II SAMUELE 2 - Embimbiliya - Bíblia Sagrada em Umbundu

¹ Kovaso yaco Daviti wa pula Yehova hati, Ame hẽ, ngenda kovaimbo amue a va Yuda ale? Yehova wo kumbulula hati, Kuende. Daviti yu wa pula hati, Kimbo lipi ngenda? Hati, Ko Hevirone.

² Oco Daviti wa endako, eye lakãi vaye vavali, Ahinoama u Yesirele, kuenda Avigaile wa kala ukãi wukuakuenda Nabala, u Karimele.

³ Kuenje Daviti wa enda lalume va kala laye, omunu lonjo yaye, omunu lonjo yave. Va tunga vombala ya Hevirone,

⁴ oko alume va Yuda veya, kuenje va waveka Daviti ha lingi osoma yepata lia Yuda. Eci va sapuila Daviti okuti va Yavesi Gileada ovo va kenda Saulu,

⁵ oco Daviti wa tuma olomunga ku va Yavesi Gileada hati, Suku a vu sumuluise omo wa lekisi ocisola ndoco ku cime cene Saulu kuenje wo kendi.

⁶ Oco Suku o lekisi ene ocisola caye ka ci pongoloka locili caye ka ci pui. Lamevo ndu lingi eci ciwa omo ene wa lingi eci ciwa.

⁷ Oco ovaka ene a pame. Kolisiko, omo cime cene, Saulu, wa fa kuenje epata lia Yuda lia mbuaveka okuti ndinga Soma yalio.

⁸ Avinere, omõla a Nere, kesongo liovita via Saulu, wa tambula Isivosiete, omõla a Saulu, weya laye ko Mahanayimi,

⁹ kuenje wo vialeka ha lingi Soma ya va Gileada, la va Asiuri kuenda va Yesirele la va Efarimi la va Benjamini kuenda va Isareli vosi.

¹⁰ Eye, Isivosiete, omõla a Saulu, wa kala lanyamo akui akuãla eci a fetika oku viala va Isareli. Wa viala anyamo avali. Epata lia Yuda puãi lia vumba Daviti.

¹¹ Daviti wa kala Soma ya va Yuda vo Hevirone anyamo epanduvali kolosãi epandu.

¹² Avinere, omõla a Nere, lakuenje va Isivosiete, omõla a Saulu, va tunda ko Mahanayimi, va enda ko Giveone.

¹³ Kuenje Yoava, omõla a Ceruya, lakuenje va Daviti va enda, va ñualehela lavo kociva, kuenje va tumalako, u konele eyi, u konele eyi.

¹⁴ Avinere wa popia la Yoava hati, Akuenje va katuke, va papalele kovaso etu. Kuenje Yoava hati, Va katuke.

¹⁵ Oco va katuka, va pita loku tendiwa. Va Benjamini la Isivosiete, omõla a Saulu, va tẽla ekui lavavali, lakuenje va Daviti va tẽla ekui la vavali.

¹⁶ Kuenje vosi va likuata kovitue, u kutue wunyali waye, u kutue wunyali waye, kuenje va liponda poku litoma losipata, u lunyali waye, u lunyali waye. Vosi va fila pamosi. Oco ocitumãlo caco ci kasi vo Giveone va ci tukula vati, Usenge wolosipata.

¹⁷ Locilunga eteke liaco ca kala lãvi calua. Avinere la va Isareli va yuliwa lakuenje va Daviti.

¹⁸ Omãla vatatu valume va Ceruya, Yoava la Avisiai kuenda Asahele, haiko va kala. Asahele kolupesi wa lisoka ndombambi.

¹⁹ Yu Asahale wa landula Avinere, kuenje koku landula Avinere, ka pongolokele ndaño kondio ndaño kepili.

²⁰ Avinere yu wa vanja konyima, wa pula hati, Ove hẽ Asahele? Wa kumbulula hati, Ame muẽle.

²¹ Avinere yu wa popia laye hati, Pambukila kondio pamue kepĩli, kuata ukuenje umue. U punda. Asahele puãi ka tavele oku liweka oku u kuama.

²² Avinere wa popia vali la Asahele hati, Liwekapo oku ñuama. Hu ipailela nye? Nda nda ci linga mbanja vali ndati huvove Yoava?

²³ Puãi ka tavele oku liweka oku u kuama. Oco Avinere wo toma ocinyimaime kuenje onjelia ya tunda olusole. Haipo a kupukila, wa fa. Kuenje vosi va pitila pana Asahele a kupukila haipo a fila va talama vilu.

²⁴ Puãi Yoava la Avisiai va landula Avinere. Pokuiñila kuekumbi veya kokamunda Ama, ka imba ovaso ko Gia, vonjila yenda kekalasoko lia Giveone.

²⁵ Va Benjamini va liongoluila konyima ya Avinere. Va linga ocitundo cimosi, va talama kilu liokamunda.

²⁶ Oco Avinere wa vilikiya Yoava hati, Osipata nga yi lialia ño hũ? Kua kũlĩhile okuti kefulilo liaco ku lula? Toke pi okuti omanu vove va landula ño vamanjove, love ku lemela pua, huti Liweki.

²⁷ Yoava yu wa kumbulula hati Ndeci Suku o kasi lomuenyo, nda kua popele nda omanu va landula ño vamanjavo toke omele.

²⁸ Oco Yoava wa sika olumbeta kuenje vosi va talama, ka va landuile vali va Isareli. Ndaño oku yaka, ka va yakele vali.

²⁹ Avinere lalume vaye va enda uteke wosi venyala lia Araba. Noke va yoka Yordão, va enda ende-e-e omele yosi, kuenje veya ko Mahanayimi.

³⁰ Yoava yu wa liweka oku landula Avinere. Eci ongolola omanu vosi oco wa limbuka okuti kakuenje va Daviti kua kamba ekui lecea kuenda vali Asahele.

³¹ Akuenje va Daviti puãi va ipaya ovita vitatu kakui epandu komanu va Benjamini lava va Avinere.

³² Va yelula Asahele kuenje vo kenda veyambo lia so yaye lia kala ko Beteleme. Yoava lalume vaye va enda uteke wosi kuenje koku ca oco va pitila ko Hevirone.