II SAMUELE 14 - Embimbiliya - Bíblia Sagrada em Umbundu

¹ Noke Yoava, omõla a Ceruya, wa limbuka okuti vutima wa Soma mua kala ongeva la Avisalome.

² Oco Yoava wa tuma ko Tekoa, wa kopile ukãi ukualondunge. Wa popia laye hati, Liluvikiya ukuakulila. Wala uwalo woku lila. Ku ka lisiekete lulela puãi linga ndukãi o kasi loku lila osimbu u wa fa.

³ Oco kuende kosoma, popia laye ndomo. Oco Yoava wo sapuila olondaka a popia.

⁴ Eci ukãi u Tekoa weya ku Soma oco wa wila posi loku fendela, hati, A Soma, ñuatiseko.

⁵ Soma, yu wo pula, hati, Nye cu ku vala? Eye wa kumbulula hati, Ame ndicimbumba. Veyange wa fa.

⁶ Nda kala lomãla vavali valume. Va liyenjela vepia. Ka kua kaile umue oku va tepa pokati oco umue wa puma ukuavo kuenje wo wipaya.

⁷ Cilo epata liosi lia tema lame, liti, Tuihe una wa puma manjaye oco tu wipaye. Tu fetuluinya omuenyo wa manjaye una eye a ponda. Nda oco va linga nda va nyõlavo kapiñala kaco. Nda va linga ndomo, nda va ima ekala lia sulako okuti ku veyange palo posi ka pa siala vali onduko, kuenje epata li fa.

⁸ Soma yu wa sapuila ukãi hati, Kuende konjo yove. Hu sapuila noke ndomo ondaka yove yi sokiyiwa.

⁹ Ukãi u Tekoa wa popia la Soma hati, A cime cange, a Kuku, ongole yi lingepo yange lepata lia tate, Soma lomangu yaye va pue eko.

¹⁰ Soma wa kumbulula hati, Nda umue o popia love cimue u nena kokuange. Lalimue vali eteke a ku lamba.

¹¹ Oco ukãi hati, Soma a likutilile ku Yehova Suku okuti u o yongola oku fetuluinya osonde ka ipaya vali kuenje omõlange o popeliwa. Soma hati, Ndeci Suku o kasi lomuenyo, ndaño esinga limosi liomõlove ka li lokila posi.

¹² Oco ukãi wa popia hati, A Kuku, va njevelele oco mbangule kamue love, a Cime cange. Eye hati, Tuala.

¹³ Ukãi yu wa popia hati, Nye wa sokiyila oku lingisa ndomo omanu va Suku? Momo poku sokiya ndomo, Soma wa lipisa eye muẽle, omo ka kasi oku tiula vali omõlaye wa tundisua.

¹⁴ Etu vosi tu fa. Tu kasi ndovava a pesekela posi, oku a ongolola vali ka ci tava. Suku puãi ka nyoli omuenyo womunu, o sokiya cimue coku tiula umue wa tundisiwa.

¹⁵ Oco ndeyilila oku sapula, a Kuku, omo omanu va ndingisa usumba. Nda sokolola, kuenje nda sima siti, Mbangula la Soma sanga Soma o yeva kepingilo liange.

¹⁶ Momo Soma o njeva ha mopela peka liulume o sanda oku nepa ame kumue lomõlange kocipiñalo ca Suku.

¹⁷ Nda sima vali, siti, Ondaka ya cime cange Soma yi nulisa utima omo cime cange Soma, poku limbuka eci ciwa leci cĩvi, wa lisoka lungelo wa Suku. Yehova Suku yove a kale love.

¹⁸ Soma wa kumbulula ukãi hati, Ku ka ndimbike eci hu pula. Ukãi hati, A Kuku, va pule.

¹⁹ Soma yu wa pula hati, Vombangulo eyi hẽ Yoava wa lambamo ale? Ukãi wa kumbulula hati, A Kuku, ndomo o kasi lomuenyo, ondaka yimue ya popia Soma, oku yi yombolokela oko loko ka ci tava, Ukuenje wove Yoava eye muẽle wa mbetiya, eye muẽle wa ndongiliya olondaka evi viosi.

²⁰ Ukuenje wove Yoava wa ci lingila oku viaviaya elomboluilo liondaka yocili. Puãi olondunge via cime cange vioku kũlĩhisa ovina viosi vi kasi palo posi via lisoka lolondunge viungelo wa Suku.

²¹ Oco Soma wa popia la Yoava hati, Cilo ndi ci linga muẽle. Kuende, kope ukuenje Avisalome, enju laye.

²² Yoava wa wila posi, wa fendela, kuenje wa panduila Soma. Yoava wa popia hati, Etali, a cime cange Soma, ame ndukuenje wove nda kũliha okuti wa ndi sanjukila omo Soma wa tava kepingilo liukuenje wove.

²³ Oco Yoava wa katuka, wa enda ku Gesiuri oku tiula Avisalome, wo nena ko Yerusalãi.

²⁴ Soma hati, A likalele vonjo yaye muẽle. Ka keye kokuange. Oco Avisalome wa likalela vonjo yaye, ka mõlehele kovaso a Soma.

²⁵ Ca kala okuti vi Isareli yosi ka mua kaile ukuavo wa pandiyiwila unumbu nda Avisalome. Tunde kolomãi toke konumbutue letondelo ka kua kaile.

²⁶ Eci vo pemula kutue momo ulima kulima vo pemula, vo pemula eci a yeva okulema kuaco, oco wa pesalaisa ociñonya cokutue kombalãsa yosoma kuenje ca pesala okilu yimosi komeyu.

²⁷ Avisalome wa cita omãla valume vatatu lomõla ukãi umosi, onduko yaye Tamare. Eye wa kala ukãi wa posoka.

²⁸ Oco Avisalome wa kala vo Yerusalãi alima avali. Ka la mõleha kovaso a Soma.

²⁹ Eteke limue Avisalome wa tumĩla Yoava ho tumi ku Soma. Yoava puãi ka tavele oku iya. Wa tuma vali onjanja yavali lopo Yoava ka tavele oku iya.

³⁰ Oco Avisalome wa popia lakuenje vaye hati, Tala, epia Ha Yoava li lisungue lepia liange. Lia Yoava li kuete osevata. Kuendi ka yi timihi. Oco akuenje va Avisalome va yoka epia Ha Yoava.

³¹ Oco Yoava wa votoka, wa enda ku Avisalome vonjo yaye, wo pula hati, Akuenje vove va yokela nye epia liange?

³² Avisalome wa kumbulula Yoava, hati, Nda tuma kokuove siti, Eye, ndu tume ku Soma a ko pule, hati, Nye Avisalome a tundila ko Gesiuri? Ca velapo nda wa kaile ño oko. Oco tava okuti ngenda ku Soma. Nda ñasi longole eye a njipaye.

³³ Oco Yoava wa enda ku Soma kuenje wo sapuila Soma wa tumĩla Avisalome. Oco weya ku Soma, wa petamẽla posi kovaso a Soma. Soma wa sipula Avisalome.