II SAMUELE 3 - Embimbiliya - Bíblia Sagrada em Umbundu

¹ Ovita pokati kepata lia Saulu lepata lia Daviti via kala ño-o osimbu. Daviti wamamako kunene lolohõlo, epata lia Saulu puãi lia tepoloka ño-o.

² Omãla valume va Daviti va citiwila vo Hevirone. Nuñulu yaye Aminone, nyoho yaye Ahinoama u Yesirele.

³ Wavali onduko yaye Cileba, nyoho yaye Avigaile, wa kala ukãi wa Nabala u Karimele. Watatu onduko yaye Avisalome, nyoho yaye Mahaka omõla a Talima, Soma ya Gesiuri.

⁴ Wakuãla, onduko yaye Adoniya, nyoho yaye Hagiti. Watãlo onduko yaye Sefatiya, nyoho yaye Abitala.

⁵ Wepandu, onduko yaye Itirema, nyoho yaye Egila, ukãi wa Daviti. Ovo muẽle omãla va Daviti va citiwila vo Hevirone.

⁶ Osimbu pa kala ovita pokati kepata lia Saulu lepata lia Daviti oco Avinere wa talavaya calua oku kolisa omangu yaye vonjo ya Saulu.

⁷ Saulu wa kala lukama, onduko yaye Risipa, eye omõla a Aya. Isivosiete wa pula Avinere hati, Nye wa endela kukama wa tate?

⁸ Avinere yu wa temela calua olondaka via Isivosiete, hati, Ame nga ndutue wombua? Etaili lilo ñasi loku vumba locili epata lia so yove Saulu kuenda vamanjaye lakamba vaye, haime sia ku ecele peka lia Daviti, haimo o mindika londaka yoku enda kukãi?

⁹ Suku a ci lingevo Avinere loku vandekako nda si lingila Daviti ndeci Yehova a likuminya laye,

¹⁰ okuti oku sondolola uviali kepata lia Saulu loku tumbika Daviti ha viala ofeka ya Isareli leyi ya Yuda tunde ko Dani toke ko Bereseva.

¹¹ Oco Isivosiete ke tẽlele vali oku kumbulula Avinere momo wo yokokela.

¹² Avinere wa tuma olomunga ku Daviti Hevirone hati, Ofeka yi tiama kulie? Lisila lame ocisila kuenje eka liange li ku kuatisa oku tiamisa va Isareli vosi kokuove.

¹³ Daviti hati, Ciwa, ndi lisila love ocisila, puãi cimosi lika hu kisika okuti ku moli ocipala cange te tete wa nenela Mikale, omõla a Saulu, eci wiya.

¹⁴ Daviti wa tuma olomunga ku Isivosiete, omõla a Saulu, hati, Nyihe ukãi wange Mikale una nda kuelele locita coviyuvuluila via va Filisiti.

¹⁵ Isivosiete wa tuma oku wupa ku veyaye Paliti, omõla a Laisi.

¹⁶ Veyaye puãi wa kuamako loku lila toke va pitila ko Bahurime. Avinere wo sapuila hati, Kuende, tiukila. Oco wa tiukila.

¹⁷ Avinere wa vangula lakulu va va Isareli hati, Osimbu yalua vu kasi loku yongola okuti Daviti o linga Soma yene.

¹⁸ Cilo, ci lingi muẽle, omo Yehova wa likuminya la Daviti hati, Leka liukuenje wange Daviti mopela omanu vange va Isareli peka lia va Filisiti lo peka liovanyali vavo vosi.

¹⁹ Avinere haico a vangulavo la va Benjamini. Kovaso yaco Avinere wa enda ko Hevirone, oku sapuila Daviti cosi va Isareli la va Benjamini va sima okuti oco ciwa oku ci linga.

²⁰ Eci Avinere kumue lakũi avali kalume veya ku Daviti ko Hevirone oco Daviti wa telekela Avinere lalume eya lavo okulia kua fina.

²¹ Avinere wa sapuila Daviti, hati, Cilo yapa kua ca. Ngenda. Hongolola va Isareli vosi ha veya ku cime cange Soma okuti va lisila love ocisila, love o viala cosi ci yongola utima wove. Oco Daviti wa liusika la Avinere kuenje Avinere wa enda lombembua.

²² Kotembo yaco muẽle kueya Yoava lakuenje va Daviti. Va tiuka koku punda, veya lolohute vialua. Avinere puãi ka kaile la Daviti ko Hevirone omo wo tuma kuenje wa enda lombembua.

²³ Eci Yoava lava va kala laye veya oco va sapuila Yoava vati, Avinere, omõla a Nere, weyile ku Soma, Soma wo weca kuenje wa enda lombembua.

²⁴ Oco Yoava wa enda ku Soma hati, Wa linga ndati? Siti Avinere weyile kokuove. Wo wecela nye okuti wa enda?

²⁵ Wa kuliha okuti Avinere, omõla a Nere, weyilile oku ku liaña loku kũlĩhisa olongenda viove viosi kuenda cosi o linga.

²⁶ Eci Yoava a tunda koku vangula la Daviti oco wa tuma olomunga oku landula Avinere. Vo sanga ketangi lia Sira kuenje veya laye. Daviti puãi ka ci kũlihile.

²⁷ Eci Avinere a pitila ko Hevirone oco Yoava wo wambata, wa enda laye konele yombundi ndu o yongola oku vangula laye uyombeki. Kuenje oko haiko o tomẽla vimo okuti wa fa, wa fila osonde ya Asahele manja a Yoava.

²⁸ Eci Daviti a ci yeva wa popia hati, Ame luviali wange, tumãla vamale kovaso a Yehova otembo ka yi pui. Tua pua eko liosonde ya Avinere, omõla a Nere.

²⁹ Li kale vetimba lia Yoava lepata liosi lia soyaye. Lepata lia Yoava lalimue eteke ka li ka kambe umue ukuakupita osonde, pamue umue ukuavilundu, pamue umue ukuakupota, pamue umue o fa losipata, pame umue wa kamba okulia.

³⁰ Oco Yoava la manjaye Avisiai va ipaya Avinere momo eye wa ipaile manjavo Asahele vocilunga ca Giveone.

³¹ Daviti wa popia la Yoava lomanu vosi va kala laye, hati, Toli uwalo wene. Wali ovikelei. Lili Avinere. Soma Daviti layevo wa kuama kocikalavekua caco.

³² Va kenda Avinere vo Hevirone. Soma layevo wa kala keyambo lia Avinere kuenje wa lila ca lua. Omanu vosi va lilavo.

³³ Soma wa lila Avinere, hati,

³⁴ Ca sunguluka nga Avinere oku fa ndeveke? Ovaka ove ka a kutiwile. Olomãi viove ka va vi kapele vukumbi. Wa kupuka ño ndumue wa kupuiwa lolondingaivi. Omanu vosi yu vo lila vali.

³⁵ Omanu vosi veya ku Daviti. Vo pilika oku lia ombolo osimbu kuli utanya. Daviti puãi wa lisinga hati, Suku a ci niuwile loku vandekako nda ndi maha kombolo pamue cimue cikuavo toke ekumbi liñila.

³⁶ Omanu vosi va ci mõla kuenje ca va sanjuisa ndeci cosi ca linga Soma ca sanjuisa omanu.

³⁷ Oco omanu vosi, la va Isareli vosi, eteke liaco va kũliha okuti oku ipaya Avinere ka kua tundile kocipango ca Soma.

³⁸ Soma wa popia lakuenje vaye hati, Ka wa kũlĩhili okuti ombiali yimue haeye omanu unene wa fa etali vo Isareli?

³⁹ Lame etali nda hongua ndaño nda wavekua okuti ndi Soma. Omanu ava, omãla va Ceruya, va muiya enene. Yehova a fetuluinye ondingaivi eci ca soka lũvi waye.