II SAMUELE 16 - Embimbiliya - Bíblia Sagrada em Umbundu

¹ Eci Daviti a pitahãla naito onumbuko, oco Siva, ukuenje wa Mefivosiete, wa ñualẽhẽla laye. Wa enda lovimbulu vivali via wala oloselei haivio viambata ovita vivali violombolo locita covisiakata viayuva a kukuta kuenda ocita capako locipa covinyu.

² Oco Soma wa pula Siva hati, Evi hẽ nye wa vi nenela? Siva wa kumbulula hati, Ovimbulu vi linge via vakuanjo ya Soma oku endelako. Olombolo lapako ovio okulia kuakuenje vosoma. Ovinyu ovio okunyua kuava va fa ipepe vekalasoko.

³ Soma yu wa pula hati, Omõla a cime cove o kasi pi? Siva wa kumbulula Soma hati, Wa siala vo Yerusalãi omo hati, Etali va Isareli va nyiha vali uviali wa tate.

⁴ Oco Soma wa popia la Siva hati, Cosi ca kaile ca Mefivosiete cilo ca linga cove. Siva wa kumbulula hati, Tua pandula, a Kuku. Cosi ndinga ci ku sanjuise, a cime cange, a Soma.

⁵ Eci Soma Daviti a kala ocipepi loko Bahurimi kua tunda ulume umue ukuacikoti ca Saulu. Onduko yaye Simei, eye omõla a Gera. Wa enda loku siñala ño-o.

⁶ Kuenje wasasa ovawe Daviti lakuenje vosi va Soma Daviti, wasasavo omanu vosi lasualali vosi va kala kondio yaye kuenda kepĩli liaye.

⁷ Simei vokusiñala kuaye, wa popia hati Kuende! kuende! ove ulume wosonde haive ku silivila.

⁸ Suku wa ku fetuluinyila osonde yosi yepata lia Saulu lomo wa viala komangu yaye. Suku wa eca uviali waco peka liomõlove Avisalome. Cilo, okunyoleha kuove kueya omo ove ulume wosonde.

⁹ Oco Avisiai, omõla a Ceruya, wa popia la Soma hati, Ombua yaño ndeyi yi siñalela nye cime cange Soma? Vo nyihe, ndu tete utue,

¹⁰ Soma puãi wa kumbulula hati, Ndo lingi nye, ene amãla va Ceruya? Nda o kasi loku ndi siñala omo Suku wa popia laye hati, Siñala Daviti!— helie vali o pula hati, Nye wa ci lingila?

¹¹ Daviti wa popia la Avisiai lakuenje vaye vosi, hati, Omõlange muẽle o sanda oku njipaya, u Benjamini ulo nga ka ci piãla vali enene? A kale. A siñale, momo Yehova wo ci popia.

¹² Mbi, ciya okuti Yehova o vanja kohali yange kuenje o niuwila luwa esiñalo nda sanga etali.

¹³ Oco Daviti lalume vaye va enda ño vonjila yavo osimbu Simei wa enda vonjila ya kala komunda ya imba ovaso Daviti. Wa enda loku siñala, loku wasasa ovawe, loku imbaimba oneketela vilu.

¹⁴ Soma lomanu vosi va kala laye va pitila tupu ko Yordão va kava enene. Oko a puyukila.

¹⁵ Avisalome lomanu vosi va Isareli veya ko Yerusalãi, Ahitofele weya laye.

¹⁶ Eci Husiai, u Ariki, ekamba lia Daviti, weya ku Avisalome oco Husiai wa lama Avisalome hati, Soma a kale lomuenyo, Soma a kale lomuenyo.

¹⁷ Avisalome wa pula Husiai hati, U owo ukamba wocili o kuetele ekamba liove? Nye kua endelele lekamba liove?

¹⁸ Husiai wa kumbulula Avisalome hati, Hacoko. Una Yehova la va Isareli vosi va nola eye mbumba. Ñala laye.

¹⁹ Kuenda vali, mbumba elie? Siti omõlaye? Ndeci nda vumbale so haico ndi ku vumba ove.

²⁰ Oco Avisalome wa popia la Ahitofele hati, Lombolola ovisimilo viove. Tu linga nye?

²¹ Ahitofele yu wa popia la Avisalome hati, Kuende kakama va so, vana a sia tata onjo. Oco va Isareli vosi va yeva okuti wa nyehuiwa la so kuenje ovaka a vosi va kasi love va kolisua.

²² Oco va tamuluila Avisalome ombalaka kilu lionjo. Kuenje Avisalome wa endaenda kakama va soyaye kovaso a va Isareli vosi.

²³ Koloneke via alungulo a ecaeca Ahitofele a lisoka muẽle lalungulo a eciwa poku pula ku Suku. Oco alungulo osi a Ahitofele a sumbiwa ocili, a la Daviti, a sumbiwavo la Avisalome.