II SAMUELE 21 - Embimbiliya - Bíblia Sagrada em Umbundu

¹ Kovava a Daviti kua kala onjala anyamo atatu a likuama. Daviti yu wa pula ku Suku. Suku wo kumbulula hati, Ku Saulu lonjo yaye kuli ongole yosonde omo a ponda va Giveone.

² Oco Soma wa kovonga va Giveone. Ca kala okuti va Giveone ha va Isareliko puãi vakuacisupe cina ca va Amori. Kuenje ndaño va Isareli va likuminyile oku va supisapo haimo Saulu wa setekele oku va ponda omo ombili yaye yoku tata va Isareli la va Yuda oyo yalua.

³ Daviti wa pula va Giveone hati, Ndu lingili nye? Nuvika ndati ekandu okuti ene vu pandula ocipiñalo ca tunda ku Yehova?

⁴ Va Giveone vo kumbulula vati, Eci ci kasi pokati ketu la Saulu lonjo yaye ka ci muiwa lulu pamue opalata. Kuenda vali, etu oku ponda umue u Isareli ka tu ci tẽla. Eye hati, Nye vu yongola okuti oco ndu lingili?

⁵ Va sapuila Soma vati, Tuihe omãla valume epanduvali vulume una wa tu nyõla haeye wa sokiya oku tu ponda. Ka yonguile okuti tu kuata ocitumãlo vofeka yosi ya va Isareli.

⁶ Omãla vaco tu va nyoñamisa kovaso a Yehova komunda ya Yehova vo Giveone. Soma wa kumbulula hati, Ndu wihi lavo muẽle.

⁷ Soma puãi wa supisapo Mefivosiete, omõla a Yonatão, omõla a Saulu. Wo supisapo omo ocisila ca Suku ca kala pokati kavo, okuti pokati ka Daviti la Yonatão, omõla a Saulu.

⁸ Soma wa nyañula omãla vavali valume vana Risipa, omõla a Aya, a cita la Saulu. Olonduko viavo Amoni la Mafivosiete. Wa nyañulavo omãla vatãlo valume vana Meraba, omõla a Saulu, a cita la Adueli, omõla a Barisilai u Mehola.

⁹ Wa va eca ku va Giveone. Va Giveone va va nyoñamisila komunda kovaso a Yehova. Epanduvali liavo lia fila pamuamue. Va pondiwa oloneke viatete vielombolo liosevata.

¹⁰ Risipa, omõla a Aya, wa nyañula ocikẽlei. Wa ci liyalela kewe, tunde kefetikilo lielombolo toke ombela yeya ya va lokela. Kutanya wa vinga olonjila. Kuteke wa lupula ovinyama viovusenge.

¹¹ Eci va sapuila Daviti eci ca linga Risipa, omõla a Aya, ukama wa Saulu,

¹² oco Daviti wa enda kalume va Yavesi Gileada. Ovo va ivile ocivimbi ca Saulu leci comõlaye Yonatão. Va vi ivile kocila ca Betesani, kuna va Filisiti va va nyoñamisile eteke va Filisiti va ponda Saulu vo Giliboa Daviti wa enda kokuavo, wa tambula akepa a Saulu lakepa omõlaye Yonatão.

¹³ Wa nena akepa a Saulu lakepa omõlaye Yonatão. Va kongelavo akepa a vana va nyoñamisua.

¹⁴ Va kenda akepa a Saulu la-a omõlaye Yonatão veyambo lia soyaye Kisi, vo Siela, vofeka ya va Benjamini. Va linga cosi ca tuma Soma. Kovaso yaco Suku wa yeva kolohutililo vioku likutilila ofeka.

¹⁵ Va Filisiti va liyaka vali la va Isareli. Daviti lakuenje vaye vosi va enda oku liyaka la va Filisiti. Daviti wa tepuluka calua ongusu.

¹⁶ Umue kepata liovindululu, onduko yaye Isivivenove, wa sima oku ipaya Daviti. Okulema kuonjelia yaye kua soka lovita vitatu violosiekele viosipi. Vombunda wa limalehisa osipata yokaliye.

¹⁷ Avisiai, omõla a Ceruya, weya oku kuatisa Daviti. Wa kuata u Filisiti kuenje wo wipaya. Oco alume va Daviti va likuminya vati, Lalimue vali eteke wenda letu kocilunga sanga wima ondalu ya va Isareli.

¹⁸ Kovaso yaco kueya vali oku yaka la va Filisiti vo Govi. Sibekãi u Husiati wa ipaya Safi ukuepata liovindululu.

¹⁹ Kueya vali oku yaka la va Filisiti vo Govi. Elihanana, omõla a Yare Oregimi u Beteleme, wa ipaya Goliata u Giti. Ocikundo conjelia yaye ca soka nduti womakina yoku tuta.

²⁰ Kueya vali ovita. Onjanja yilo via kala vo Gati. Omu mua kala ulume umue ocindululu. Wa kala lovimuini epandu keka leka, lovimuini epandu komãi lomãi. Viosi via tẽla akui a vali la vikuãla. Eye wa tunda kepata liovindululu.

²¹ Eci a sepula va Isareli oco Yonatão, omõla a Simei, manja a Daviti, wo wipaya.

²² Kakuãla kavo va tunda kepata liovindululu ko Gati. Va pondiwa leka lia Daviti lakuenje vaye.