II SAMUELE 12 - Embimbiliya - Bíblia Sagrada em Umbundu

¹ Yehova wa tuma Natana ku Daviti. Weya kokuaye. Wa popia laye hati, Vimbo limue mua kala alume vamue vavali, ukuavo ohuasi, ukuavo osuke.

² Ohuasi ya kala loviunda violomeme levi violongombe.

³ Osuke puãi ka yi kuete cimue te okamange kamue komeme a landa. Wa ka tekola, ka kala kala laye lomãla vaye. Ka lialia koka kulia kaye. Ka nyuanyua kokopo yaye. Wa kambayata ponete. Kokuaye ka linga ndomõlaye.

⁴ Konjo yohuasi kueya ukombe. Eye puãi ka yonguile oku upa kolomeme viaye muẽle pamue kolongombe viaye muẽle ha telekela ukombe weya kokuaye. Wa nyañula puãi okameme kosuke, wa ka telekela ukombe waye.

⁵ Daviti wa temẽla calua ohuasi yaco. Wa popia la Natana hati, Ndeci Suku o kasi lomuenyo, u wa linga ndomo o sesamela okufa.

⁶ Kuenje, omo eye a linga ndomo, ka kaile lohenda, oco ondolola lukuãla okameme kaco.

⁷ Natana wa sapuila Daviti hati, Ove muẽle ulume waco. Ca popia Yehova, Suku ya va Isareli, ceci, hati, Nda ku waveka hu lingi Soma ya va Isareli, haime nda ku popela peka lia Saulu.

⁸ Nda kuiha onjo ya cime cove. Nda kuihavo akãi va cime cove. Nda ku vialeka kepata lia va Isareli leli lia va Yuda. Eci nda ca kaile citito nda nda vokinyile vali eci ca lisoka laco.

⁹ Nye wa tombela ondaka ya Yehova hu lingi eci ca vĩha kovaso aye? Wa ipaya Uriya u Hiti losipata. Wa tambula ukãi waye ha lingi ukãi wove. Wo wipaya losipata ya va Amoni.

¹⁰ Oco osipata ka yi tundi vali vonjo yove, omo wa nomba ame, wa tambula ukãi wa Uriya u Hiti ha lingi ukãi wove.

¹¹ Ca popia Yehova ceci, hati, Vonjo yove muẽle hu katuila ovitangi. Akãi vove muẽle hu va nyeha kovaso ove, ndi va eca kukuẽle. Eye o pekela lakãi vove vutanya.

¹² Momo ove wa ci linga uyombeki. Ame puãi ndi ci linga vutanya kovaso a va Isareli vosi.

¹³ Daviti wa popia la Natana hati, Nda linga ekandu kovaso a Yehova. Oco Natana wa kumbulula Daviti hati, Yehova wa imũla ekandu liove, ku fi.

¹⁴ Haimo lumue, omo wa tomba Yehova lelinga liaco oco omõla o ku citiwila o fa.

¹⁵ Oco Natana wa tiukila konjo yaye. Kuenje Suku wa veta omõla una Daviti a cita lukãi wa Uriya kuenje wa vela calua.

¹⁶ Daviti wa likutililila ku Suku omõlaco. Daviti wa likandangiyavo okulia, wa iñila, wa pekela posi uteke wosi.

¹⁷ Akulu vonjo yaye va kala laye, va seteka oku u yelula posi. Eye puãi ka tavele, ndaño okulia ka lile lavo.

¹⁸ Eteke liepanduvali oco omõla wa fa. Akuenje va Daviti va kala lusumba woku u sapuila okuti omõla wa fa, vati, Osimbu omõla ka file handi tua popia laye. Eye puãi ka tu yevele. Cilo tu u sapuila ndati, tuti, Omõla wa fa? Mbi o liponda.

¹⁹ Daviti puãi eci a mõla okuti akuenje va liloñuila oco wa limbuka okuti omõla wa fa. Oco Daviti wa pula akuenje vaye hati, Omõla wa fa? Vati, Omõla wa enda.

²⁰ Daviti yu wa katuka posi, wa yua, wa lisieketa lulela, wa pongolola uwalo. Wa iñila vonjo ya Yehova kuenje wa fendela. Noke wa tiukila konjo yaye. Eci a pinga oco vo wiha okulia kuenje wa lia.

²¹ Akuenje vaye vo pula vati, Eci wa linga ca lomboloka ndati? Eci omõla a kala lomuenyo ove wa likandangiya okulia kuenda wa lila lila. Cilo omõla wa fa, ove wa pasuka, wa lia okulia.

²² Eye wa kumbulula hati, Osimbu omõla a kala lomuenyo nda likandangiya okulia loku lila lila siti, Helie wa ci kũliha nda hẽ Suku o ndinga ohenda okuti omõla o kala lomuenyo?

²³ Cilo puãi wa fa ale. Oco ndi likandangiyila nye okulia? Nẽla oku u pindula vali? Ame, ame ngenda kokuaye. Eye ka tiuka vali kokuange.

²⁴ Daviti wa lembeleka ukãi waye Batisieva. Wa enda kokuaye. Wa pekela laye. Eye wa cita omõla ulume. Onduko yaye vo luka Salomone. Kuenje Yehova wo sola,

²⁵ wa tuma ondaka lomela wuprofeto Natana, hati, U luka Yedediya, ca lomboloka, Wa soliwa la Suku.

²⁶ Yoava wa yaka la Raba, imbo lia va Amoni, kuenje wa kuata ombonge ya vindikiya apa va tapa tapa.

²⁷ Yoava yu wa tuma olomunga ku Daviti hati, Nda yaka la Raba, nda kuata ombonge ya vindikiya ovava.

²⁸ Kaliye, oco ongolola omanu va sialako. Ñuala imbo liaco, li kuata ove muẽle sanga ame ndi li kuata kuenje va li tukula londuko yange.

²⁹ Oco Daviti wongolola omanu vosi, wa enda ko Raba, wa liyaka lalio kuenje wa li kuata.

³⁰ Wopa ekolowa kutue wociñumañuma cosuku yavo Milikome. Okulema kualio kua soka lakuĩ atatu kolokilu. Vokati kalio mua kala ewe limue lia tĩla enene. Va kapa ekolowa liaco kutue wa Daviti. Vimbo liaco wopamo olohute vialua.

³¹ Wopavo omanu va kalamo. Wa va kapa kupange woku selala lowu wetemo londiaviti. Wa va kapavo oku talavaya kolofolono viatisolo. Oco a linga vovaimbo osi a va Amoni. Daviti lomanu vosi va tiukila ko Yerusalãi.