II SAMUELE 17 - Embimbiliya - Bíblia Sagrada em Umbundu

¹ Ahitofele wa popia vali la Avisalome hati, Tava okuti nola ekui liolohũlũkãi vivali vialume. Oco uteke ulo muẽlẽ ñatukila Daviti loku u landula.

² Ndu wila muẽle osimbu a kava kuenda vutima mua tepuluka ongusu. Ndu lulumisa. Omanu vosi va kasi laye va tila. Soma lika ndu nyõla.

³ Lomanu vosi ndi va nena vali kokuove ndondombua yi tiuka ku veyaye. O sanda omuenyo womunu umosi lika kuenje omanu vosi va kala lombembua.

⁴ Alungulo aco a pepa kovatui a Avisalome lakulu vosi va va Isareli.

⁵ Noke Avisalome hati, Kovongivo Husiai u Ariki. Tu yevi eci eye o popia.

⁶ Eci Husiai eya ku Avisalome oco Avisalome wa popia laye hati, Ca popia Ahitofele ceci, hati, Tu linga ndeci eye a popia, ale? Nda hacoko, popia ove.

⁷ Oco Husiai wa popia la Avisalome, hati, Onjanja yilo elungulo Ahitofele a ku lungula lalio haliwako.

⁸ Husiai wa popiavo hati, Ove wa ci kũliha okuti so lalume vaye vakualohõlo. Cilo, vovitima viavo va tema ndongue ya nyehiwa omãla vayo vusenge. Kuenda vali, so wa lunguka enene kovita. Ka lala lomanu.

⁹ Ndaño cilo wa salama ale vocilala cimue pamue kumue kuiñi. Tuli vamue va fetika oku kupuka, wosi o ci yeva o ka popia hati, Omanu va kuama Avisalome va kunduka.

¹⁰ Oco, ndaño omunu onope, haeye o kasi lutima ndu wohosi, o sengeteta. Momo va Isareli vosi va kũlĩha okuti so onope. La vosi va kasi laye lavovo olonope.

¹¹ Ondaka yange puãi, yeyi, Va Isareli vosi, tunde ko Dani toke ko Bereseva, vongolokele kokuove. Kokulua va ka soka leseke liokalunga. Love wendavo kocilunga.

¹² Oco tuenda kokuaye kuosi a salama. Tu u wila ndeci owume u lokila posi. Kokuaye lalume va kasi laye ka ku supi umue, ndaño umosi.

¹³ Nda o tilila kimbo limue oco va Isareli vosi veya kimbo liaco lovikolo. Va li kokela

¹⁴ Oco Avisalome lalume vosi va kala laye vati, Ondaka ya Husiai u Ariki oyo ya velapo, ya Ahitofele yi sule. Omo Yehova wa panga oku nyõla ondaka yiwa ya Ahitofele ha muisa Avisalome eci cĩvi.

¹⁵ Husiai wa popia lovitunda Sadoke la Aviatare hati, Ahitofele wa lungula ndomo lalume va Isareli. Lame nda va lungula ndomo.

¹⁶ Oco, tuma lonjanga ku Daviti. Ko sapuile huti, Ku ka lale kolonjiva apa pa yokaila ava va tunda tunda kekalasoko. Yoka muẽle sanga Soma lomanu vosi va kasi laye va nyõleha.

¹⁷ Kaliye Yonatão la Ahimasi va talamela ve Enrogeli. Ufeko umue wa endaenda oku va sapowaila. Oco ovo va endaenda oku sapowaila Soma Daviti. Omo ka ca tavele okuti ovo va muiwa oku iñila vimbo.

¹⁸ Puãi ukuenje umue wa va mõla kuenje wa sapuila Avisalome. Oco kavali kavo va tunda lonjanga, veya konjo yulume umue ko Bahurimi. Kocitali caye kua kala ocisimo. Lovo va iñilamo.

¹⁹ Ukãi wa nyañula onuviko yaco, wa tuvika komela wocisimo. Noke wa nyãlehako olomema. Kuenje lacimue ca limbukiwa.

²⁰ Eci akuenje va Avisalome veya kukãi ukuanjo vo pula vati, Ahimasi la Yonatão va kasi pi? Ukãi wa va kumbulula hati, Cilo va yoka ale okalui. Eci va va vanjiliya kuenje ka va va sangele oco va tiukila ko Yerusalãi.

²¹ Pana okuti va enda oco alume va tunda noke kocisimo. Kuenje va enda, va ka sapuila Soma Daviti. Va popia la Daviti vati, Votoka. Kuende, ka yoke lombili, omo Ahitofele a tuma oku ku katukila.

²² Oco Daviti lalume vosi va kala laye va votoka. Va yoka Yordão. Koku ca ka kua siale ndaño umosi ka yokele Yordão.

²³ Eci Ahitofele a limbuka okuti ondaka yaye ka ya lingiwile oco wa walisa ocimbulu kuenje wa tiukila kimbo liavo. Wa sokiya cosi caye noke wa linyenga. Oco wa fa kuenje wa kendiwa veyambo lia soyaye.

²⁴ Oco Daviti weya ko Manahayimi. Avisalome wa yoka Yordão kumosi la va Isareli vosi.

²⁵ Avisalome wa piñainyele Amasa pomangu ya Yoava, yu kesongo wovita. Amasa eye omõla ulume umue, onduko yaye Itira, eye u Isameli. Eye Itira wa kuela Avigale, omõla a Nahase, manja a Ceruya, nyoho ya Yoava.

²⁶ Va Isareli la Avisalome va tunga ocilombo vofeka ya Gileada.

²⁷ Eci Daviti eya ko Manahayimi oco Siovi, omõla a Nahase u Raba, imbo lia va Amoni, la Makiri, omõla a Amiyele u Lodevare, kuenda Barisilai u Gileada u Rogelimi,

²⁸ va nena ku Daviti lalume vaye ovola lolombasiya, lalonga kuenda otiliku losevata losema kuenda olukango locipoke lohale,

²⁹ lowiki longundi lolomeme kuenda oheyo yolete yongombe, vati, Va kasi lonjala lenyona haivo va kava omo va kala osimbu vekalasoko.