II SAMUELE 20 - Embimbiliya - Bíblia Sagrada em Umbundu

¹ Kua kala umue ocimamohe, onduko yaye Sieva, eye omõla a Bikiri haeye u Benjamini. Eye wa sika olumbeta hati, Etu ka tu kuete cimue la Daviti. Komõla a Jese ka tu kuete ocipiñalo. Oco, ene a va Isareli, kuendi, omunu konjo yaye, omunu konjo yaye.

² Oco va Isareli vosi va tunda ku Daviti. Va kuama Sieva, omõla a Bikiri. Va Yuda puãi va kuama muẽle Soma tunde ko Yordão toke ko Yerusalãi.

³ Daviti va pitila konjo yaye ko Yerusalãi. Lakama vaye ekui, vana a sile oku tata onjo, wa va yikila vonjo yimue yavo muẽle, kuenje wa kapako ondavululi. Wa va tekola puãi ka endele kokuavo. Oco va kala ño-o ndovimbumba toke kokufa.

⁴ Soma wa popia la Amasa hati, Ngongoluila alume va Yuda vosi. Ci lingiwe muẽle voloneke vitatu. Love, kalakovo.

⁵ Kuenje Amasa wa enda oku ongolola va Yuda. Puãi wa lenda, ka malele votembo Soma o tukuila.

⁶ Oco Daviti wa popia la Avisiai hati, Sieva, omõla a Bikiri, o laika oku tu nyõla ca velapo okuti ndomo Avislome a tu lingile ci sule calua. Oco, akuenje vange vava, ko landule sanga o yula ovaimbo amue a linga ovikolo kuenda o tu linga cĩvi.

⁷ Oco Avisiai wa katuka kumosi la Yoava la va Kereti la va Peleti kuenda asualali vamue vosimbu. Va tunda ko Yerusalãi, va landula Sieva, omõla a Bikiri.

⁸ Eci va pitila kewe linene li kasi vo Giveone oco Amasa weya, wa tokeka lavo, Yoava wa wala uwalo wesualali. Wa itika uvia vombunda. Kuvia kua kala ocilalo losipata yaco. Eci a kala loku enda oco osipata ya somoha.

⁹ Yoava yu wa popia la Amasa hati, Wa kolapo, a manjange? Oco leka liondio Yoava wa kuata volonjele via Amasa ho sipula.

¹⁰ Amasa ka muile osipata ya kala peka lia Yoava. Yoava wo toma layo vimo kuenje ovãla aye a sukumuhila posi. Ndaño onjanja yavali ko tomele. Amasa wa fa. Yoava la Avisiai manjaye va landula Sieva, omõla a Bikiri.

¹¹ Umue pokati kalume va Yoava weya, wa talama konele ya Amasa, hati, Wosi o sole Yoava loku tiama ku Daviti a kuame Yoava.

¹² Amasa lopo yu vonjila, wa pekela vosonde yaye. Wosi wo mõla poku pita wa talama. Oco eci ulume a mõla ndomo vosi va talama oco wa yelula Amasa vonjila, wo tuala kusenge, kuenje wo wimba onanga.

¹³ Eci opiwa vonjila oco omanu vosi va kuama Yoava oku landula Sieva, omõla a Bikiri.

¹⁴ Sieva wa pita kovaimbo apata osi a va Isareli toke wa pitila ko Aliele ko Betimaka. Va Biriki vosi vongoloka kuenje vo sindikila toke wa iñila.

¹⁵ Noke alume vosi va Yoava veya ko Aliele ko Betimaka kuenje vo sitikilamo. Va lundikila imbo elundu. Okulepa kualio kua lisoka locimbaka cavali ca ñuala imbo. Va tuna tuna ocimbaka ha va ci nyõli.

¹⁶ Kotembo yaco ukãi umue ukualondunge wa kala vimbo wa vilikiya hati, Yeveleli, yeveleli, sapuili Yoava hoti, Tava kukãi o. O yongola oku vangula love.

¹⁷ Oco Yoava weya ocipepi laye. Ukãi wo pula hati, Ove he Yoava ale? Eye hati, Ame. Oco ukãi wa popia laye hati, Yevelela kolondaka viange. Yoava hati, Ñasi loku yevelela muẽle.

¹⁸ Ukãi wa popia hati, Kosiahũlu va popia popia vati, Va pule ko Aliele kuenje ondaka yi pua.

¹⁹ Ame ndu Isareli, nda tiama kuava va livela ombembua locili. Ove o livela oku nyõla imbo li kasi ndonjali yukãi ku va Isareli. Nye o yonguila oku nyõla ocipiñalo ca eciwa la Yehova?

²⁰ Yoava wa kumbulula hati, Ci pite kupãla ame. Ci pite muẽle kupãla okuti ame nyõla Pamue ñundula.

²¹ Haciliko. Puãi u Efarimi umue, onduko yaye Sieva, eye omõla a Bikiri, wa ñualelapo Soma. Oco weci kokuetu kuenje ngenda muẽle, si sakalaisa vali imbo. Oco ukãi wa popia la Yoava hati, Utue waye tu ku u wimbila kilu liocimbaka.

²² Ukãi yu lolondunge viaye wa enda komanu vosi. Va teta utue wa Sieva, omõla a Bikiri, kuenje vo wimbila Yoava. Eye yu wa sika olumbeta kuenje kimbo va tundako, vosi va tiukila, omunu konjo yaye, omunu konjo yaye. Yoava wa tiukila ku Soma, ko Yerusalãi.

²³ Kovaso yaco Yoava wa linga kesongo liovita viosi via va Isareli. Benaya, omõla a Yehoyada, eye wa linga kesongo lia va Kereti la va Peleti.

²⁴ Adorama eye wa songuila olongamba. Yehosafata, omõla a Ahilude, eye wa kala ulombololi.

²⁵ Sieve eye wa kala usonehi. Sadoke la Aviatare ovo ovitunda.

²⁶ Ira u Yari eye wa kala ukulu wa Soma Daviti.