñila mulo.

⁷ Haimo lumue Daviti wa kuata ocikolo caco ca Siono haico imbo lia Daviti.

⁸ Eteke liaco Daviti wa popia hati, Wosi o yongola oku nyõla va Yevusi a pite vondamba, a yake lovilema lolomeke, ovo va suvukiwa vutima wa Daviti. Oco va popia popia vati, Olomeke lovilema ka viñila vonjo.

⁹ Oco Daviti wa tumãla vocikolo kuenje wa ci luka hati, Imbo lia Daviti. Daviti wa tungisa kolonele viaco viosi, Milo ya kala vokati.

¹⁰ Daviti wamamako kunene omo Yehova, Suku yolohoka, wa kala laye.

¹¹ Hirama, osoma ya Turo, wa tuma olomunga ku Daviti, wa tumavo oviti violocedro kuenda olo-carpinteiro lolo-pedreiro. Va tungila Daviti onjo.

¹² Daviti wa limbuka okuti Suku wo vialeka ha lingi Soma ya va Isareli. Wa limbukavo okuti wa kemãlisa uviali waye omo wa sola omanu vaye va Isareli.

¹³ Daviti wa tambula vali vo Yerusalãi olonjimbuanyima lakãi volohuela kovaso yoku tunda ko Hevirone.

¹⁴ Olonduko viomãla a citila vo Yerusalãi vievi, Siamua, la Siovava, la Natana kuenda Solomone,

¹⁵ la Ivehari, la Elisua kuenda Nefege la Yaviya

¹⁶ la Elisiama kuenda Eliada la Elifelete.

¹⁷ Eci va Filisiti va yeva okuti Daviti wa wavekua ha lingi Soma ya va Isareli oco va Filisiti vosi va sandiliya Daviti. Daviti puãi wa ci yeva kuenje wa lokila kocikolo.

¹⁸ Va Filisiti veya, va lisanduila vocimbota ca Refaimi.

¹⁹ Daviti yu wa pula Yehova hati, Nundila va Filisiti ale? O va eca peka liange ale? Yehova wa kumbulula Daviti hati, Kuende, ka va tundile. Va Filisiti ndi va eca peka liove muẽle.

²⁰ Daviti weya ko Baale Perasimi kuenje haiko wa va yula. Wa popia hati, Yehova wolumula ovanyãli vange ndocuviko. Oco ocitumãlo caco va ci tukula vati Baale Perasimi, ca lomboloka Yehova ukuakuulumula.

²¹ Va Filisiti va siako oviteka viavo kuenje Daviti lalume vaye va vi ambata.

²² Va Filisiti veya vali kuenje va lisanduila vocimbota ca Refaimi.

²³ Eci Daviti a Pula, Yehova wa kumbulula hati, Ku ka lamane. Ñuala konyima yavo. Livanga lavo kuna ku kasi oviti viamoreira.

²⁴ Eci o yeva kilu lioviti oku ñoña ndokuenda kuasualali oco yayulako oku lipongiya, momo Yehova wa livanga kovaso yove ha nyõli olohoka via va Filisiti.

²⁵ Daviti wa linga ndeci Yehova o sapuila kuenje wa nyõla va Filisiti tunde ko Geva toke ko Gesere.