II SAMUELE 24 - Embimbiliya - Bíblia Sagrada em Umbundu

¹ Onyeño ya Suku ya wengukila vali va Isareli. Wa va tutuminyila Daviti hati, Kuende, ka tende va Isareli la va Yuda.

² Oco Soma wa popia la Yoava kuenda vakesongo vovita vana va kala laye hati, Kuendi, piti kapata osi a va Isareli tunde ko Dani toke ko Bereseva. Tendi omanu oco ñulihe omanu nda vañami.

³ Puãi Yoava wa popia la Soma, hati, Omanu vaco, nda vañami nda vañami, Yehova Suku yove a va luise ocita colonjanja. A ci linge osimbu cime cange Soma o kasi lomuenyo kuenje o ci mõla lovaso aye muẽle. Haimo lumue, eci ndeti oku ci linga, cime cange Soma wa sanjukilila nye?

⁴ Ondaka ya Soma puãi ya yula ondaka ya Yoava la vakesongo Oco Yoava la vakesongo vovita va tunda kovaso a Soma ha va tendi omanu va Isareli.

⁵ Va yoka Yordão. Va fetikila vo Aroere. Veya vimbo li kasi vokati kocimbota ca Gadi. Va enda ko Yaseri.

⁶ Kovaso yaco veya ko Gileada loko Kadesi vofeka ya va Hiti. Vamako toke ko Dani. Oku tunda ko Dani va ñuala ohondo toke va pitila ko Sidono.

⁷ Veya kombonge ya Turo lokovaimbo osi a va Hivi la va Kanana. Va enda ko Sul ya Yuda kuenje va pitila ko Bereseva.

⁸ Eci va ñuala ofeka yosi oco veya ko Yerusalãi. Ungende waco wosi va wenda olosãi ecea kakui avali koloneke.

⁹ Yoava yu wa sapuila Soma okutendiwa kuaco kuomanu. Vo Isareli mua kala ovita ecẽlãla kolohũlũkãi viasualali vakualosipata. Vo Yuda asualali va soka ovita vitãlo kolohũlũkãi.

¹⁰ Kovaso yoku tenda omanu puãi Daviti co vala vutima. Daviti wa popia la Yehova, hati, Eci nda linga ca lueya calua. Cilo puãi a Yehova, ñasi loku likutilila kokuove. Ame ndukuenje wove. Ngecele ongole yange. Omo ocili eci nda linga cuveke.

¹¹ Eci Daviti a pasuka omẽle oco ondaka ya Yehova yeya kuprofeto Gadi, ondunguli ya Daviti, yiti,

¹² Kuende, ka sapuile Daviti, huti, Ca popia Yehova ceci, hati, Hu tendela ovina vitatu. Pokati kavio nolapo cimosi okuti oco hu lingila.

¹³ Oco Gadi weya ku Daviti, wo ci sapuila. Wa popia laye hati, Nolapo. Ofeka yi kala lelambu anyamo atatu ale, ele ove o tila ovanyali vove ha va ku landula olosai vitatu, ele pamue vofeka mu kala efengi oloneke vitatu? Sokolola. Teta ove muẽle onimbu. Sapuileko ndomo ñumbulula u wa numa.

¹⁴ Oco Daviti wa popia la Gadi hati, Nai apa pa tatama enene. Hise oku fila povaka a Suku omo ohenda yaye yalua, ame oku fila povaka omanu hacoko.

¹⁵ Oco Daviti wa nola efengi. Kuenje koloneke vioku ungula otiliku oco pokati komanu peya efengi. Ekundu liaco lia nyõla akui epanduvali kolohũlũkãi vialume, tunde ko Dani toke ko Bereseva.

¹⁶ Eci ungelo waco wolõla eka liaye ha nyõli Yerusalãi oco Yehova wa livela nda ka tumile ohali yaco. Wa popia lungelo wa kala pokati komanu oku va nyõla, hati, Kua pua. Liwekapo. Kotembo yaco ungelo wa kala kocisaselo ca Arawuna u Yevusi.

¹⁷ Eci Daviti a mõla ungelo wa kala loku nyõla omanu oco wa popia la Yehova hati, Ame muẽle nda lueya haime nda linga ekandu. Puãi olomeme evi hẽ nye via linga? Eka liove li mbete ame, li vetevo onjo ya tate.

¹⁸ Eteke liaco Gadi weya ku Daviti. Wa popia laye hati, Lamana, tungila Yehova utala kocisaselo ca Arawuna u Yevusi.

¹⁹ Oco, londaka ya Gadi, Daviti wa lamana ndeci ca tuma Yehova.

²⁰ Eci Arawuna a vanja wa mõla Daviti lakuenje vaye vovo, va kasi loku lamanela kokuaye. Arawuna wa tunda, wa wila posi kovaso a Soma, wo fendela.

²¹ Kuenje Arawuna wa pula hati, Vo kuku veyilila nye kokuange? Daviti wa kumbulula hati, Ndeyilila oku landa ocisaselo cove si tungilamo Yehova utala oco ekundu limũhe pokati komanu.

²² Oco Arawuna wa popia la Daviti hati, A Kuku, cosi ca ku sunguluka okuti oco o lumba tambula ño. Olongombe viocilumba coku pia elisi vievi. Ovikuata vioku sasa lolokanga violongombe vi linga olohui, laviovo vievi.

²³ Viosi evi, a Kuku, vievi. Ame ndi Arawuna nda vi eca kokuove. Arawuna wa popiavo la Soma hati, Yehova Suku yove a ku sanjukile.

²⁴ Soma puãi wa popia la Arawuna hati, Oco hacoko te ndi vi landa kokuove loku vi fetela. Si tava oku lumbila Yehova Suku cimue nda tambula ocali okuti ka ca meselele. Oco Daviti wa landa ocisaselo lolongombe. Wa feta akui atãlo kolosiekele viopalata.

²⁵ Kuenje Daviti wa tungilako utala wa Yehova. Wa lumbilako ocilumba coku pia elisi leci combembua. Oco Yehova wa yeva kolohutililo vioku likutilila ofeka. Kuenje vi Isareli ekundu lia imũha.