II SAMUELE 18 - Embimbiliya - Bíblia Sagrada em Umbundu

¹ Daviti wongolola alume va kala laye. Wa va tepisa kovisoko viohũlũkãi ohũlũkãi kuenda viocita ocita. Wa vi nolela vakesongo.

² Oco Daviti wa va tuma. Wa va tepisa kovitundo vitatu. Ocitundo catete wa ci kapa peka lia Yoava, cavali peka lia Avisiai, omõla a Ceruya, manja a Yoava, catatu peka lia Itai u Giti. Noke Soma wa sapuila alume vaye, hati, Lamevo ngenda lene.

³ Puãi alume va popia vati, Ndati! ove kuendi. Momo nda etu tu tila ka ci va lingi cimue. Nda onepa yowiñi wetu yi fa ka ci va lingi cimue. Puãi ove, ove wa lisoka lekui liolohũlũkãi vietu. Oco ca velapo nda ove o siala vimbo loku tu tumaisa evi vi tu kuatisa.

⁴ Soma wa popia lavo hati, Cosi co sunguluki oco ndinga. Oco Soma wa talama vilu konele yombundi, kuenje ovitundo viocita ocita levi viohũlũkãi ohũlũkãi via pita kovaso aye.

⁵ Soma wa kundika Yoava la Avisiai kuenda Itai hati, Ñuatisiko. Kuateli ohenda ukuenje Avisalome. Kuenje omanu vosi va ci yeva eci Soma a sapuila vakesongo oku kuatela Avisalome ohenda.

⁶ Oco olohoka via tundila kusenge oku yaka la va Isareli. Ocilunga caco ca yakelua vesisi lia Efarimi.

⁷ Eteke liaco va Isareli va yuliwa lasualali va Daviti. Lekundu liaco lia linga linene. Akui avali kolohũlũkãi vialume va fa.

⁸ Locilunga ca lisanduila kuosi vofeka. Eteke liaco esisi lia lia valua, ava va fa losipata va sule.

⁹ Ca veta ño okuti Avisalome wa ñualehela lakuenje va Daviti. Avisalome wa endela komula. Omula ya pita vemehi liovianja viuti wo-carvalho. Utue waye wa saka vovianja kuenje eye wa nyoñama osimbu omula yaye ya pitahãla.

¹⁰ Ulume umue wa ci mõla kuenje wa sapuila Yoava, hati, Ota, nda mõla Avisalome wa nyoñama vuti.

¹¹ Yoava wa popia lulume wo sapuila, hati, Wo mola? Ocili? Nda oco, nye kuo tesowaile posi oko wo sanga? Nda nda sanjuka loku kuiha ekũi liolopalata kumue luvia.

¹² Ulume waco puãi wa kumbulula Yoava hati, Ndaño nda yevele peka liange okulema kuohũlũkãi yolopalata nda sia tavele oku oluĩla eka liange komõla a Soma. Omo tua ci yeva lovatui etu muẽle eci Soma a vu kundika, ove la Avisiai kuenda Itai, hati, Ñuatisiko. Kuateli ohenda ukuenje Avisalome.

¹³ Kuenda vali, nda ndo wipaile lusuanji nda lacimue ca yombekua ku Soma. Ndaño ove nda wa ñualelapo.

¹⁴ Yoava wa kumbulula hati, Si pesela vali love otembo. Oco wa kuata peka otunjelia tutatu kuenje wa tu toma vutima wa Avisalome osimbu Avisalome handi yu lomuenyo vuti.

¹⁵ Kuenje akuenje ekui vakuakuambata ovimaleho via Yoava va ñuala Avisalome kuenje vo veta loku wipaya.

¹⁶ Oco Yoava wa sika olumbeta kuenje asualali va tiuka koku lupuisa va Isareli. Omo Yoava wa va lemẽla.

¹⁷ Kuenje va yelula Avisalome, vo wimba vocitunu cinene vesisi. Vo lundika ondunda yinene yovawe. Kuenje va Isareli vosi va tila, omunu konjo yaye, omunu konjo yaye.

¹⁸ Eci a kala lomuenyo Avisalome wa lipetuilile ewe li kasi vocimbota cosoma. Momo hati, Si kuete omõla ulume oku ivaluisa onduko yange. Wa lukile ewe londuko yaye muẽle. Toke etali li tukuiwa onjivaluko ya Avisalome.

¹⁹ Ahimasi, omõla a Sadoke, wa popia hati, Ñasi loku enda oku ka sapuila Soma okuti Yehova wo popela peka liovanyali vaye.

²⁰ Yoava wo kumbulula hati, Ka ci tava. Etali kuendi oku sapula. Eteke likuavo ci tava oku enda loku sapula. Etali puãi ka ci tava oku sapula cimue omo omõla a Soma wa fa.

²¹ Yoava wa popia lu Kusi hati, Kuende, ka sapuile Soma eci wa mõla. U Kusi wa petama kovaso a Yoava, yu wa enda loku lupuka.

²² Ahimasi, omõla a Sadoke, wa popia vali la Yoava hati, Nda ci kala ndati, nda ci kala ndati, tava okuti lamevo ngenda, ndupukila u Kusi. Yoava hati, Amolange, o lupukila nye? Siti ka ku kala onima yondaka o sapula.

²³ Eye hati, Nda ha sanga nye nda nye ame ngenda muele. Oco Yoava wa popia laye hati, Kuende, lupuka! Oco Ahimasi wa lupukila vonjila yetapi kuenje wa pitahãla u Kusi.

²⁴ Daviti wa tumãla pokati kolombundi vivali. Ondavululi ya lamanela kolusoka luombundi ocipepi lokocimbaka. Eci a petula ovaso kuenje wa vanja oco wa mõla ulume umue oku lupuka lika waye.

²⁵ Ondavululi yu ya vilikiya ku Soma oku u sapuila. Soma wa popia hati, Nda o kasi lika waye ca lomboloka okuti iya londaka. Eye wa yayulako kuenje weya ocipepi.

²⁶ Ondavululi ya mõla ulume ukuavo oku lupuka. Ondavululi ya vilikiya kukuambundi hati, Ku kasi loku iya ukuavo, layevo lika waye. Soma hati, Layevo iya londaka.

²⁷ Ondavululi yiti, Nda soka siti, Okulupuka ku watete kua lisoka lokulupuka kua Ahimasi, omõla a Sadoke. Soma hati, Eye ulume wesunga, iya londaka yiwa.

²⁸ Ahimasi wa sapuila Soma hati, Ñasi loku iya lombembua. Oco wa petamela posi kovaso a Soma kuenje hati, Yehova Suku a pandiyiwe omo wa yula alume vana va katukila cime cange Soma.

²⁹ Oco Soma wa pula hati, Ukuenje Avisalome hẽ o kasi ciwa ale? Ahimase wa kumbulula hati, Eci Yoava a numa oco nda mõla ema linene. Puãi eci ca kalapo si ci.

³⁰ Oco Soma hati, pengapo. Talama apa. Oco wa pengapo, wa talama konẽle.

³¹ Otembo yaco u Kusi weya. U Kusi wa popia hati, A Kuku, ndeya londaka yiwa. Momo etali Yehova wa ku popela povaka ava va ku katukila.

³² Soma wa pula u Kusi hati, Ukuenje Avisalome he o kasi ciwa ale? U Kusi wa kumbulula hati, A Soma, ovanyãli vove la vosi va ku katukila ha va yaki love va lisoke lukuenje waco.

³³ Kuenje Soma wa tokotelua lesumuo. Wa enda kohondo ya kala kilu liombundi kuenje wa lila ca lua. Wa enda loku liyula hati, Amõlange Avisalome! Amõlange we! Amolange Avisalome! Nda nda file ame ove hu siala! A Avisalome! Amolange we! Amõlange!