II SAMUELE 13 - Embimbiliya - Bíblia Sagrada em Umbundu

¹ Avisalome, omõla a Daviti, wa kala la manjaye ukãi, onumbu. Onduko yaye Tamare. Ceya okuti Aminone, omõla a Daviti, wo sola.

² Aminone wa sakalala calua enene okuti co kokela oku vela omo a sola manjaye Tamare. Momo eye ufeko handi kuenje Aminone oku linga laye cimue ka ca tẽliwile.

³ Puãi Aminone wa kala lekamba limue, onduko yaye Yonadava, eye omõla a Simeya, manja a Daviti, haiye ukuenyango.

⁴ Eye wa pula Aminone hati, A Mõla a Soma, nye o suekela ño eteke keteke? Ku sapuilako? Aminone wo kumbulula hati, Sole Tamare, manja a manjange Avisalome.

⁵ Yonadava wa popia laye hati, Pekela pula, Likemba oku vela. Eci so eya oku ku nyula popia laye huti, Manjange Tamare eye, a neneleko okakulia, a ka pongiyile kovaso ange okuti ndi ka mõla loku ka lila peka liaye.

⁶ Oco Aminone wa pekela, wa likemba oku vela. Eci Soma eya oku u nyula oco Aminone wa popia la Soma hati, Ndinge ohenda, manjange Tamare eye, a tunge otumbolo tumue kovaso ange okuti ndila peka liaye.

⁷ Oco Daviti wa tuma konjo ku Tamare hati, Kuende konjo ya huvove Aminone. Ko seveleko okakulia.

⁸ Oco Tamare wa enda konjo ya huvaye Aminone. Wo sanga wa pekela. Eye wa nyañula onenga, wa yi kosa kovaso aye, wa tunga otumbolo, kuenje wa tu yoka.

⁹ Noke wa nyañula ociyo caco, wa ci sukumuila kovaso aye, Aminone puãi wa likala oku lia. Wa popia hati, Vosi va nunde. Oco vosi vo tunda.

¹⁰ Aminone yu wa popia la Tamare hati, Nena okulia vohondo oco ndile peka liove. Tamare wa nyañula olombolo a tunga kuenje wa vi nena kohondo ya huvaye Aminone.

¹¹ Eci o nenela eye wo kuata, wa popia laye hati, Enju, mekele love, a manjange.

¹² Eye wo kumbulula hati. Hacoko, a Kota. Ku ka ndingise. Va Isareli ka va lingainga ndomo. Ku ka linge uveke waco.

¹³ Ame, osõi yaco ha yi tuala pi? Love, pokati ka va Isareli o ka tukuiwa ocina caño. Oco cilo hu pinga, vangula la Soma. Eye ka likali oku ngeca kokuove.

¹⁴ Aminone puãi ka tavele kondaka yaye kuenje omo ongusu yaye ya lua, yukãi yi sule, oco wo kuata vongusu kuenje wa pekela laye.

¹⁵ Noke ceya okuti Aminone wo suvuka lesuvu lialua, okuti esuvu o suvuka lalio olio lialua, ocisola cina o solele laco ci sule. Aminone yu wa popia laye hati, Tunda. Kuende.

¹⁶ Tamare puãi wo kumbulula hati, Oco hacoko a huvange. Ekandu eli lioku nundisa olio lia velapo, likuavo wa ndinga li sule. Puãi ka tavele oku u yeva.

¹⁷ Wa kovonga ukuenje waye hati, Ukãi ulo a nunde. Eci a tunda yika epito.

¹⁸ Tamare wa wala onanga yamiongo omo oco ca wala wala olonasoma. Oco ukuenje wo tundisa kuenje wa yika epito.

¹⁹ Tamare wa lisieketa etiko kutue, wa tola tola onanga yaye yamiongo, wa likuata olukondo kuenje wa enda loku lila calua.

²⁰ Huvaye Avisalome wa popia laye hati, Huvove Aminone wa kala love ale? Liwekapo yapa, a manjange. Eye huvove. Eci ka ci ka ku vale. Oco Tamare wa kala ño vonjo ya huvaye Avisalome ndukãi wa nyolẽha.

²¹ Eci Soma Daviti a yeva ovina evi viosi wa tema ca lua.

²² Avisalome puãi ka popele cimue la Aminone, ndaño ciwa, ndaño civi, momo Avisalome wa suvuka Avinone omo a kuata vongusu manjaye Tamare.

²³ Kovaso yanyamo avali Avisalome wa kala la vakuakupemula olomeme ko Baalehasore, yi kasi ocipepi la Efarimi. Kuenje Avisalome wa laleka omãla valume vosi va Soma.

²⁴ Avisalome weya ku Soma hati, Tala, ukuenje wove o kuete vakuakupemula olomeme. Oco nda pinga okuti Soma lakuenje vaye va enda lame, ndukuenje wove.

²⁵ Soma puãi wa kumbulula Avisalome hati, Hacoko, amõlange. Ka tuendi vosi sanga cu ku sakalaisa enene. Wo peya puãi ka tavele oku enda. Noke wo sumuluisa.

²⁶ Oco Avisalome wa popia hati, Nda ku tuenda yapa la huvange Aminone. Soma yu wo pula hati, Endela nye love?

²⁷ Avisalome puãi wo pilika toke wa tava Aminone lomãla valume vosi vosoma va enda laye.

²⁸ Noke Aminone wa sanjuka luholua. Eci mopia lene siti, Ipayi Aminone, oco vu wipaya. Ko ka kuati usumba. Hameko hẽ ndo tumĩli? Kolisiko. Lingi olonõi.

²⁹ Oco, akuenje va Avisalome va linga la Aminone ndeci ca tumĩla Avisalome. Noke omãla valume vosi vosoma va katuka. Va wila, u komula yaye, u komula yaye. Kuenje va tila.

³⁰ Osimbu va kala vonjila Daviti wa yeva okuti Avisalome wa ipaya omãla valume vosi vosoma, ka pa supile ndaño umosi.

³¹ Oco Soma wa katuka, wa tola tola onanga yaye kuenje wa pekela posi. Akuenje vaye vosi va kala ocipepi lavovo va tola tola olonanga.

³² Puãi Yonadava, omõla a Simeya, manja a Daviti, wa popia hati, Cime cange ka ka sime okuti va ipaya omãla valume vosi vosoma. Aminone lika wa fa. Eci, Avisalome wa ci sokiya, tunde eteke Aminone a kuata vongusu manjaye Tamare.

³³ Oco cime cange Soma ka ka sumue vutima poku sima okuti omãla valume vosi vosoma va fa. Aminone lika wa fa.

³⁴ Avisalome puãi wa tila. Kuenje ukuakulava wa petula ovaso, wa vanja. Wa mõla omanu valua va kasi loku iyilila vonjila ya Horonayima konẽle yomunda.

³⁵ Yonadava wa popia la Soma hati, Tala, omãla valume va Soma veya. Ndeci ca popia ukuenje wove haico ca pita.

³⁶ Tuli a mala oku popia oco omãla valume vosoma veya. Va katula ekamba kuenje va lila. Soma layevo lakuenje vaye vosi va lila ca lua.

³⁷ Avisalome puãi wa tilila ku Talima, omõla a Amihuri, osoma ya Gesiure. Daviti wa lila lila omõlaye eteke keteke.

³⁸ Oco Avisalome wa tilila ko Gesiure, haiko wa kala anyamo atatu.

³⁹ Kuenje utima wa Soma Daviti wa livela oku enda ku Avisalome; omo cilo utima waye wa lembelekelua okufa kua Aminone.