II SAMUELE 23 - Embimbiliya - Bíblia Sagrada em Umbundu

¹ Olondaka via sulako via Daviti, vievi: Olondaka via Daviti, omõla a Jese. Olondaka viomunu wa kemalisua, haeye ombuavekua ya Suku ya Yakoba, haeye onjimbi ya va Isareli, o kuete elaka lia posoka.

² Espiritu lia Yehova li popia, ame ndinga Mitakati. Ondaka yaye yi kasi kelimi liange.

³ Suku ya Isareli wa popia. Ewe lia Isareli lia popia lame, liti, Ukuakuviala omanu lesunga, ukuakuviala lusumba wa Suku,

⁴ eye o va tuila ndutanya womele, ndutanya womele eci ka kuli alende omo ombela ya ca, kuenje posi pa tunda osungu yowangu.

⁵ Suku nga, ka tumãlisile hũ epata liange? Momo wa lisila lame locisila ka ci pui, haico cocili kuenje ca suisapo ovina viosi. Eye nga, ka tẽlisa onjongole yange yosi? Ka kala hũ oñuatisi yange?

⁶ Omanu va likala Suku va lisoka lolosongo vinasiwa. Oku va kuata leka ka ci tava.

⁷ Puãi u o va kuata wa limãlehisa locivela lonjelia, kuenje va pia elisi vondalu.

⁸ Olonduko viasualali va Daviti vana va velapo kutoi, vievi: Yoseve—basievete u Takimoni, eye tete ku vatatu vaco. Wa ipaya ovita ecẽlãla eteke liongongo lonjelia yaye.

⁹ Wavali pokati ka vatatu vaco eye Eleasara, omõla a Dodo u Ahiho. Eye wa kala la Daviti eci va vayelele va Filisiti vongolokelele ocilunga kuenje va Isareli va tila.

¹⁰ Eye wa katuka kuenje wa nyõla va Filisiti toke eka liaye lia kava, kuenje eka liaye lia kakatela kosipata. Eteke liaco Yehova wa yula enene. Asualali vo kuama lika oku punda ovina viava va fa.

¹¹ Watatu yaco eye Siama, omõla a Age u Harari. Va Filisiti vongolokelele ko Lehi. Kua kala epia liohale. Asualali va tila va Filisiti.

¹² Eye puãi wa talama pokati kepia. Wa li yakela kuenje wa ipaya va Filisiti. Yehova yu wa yula enene.

¹³ Pokati kakui atatu ka vakesongo pa tunda vatatu. Kotembo yelombolo vaile ku Daviti kocikolo ca Adulama. Vocimbota ca Refaimi mua kala ocilombo cocitundo cimue ca va Filisiti.

¹⁴ Daviti wa kala vocikolo. Ocitundo ca va Filisiti ca kala ko Beteleme.

¹⁵ Daviti wa livelele calua hati, Nda ca tavele umue oku nyuisa ovava a tunda ko Beteleme, vocisimo ci kasi kombundi! …

¹⁶ Oco vatatu vaco vana va tunda, va papuila vocilombo ca va Filisiti. Va tapa ovava vocisimo ca kala kombundi vo Beteleme. Va a nena ku Daviti. Eye puãi ka tavele oku a nyua. Wa a pesela kovaso a Yehova,

¹⁷ hati, A Yehova, ci pite kupãla lame oku ci linga. Nyua nga osonde yomanu vaile lomuenyo peka? Oco ka tavele muẽle oku a nyua. Ovina evi ovio via lingile vana vatatu vakuotõi.

¹⁸ Avisiai, manja a Yoava, omõla a Ceruya, eye usongui wakui atatu. Eye wa kuata konjelia yaye kuenje wa ipaya ovita vitatu kalume. Wa si oku lisoka la vatatu vaco.

¹⁹ Pokati kakui atatu eye wa linga usongui. Ku vatatu vaco puãi ka pitilileko, ka lisokele lavo.

²⁰ Benaya u Kavasele, omõla a Yehoyada, haeye ukuavilinga via kemãla, layevo onõi. Wa ipaya ovindululu vivali via Moavi. Wa ipayavo ohosi ya kala vocitunu cimue. Eteke liaco kua lokele neve.

²¹ Wa ipayavo u Egito umue wa posoka enene. U Egito waco wa kala lonjelia peka. Benaya wa enda kokuaye lohunya peka. Wa nyeha onjelia peka liu Egito kuenje wo wipaya lonjelia yaye muẽle.

²² Ovio ovina via linga Benaya, omõla a Yehoyada. Wa si oku lisoka la vatatu vaco.

²³ Koku lisoka lakui atatu wa pitila. Koku lisoka la vatatu ka pitilile. Daviti wo nola ha lingi usongui wolondavululi viaye.

²⁴ Asahele, manja a Yoava, wa kala umue kovakui atatu aco; Elehanana, omõla a Dodo u Beteleme;

²⁵ Siama u Haroda; Elika u Haroda;

²⁶ Helesi u Paliti; Ira, omõla a Ikesi u Tekoa;

²⁷ Aviesere u Anatote; Mevunai u Husiati;

²⁸ Salomone u Ahoha; Maharai u Netofa;

²⁹ Heleve, omõla a Baana u Netofa; Itai, omõla a Rivai u Givea komãla va Benjamini;

³⁰ Benaya u Piratoni; Hidai kotundui tua Gayasi;

³¹ Avilavoni u Aravati; Asamaveti u Bahuri;

³² Eliava u Sialavoni; omãla va Yasiene; Yonatão;

³³ Siama u Herari; Ahima, omõla a Siarara u Arara;

³⁴ Elifelete, omõla a Ahasavi, omõla a Maakati, omõla a Maakati; Eliama omõla a Ahitofele u Giloni;

³⁵ Hesero u Karimele; Parari u Arava;

³⁶ Igala, omõla a Natana u Sova; Bani u Gadi;

³⁷ Seleki u Amoni, Naharai u Beeroti, vakuakuambataela Yoava omõla a Ceruya, ovimaleho;

³⁸ Ira u Itiri; Gareve u Itiri;

³⁹ Uriya u Hiti; vosi akui atatu kepanduvali.