II SAMUELE 22 - Embimbiliya - Bíblia Sagrada em Umbundu

¹ Daviti wa sovuila Yehova olondaka viocisungo eci eteke Yehova wo popela peka liovanyali vaye kuenda peka lia Saulu.

² Hati, Yehova eye ewe liange, haeye ocikolo cange lonjovoli yange.

³ Eye Suku yange, haeye ewe liange, kokuaye oko mbunda. Eye otevele yange haeye ombinga yeyovo liange. Eye ocikolo cange haeye ociwundilo cange. Eye upopeli wange. O mopela kungangala.

⁴ Mbilikiya Yehova, eye wa posokela esivayo. Kuenje mopelua kovanyali vange.

⁵ Akimba okufa a sitika. Andunde evĩho a ndingisa usumba.

⁶ Ovikolo viokufa via ñuala. Olonjanjo viokufa via misukila.

⁷ Kokusakalala kuange nda vilikiya Yehova. Nda liyula ku Suku yange. Wa yevela ondaka yange vonembele yaye. Uteto wange wa yevala kovatui aye.

⁸ Opo ongongo ya lisenga ya luluma. Oviseveto viovailu via luluma haivio via lisenga momo onyeño yaye yalua.

⁹ Kovanyulu aye kua tunda owisi. Komela kua tunda ondalu yi lialia. Kokuaye kua mõleha ovilienge via tunda kondalu ya taima.

¹⁰ Wa petamisa ovailu kuenje wa loka. Owelema wowĩ wa kala vemehi liolomãi viaye.

¹¹ Wa endela ko Keruvi kuenje wa pãlãla. Wa muiwa kavava ofela.

¹² Owelema wo sĩkĩlila kuenje alende e yuka lovava o-o a linga ombalaka yaye.

¹³ Vocinyi ca kala kovaso aye mua mõleha ovilienge via tunda kondalu ya taima.

¹⁴ Kilu Yehova wa lemila. Tõlo wa popia ondaka yaye.

¹⁵ Eye wa imba ovisongo viaye, wa va sandula. Wa liakula kuenje wa va sakalaisa.

¹⁶ Oco posi yovava pa mõleha. Loviseveto violuali via lembuluka lokulemẽla kuove, lofela yokufuima kuanyũlu ove.

¹⁷ Wa ngoluila eka liaye tunde kilu. Wa ñuata. Wa njupa vovava alua.

¹⁸ Wa mopela kunyali wange wa pama, kuava va suvuka momo va miãla kongusu.

¹⁹ Va mbuila veteke liohali yange, Yehova puãi wa ndingila onjaka.

²⁰ Wa mitisa oku kunene. Wa mopela omo a sanjukila.

²¹ Yehova wa muisa ndesunga liange. Wa niuwila ndokuyela kuovaka ange.

²² Momo ndaendaila volonjila via Yehova. Sia lueyele loku tunda ku Suku yange.

²³ Olombilo viaye viosi nda vimba ovaso. Sia sile ovihandeleko viaye.

²⁴ Nda pua eko kovaso aye. Nda liuvika kevĩho.

²⁵ Oco Yehova a muisa ndesunga liange, ndokuyela kuange kovaso aye.

²⁶ Kukuacili o linga ukuacili. Ku wa pua eko o linga ndu wa pua eko.

²⁷ Ku wa yela o yela. Ku wa puiya o puiya.

²⁸ O popela ava va likapa kutito. Ovaso ove puãi a vanja vakuepela oku va sepuisa.

²⁹ Ocili ove wuvela yange, a Yehova. Suku yange o nuila vowelema.

³⁰ Ocili, nda ñasi love namalala lolohoka. La Suku yange somboka ocimbaka.

³¹ Suku yaco, ovilinga viaye via sunguluka. Ohuminyo yaye yi lemuluiwa. Eye otevele ya vosi vo kolela.

³² Elie Suku nda ha Yehovako? Elie ewe nda ha Suku yetuko?

³³ Suku yaco eye ocikolo cange. Wa sunguluisa onjila yange.

³⁴ Wa sokisa olomãi viange levi viohoha. Wa nalamisa ciwa kolomunda.

³⁵ Ikisa ovaka ange oku yaka, okuti ovoko ange a lumbilila ohonji yosipi.

³⁶ Wa nyiha otevele yeyovo liove. Okuomboka kuove kua muisa unene.

³⁷ Wa ngendisa ohandoka. Olomãi viange ka via lipalananelepo.

³⁸ Nda landula ovanyali vange loku va nyõla. Sia tiukileko toke va liwa.

³⁹ Nda va lia. Nda va toma olusole okuti ka va katukile vali. Va kupukila kolomãi viange.

⁴⁰ Momo ove wa nyiha ongusu yoku yaka vocilunga. Wa metamisila ava va ñatukila.

⁴¹ Ovanyali vange wa va imbisa kokuange olonyima, ndaño ava va suvuka, kuenje nda va nyõla.

⁴² Va vanja oko loko puãi ka kua kaile u o va popela. Va vilikiya Yehova, eye puãi ka va kumbuluile.

⁴³ Nda va puma toke va soka ndoneketela yo posi. Nda va kandula. Nda va liata ndonata volonjila.

⁴⁴ Ove wa mopela koku yaka lomanu. Wa ndingisa utue wolofeka. Omanu sia kũlihile va mbumba.

⁴⁵ Vakualofeka veya va limbondela. Tuli va njeva va mokola.

⁴⁶ Vakualofeka va senguluka. Va tunda kovikolo viavo loku luluma.

⁴⁷ Yehova yu lomuenyo. Ewe liange li pandiyiwe! Suku yange a kemainyiwe! Eye ewe lieyovo liange.

⁴⁸ Eye Suku wa fetuluinyila. Wa sambisa kokuange olofeka.

⁴⁹ Wa mopela kovanyali vange. Wa ñemalisa kovaso ava va ñatukila. Wa mopela kuava va njakisa.

⁵⁰ Oco hu panduila, a Yehova, pokati kolofeka. Njimbila onduko yove ovisungo viesivayo.

⁵¹ Wa muisa osoma yaye okuyula kualua. O sole ombuavekua yaye locisola ka ci pongoloka. O sole laco Daviti lombuto yaye olotembo viosi.