II SAMUELE 4 - Embimbiliya - Bíblia Sagrada em Umbundu

¹ Eci Isivosiete, omõla a Saulu, a yeva okuti Avinere wa fila vo Hevirone oco utõi waye wo pua. Va Isareli vosi lavovo va tokotelua.

² Omõla a Saulu wa kala lalume vavali vakesongo va vakuakupunda. Ukuavo onduko yaye Baana, ukuavo onduko yaye Rekava, ovo omãla va Rimone u Benjamini woko Berote, omo Berote laliovo li tiama ku va Benjamini.

³ Va Berote va tilila ko Gitami kuenje haiko va kasi toke etali lilo.

⁴ Yonatão, omõla a Saulu, wa kala lokamõla kulume ka lemaila kolomãi. Ka kala lanyamo atãlo eci ondaka ya Saulu la Yonatão ya tunda ko Yesirele. Ukuaku-u-tata wo yelula, wa tila laye. Poku tila lonjanga eye wa kupuka, wa linga ocilema. Onduko yaye Mefivosiete.

⁵ Rekava la Baana, omãla va Rimone u Berote, va tunda, kuenje kekumbi pongunji veya konjo ya Isivosiete. Vo sanga wa pekela.

⁶ Ondavululi yonjo ya kaile kupange woku pekula otiliku. Wa fetika oku suñila noke wa pekela otulo. Oco Rekava la manjaye Baana va iñila uyombeki.

⁷ Eci va iñila vonjo oco vo sanga wa pekela pula vohondo yaye. Oco vo toma, vo wipaya kuenje vo teta utue. Va nyañula utue waye, va endela venyala lia Araba uteke wosi,

⁸ va nena utue wa Isivosiete ku Daviti ko Hevirone. Va sapuila Soma vati, Utue wa Isivosiete, omõla a Saulu, unyali wove una wa sanda sanda omuenyo wove, haiwu. Etaili Yehova wa fetuluinya eci ca linga Saulu lomãla vaye ku cime cange Soma.

⁹ Daviti puãi wa kumbulula Rekava la manjaye Baana, omãla va Rimone u Berote, hati, Ndomo Suku una wa mopela kolohali viosi o kasi lomuenyo,

¹⁰ eci va sapuila vati, Saulu wa fa, kuenje va simile vati, Tu kasi loku u sapuila ondaka yu sanjuisa, oco ndo kuata, ndo pondela vo Cikilage. Oyo muẽle onima ndo wihila ondaka a sapuila.

¹¹ Eci nga ka ca kãlele vali enene, okuti olondingaivi via ipaila ukuesunga vonjo yaye, pula waye muẽle? Osonde yaye hẽ, si yi sĩliha povaka ene? Lene hẽ, siu takisi kilu lieve?

¹² Daviti wa tuma akuenje vaye kuenje va va ipaya. Va va teta ovaka lolomai. Va va pateka konele yetangi ko Hevirone. Utue wa Isivosiete puãi vo kenda veyambo lia Avinere vo Hevirone.