II SAMUELE 19 - Embimbiliya - Bíblia Sagrada em Umbundu

¹ Va sapuila Yoava, vati, Ota, Soma o kasi loku lila loku ivaluka Avisalome.

² Oco okuyula kueteke liaco kua pongoloka okulila kuomanu vosi, omo omanu va yeva okuti Soma o kasi loku lila omõlaye.

³ Kuenje eteke liaco omanu va iñila vimbo loku likupaka ndeci omanu va tila kocilunga va enda losõi.

⁴ Soma wa lituvika kocipala kuenje wa vilikiya londaka yalua, hati, Amõlange Avisalome. A Avisalome we! Amolange! Amolange!

⁵ Yoava wa iñila vonjo ya Soma, wa popia laye hati, Etali ove wa kutisa osõi akuenje vove vosi. Ovo va ku popela. Va popelavo ovimuenyo viomãla vove valume lava vakãi kuenda ovimuenyo viakãi vove lakama vove,

⁶ momo o sole ava va ku suvuka, kuenje o suvuka ava va ku sole. Etali wa ci lekisa cocili okuti vakesongo vove lakuenje vove ovo hacimueko kokuove. Etali nda limbuka okuti Avisalome nda wa kaile lomuenyo kuenje etu vosi nda tua file ove nda wa sanjuka.

⁷ Oco, cilo, katuka, kuende, ka vangule lombembua lasualali vove. Momo ndi lisinga la Suku, siti, Nda kuendi, ndaño omunu umosi ku siala laye uteke ulo. Kuenje nda oco, ũvi waco kokuove u piãla vali enene, okuti ũvi Wosi wa kala lawo tunde kutila wove toke u sule.

⁸ Oco Soma wa katuka, wa tumãla komangu yaye kombundi. Kuenje va sapuila asualali vosi, vati, Cilo Soma yo, wa tumãla kombundi. Oco asualali vosi veya kovaso a Soma. Omanu va Isareli va tilile ale, omunu konjo yaye, omunu konjo yaye.

⁹ Cilo omanu vosi vapata osi a va Isareli va kala loku lisiõsiõla vati, Soma wa tu popela povaka ovanyãli vetu. Wa tu popelavo povaka a va Filisiti. Cilo puãi wa tila vofeka omo wa kuatela Avisalome usumba.

¹⁰ Avisalome puãi, una tua wavekele ha lingi Soma yetu, wa fila vocilunga. Cilo wõhili nye? Nye ka vu sokoluila oku tiula osoma?

¹¹ Soma Daviti wa tuma kovitunda Sadoke la Aviatare hati, Vanguli lakulu va Yuda, hoti, Ene, nye vu sialela konyima oku tiula osoma kelombe liaye? Ondaka ya va Isareli vosi yeyale ku Soma.

¹² Ene wakuositue wange muẽle haene vutimba liange muẽle losonde yange. Oco hẽ, nye vu sialela konyima oku tiula vali osoma?

¹³ Popivo la Amasa, hoti, Ove hẽ kutimba liangeko kuenda kusonde yangeko? Suku a ci niuwile loku vandekako nda ove ku lingi kesongo liovita viange oku piñala komangu ya Yoava.

¹⁴ Oco wa pongoluisa ovitima via va Yuda vosi kuenje va kuata utima umosi, va tuima ku Soma vati, Tiuka, love lakuenje vove wosi.

¹⁵ Oco Soma wa tiuka kuenje weya ko Yordão. Va Yuda veya ko Giligali oku ñualehela la Soma loku u yokisa Yordão.

¹⁶ Simei, omõla a Gera u Benjamini, kimbo liavo ko Bahurimi, wa yayulako oku iya kumosi la va Yuda oku tokekela la Soma Daviti.

¹⁷ Wa kala lohulukãi yalume va Benjamini. Siva, ukuenje wovonjo ya Saulu, lomãla vaye valume ekui lavatãlo lakuenje vaye akui avali, vosi va lupukila ko Yordão ha va livanga okuti Soma iya noke.

¹⁸ Kuenje va pita vonjiva ha vopi vakuanjo ya Soma loku linga cosi Soma a sukila. Eci ka va yokele handi oco Simei, omõla a Gera, wa wila posi kovaso a Soma,

¹⁹ wa popia la Soma hati, Naho a Kuku, ku Ika mise eko. Ku ka ivaluke ndomo nda lingile civi eteke Soma a tunda ko Yerusalãi. A Kuku, ku ka ci kape vutima.

²⁰ Omo nda limbuka okuti nda lueyele. Oco ndeyilila etali okuti kepata liosi lia Yosefe ame tete ñualehela love, u cime cange.

²¹ Avisiai, omõla a Ceruya, wa pula hati, Simei hẽ ka fi omo a siñalele ombuavekua ya Yehova?

²² Daviti puãi hati, Ene, amãla va Ceruya, ndo lingi nye okuti etali wa lingi ovanyãli vange?? Vo Isareli etali nga mu pondiwa umue? Ame he, sia kulihile okuti etali nda linga Soma ya va Isareli?

²³ Oco Soma wa sapuila Simeyi hati, Ku fi. Kuenje Soma wa ci lisila.

²⁴ Mefivosiete, omõla a Saulu, weya oku ñualehela la Soma. Tunde keteke Soma a tunda toke keteke a tiuka vali lombembua, eye ka la liyuisa kolomãi, ka la lipemula, ndaño oku sukula uwalo waye.

²⁵ Eci a tunda ko Yerusalãi ha tokekela la Soma oco Soma wo pula hati, A Mefivosiete, nye kua endelele lame?

²⁶ Eye wa kumbulula hati, A Kuku, ukuenje wange wa ñembele, omo nda popele laye siti, Mbualisili ocimbulu oco mbuileko, ngende la Soma, momo ndicilema.

²⁷ Eye wa ndundila kokuove, a cime cange a Soma. Puãi kokuange, Soma wa linga ndungelo wa Suku. Oco va linge eci ca ku sunguluka.

²⁸ Momo vakuanjo ya tate vosi kovaso ove a Soma va kaile ndomanu va sesamela okufa. Puãi ame ndukuenje wove wa ñapa kumosi lava va lila komesa yove. Oco ame ñuete omoko ye yoku pinga vali ku Soma?

²⁹ Soma wa popia laye, hati, Ovina viove nye o vi sinumuila vali? Ame nda teta onimbu. Ove la Siva vu litepela ovisenge.

³⁰ Mefivosiete wa popia la Soma hati, Ya! eye a tambule ño cosi, omo ove a Soma, weya vali lombembua konjo yove.

³¹ Ceya okuti Barisilai u Gileada wa tunda ko Rogelimi. Wa sindikila Soma toke ko Yordão.

³² Barisilai wa kuka calua. Wa kala lakui ecelala kanyamo. Eye ohuasi kuenje wa tekowaile Soma osimbu Soma a kala ko Mahanayimi.

³³ Soma wa popia la Barisilai hati, Enju, tuende lame ko Yerusalãi kuenje hu tekola.

³⁴ Barisilai puãi wa kumbulula Soma hati, Alima añami a ñambela oku kala lomuenyo okuti ngenda la Soma ko Yerusalãi?

³⁵ Etali muẽle nda tẽlisa akui ecelala kalima. Oco nga sanjukila vali evi levi? Kokulia hẽ pamue kokunyua njevite nga nda ku pepa ale ka ku pepi? Nela oku yeva vali oku imba, ci kale alaka alume, ci kale alaka akãi? Oco hẽ, a Soma, nye mbokiyila vali kovikele viove?

³⁶ Kuenda nye o nyihila onima yinene ndoyo? A Kuku, hu sindikila ño toke ko Yordão.

³⁷ Oco niukila, fila vimbo lietu muẽle, muli eyambo lia tate la mai. Puãi ukuenje wove Kimihama yu. Eye a ende kumosi love. Ove u lingila cosi ca ku sunguluka.

³⁸ Soma wa kumbulula hati, Kimihama ngenda laye muẽle. Kuenje cosi cu yonguila utima wove oco ndu lingila. Kuenda vali, cosi ove muẽle wa sukila kokuange hu ci lingila.

³⁹ Oco omanu vosi va yoka Yordão. Soma puãi wa talama, wa liusika la Barisilai kuenje wo sipula. Barisilai yu wa tiukila konjo yaye.

⁴⁰ Oco Soma wa yoka, wa enda ko Giligali, Kimihama wa enda laye. Va Yuda vosi lonepa ya va Isareli va sindikila Soma kungende waye.

⁴¹ Oco alume vosi va Isareli veya ku Soma. Va popia la Soma vati, Vakuetu va Yuda hẽ, nye va tiuwila Soma? Nye va yokisila Yordão Soma lonjo yaye lalume vaye vosi?

⁴² Va Yuda va kumbulula va Isareli vati, Momo eye ositue letu. Ene, nye wa ci temeleli? Tua lia nga cimue ca peselisa Soma? Leye nga wa tuiha ombanjaile yimue?

⁴³ Va Isareli yu va kumbulula va Yuda vati, Apata etu a vumba Soma a tẽla ekui. Kuenda vali etu tuakulu koku citiwa, ene wamalehe. Oco wa tu tombeli nye? Siti etu, nda etu tete oku sokolola oku tiula Soma? Puãi eci ca popia va Yuda ca sanyanya enene, ca popia va Isareli ci sule.