II SAMUELE 15 - Embimbiliya - Bíblia Sagrada em Umbundu

¹ Kovaso yaco Avisalome wa liangiliyila ekãlu lotuvalu kuenda akũi atãlo kalume oku kala kala laye.

² Avisalome wa pasoka ociteketeke kuenje wa talayama kepandavelo. Eci kua pita umue weya kosoma londaka oco Avisalome wo kovonga, wo pula hati, Kimbo lipi wa tunda? Leci eye a kumbulula hati, Nda tunda kepata liangandi lia va Isareli,

³ oco Avisalome wa popia laye hati, Tala, ondaka yove ya sunguluka, haiyo yocili. Puãi ka kuli umue wa noliwa la Soma oku ku yeva.

⁴ Avisalome wamisako vali, hati, Ya, ame nda nda kaile onganji vofeka, nda wosi weya kokuange londaka nda wa sanga esunga.

⁵ Olonjanja viosi eci umue weya kokuaye ho livondela oco wolõla eka, wo kuata kuenje wo sipula.

⁶ Oco Avisalome wa lingainga la va Isareli vosi veya ku Soma londaka. Kuenje Avisalome wa tamba ovitima via va Isareli.

⁷ Kovaso yalima akuãla Avisalome weya ku Soma hati, A Soma, ñasi loku enda ko Hevirone oku lemulula ocisila nda lisila la Suku.

⁸ Momo osimbu ame ndukuenje wove nda kala ko Gesiuri vo Arama oco nda lisilile ocisila siti, Nda Suku o niula ko Yerusalãi ame ndu vumba.

⁹ Soma wa popia laye hati, Kuende lombembua. Oco wa votoka, wa enda ko Hevirone.

¹⁰ Avisalome puãi wa tuma uyombeki olomunga kapata osi a va Isareli hati, Tuli vu yeva okusika kuolumbeta Popi hoti, Avisalome eye Soma vo Hevirone.

¹¹ Ovita vivali vialume va Yerusalãi va enda kumue la Avisalome. Va enda ño londundukua. Ka va kũlihile cimue.

¹² Osimbu Avisalome wa kala loku lumba ocilumba oco wa tumĩla Ahitofele u Gilo haeye ondunguli Va Daviti. Kimbo liavo ko Gilo. Longombo yaco ya kuata ongusu. Lomanu va kala konẽle ya Avisalome va livokiya.

¹³ Omunga yeya ku Daviti hati, Ovitima via va Isareli vosi via tekela ku Avisalome.

¹⁴ Oco Daviti wa popia lakuenje vosi va kala laye ko Yerusalãi hati, Votoki. Tu tili. Nda hacoko ka tu puluka ku Avisalome. Tu yayuliko sanga o tu sanga lombili kuenje o tu linga cĩvi loku kundula imbo losipata.

¹⁵ Akuenje va Soma va popia laye, vati, A Kuku, akuenje vove va ku taiyilili oku linga cosi ci popia cime cetu Soma.

¹⁶ Oco Soma wa tunda kumue locikumba caye cosi. Soma wa sia akama ekui oku tata elombe.

¹⁷ Oco Soma wa tunda kumosi lakuenje vaye vosi. Va talama konjo ya sulako,

¹⁸ kuenje olohoka viaye viosi vio pitila kovaso. Noke va Kereti vosi, la va Peleti vosi, kuenda va Giti vana ovita epandu vo kuama eci a tunda ko Gati, vosi va pita kovaso a Soma.

¹⁹ Oco Soma wa popia la Itai u Giti, hati, Ove wendela nye letu? Tiukila. Kala la Soma. Momo ove ukuafeka yiñi haive wa sia onjo yove.

²⁰ Ove hela eli weya. Oco etali yapa ku kisika ale oku tuñayala letu osimbu ame sia kũlihile oko ngenda? Tiukila. Lavakuẽle vosi va ende love. Kuenje Suku a ku linge ohenda, a ku muise ocisola caye ka ci pongoloka.

²¹ Itai puãi wa kumbulula Soma hati, Ndeci Yehova o kasi lomuenyo lomo cime cange Soma o kasi lomuenyo, kuosi ku kala cime cange Soma, ci kale kokufa, ci kale komuenyo, haiko ñalavo ame, ame ndukuenje wove.

²² Oco Daviti wa popia la Itai hati, Nda oco, pita, kuende ño. Oco Itai u Giti wa pita kumue lomanu vosi lomãla vosi va kala laye.

²³ Kuenje vakuafeka vosi va lila calua eci omanu vosi va pita. Soma wa yoka olui Kedrone kuenje wa talama. Oco omanu vosi va pita kovaso aye, va enda lonjila yenda kekalasoko.

²⁴ Sadoke la Aviatare va kala laye. Vambata ocikasia covisila via Suku. Va tula ocikasia ca Suku toke omanu vosi va pita oku tunda vimbo.

²⁵ Noke Soma wa popia la Sadoke hati, Tuala vali vimbo ocikasia ca Suku. Nda Suku wa sanjukila o niula vali, kuenje ndi ci mõla vali. Mõlavo vali ocitumãlo caye ci kola.

²⁶ Puãi nda Suku o linga hati, Sia ku sanjukilile, tala, amilo, a linge lame ndeci co sunguluka.

²⁷ Soma wa popia vali locitunda Sadoke hati, Ota! Tiukila kimbo lombembua, ove la Aviatare kumosi lomãla vene valume vavali, Ahimasa omõlove, la Yonatão, omõla a Aviatare.

²⁸ Lame nalamela kolonjiva apa pa yokaila ava va tunda vekalasoko toke ove o numisa ondaka yoku njimba onumbi.

²⁹ Oco Sadoke la Aviatare va tuala ocikasia ca Suku ko Yerusalãi. Haiko va kala.

³⁰ Daviti puãi wa lamana komunda ya Oliveira, wa enda loku lila, wa liula olohaku kuenda wa lisĩkilila kutue. Omanu vosi va kala laye lavovo va lisĩkĩlila kovitue. Va lamana loku lila.

³¹ Kuenje va sapuila Daviti vati, Ahitofele wa tiama kusuanji wa Avisalome. Daviti yu wa popia hati, A Yehova, ñasi loku likutilila kokuove. Evi vi kasi loku sokiya Ahitofele vi linge viesanda.

³² Eci Daviti a pitila konumbuko oko va fendalala Suku oco Husiai u Ariki, weya oku ñualehela laye. Ocikutu caye ca toka toka. Kutue wa lisieketa eve.

³³ Daviti wa popia laye hati, Nda wenda lame o nateka.

³⁴ Puãi nda o tiukila kimbo kuenje o sapuila Avisalome huti, A Soma, ndinga ukuenje wove, ndeci nda lingale ukuenje wa so haico cilo ndinga ukuenje wove;— nda oco o linga o ñuatisa oku nyõla evi vi kasi loku sokiya Ahitofele.

³⁵ Ovitunda Sadoke la Aviatare, siti vi kala love oko. Oco cosi o ka yeva vonjo ya Soma ci sapuila ovitunda Sadoke la Aviatare.

³⁶ Omãla vavo vavali valume haiko va kasi lavo, Ahimasa, omõla a Sadoke, kuenda Yonatão, omõla a Aviatare. Cosi ove o yeva, ovo muẽle veya, va ci sapuila ame.

³⁷ Oco Husiai, ekamba lia Daviti, weya ko Yerusalãi. Eci a pitila vimbo haico Avisalome leyevo eya.