II SAMUELE 11 - Embimbiliya - Bíblia Sagrada em Umbundu

¹ Kotembo yokuca kuolombela, haiyo otembo olosoma vi endaenda kovita, oco Daviti wa tuma Yoava kumue lakuenje vaye la va Isareli vosi. Va kundula va Amoni kuenje imbo lia Raba va li ñuala ocingonja. Daviti puãi wa siala vo Yerusalãi.

² Ca pita okuti eteke limue kekumbi eci Daviti a pasuka pula waye kuenje wa kala loku ñuala ñuala kilu lionjo yosoma, oku vanja posi wa mõla umue ukãi o kasi loku yua. Ukãi waco wa posoka cimue.

³ Daviti yu wa tuma oku puliliya ukãi waco. Oco umue wo sapuila hati, Siti eye Batisieva, omõla a Eliama, ukãi wa Uriya, u Hiti?

⁴ Oco Daviti wa tuma olomunga oku wupa. Eye weya kokuaye kuenje Daviti wa pekela laye. Kotembo yaco Batisieva wa kala oku liyelisa omo a tunda kocituwa. Noke wa tiukila konjo yaye.

⁵ Ukãi yu we mina. Wa tuma oku sapuila Daviti hati, Ndumisi.

⁶ Daviti yu wa tuma ku Yoava hati, Numise Uriya u Hiti. Oco Yoava wa tuma Uriya ku Daviti.

⁷ Eci Uriya eya oco Daviti wo pula hati, Yoava hẽ, ci kasi loku pita ndati? Lomanu hẽ, va kasi ndati? Ovita hẽ, vi kasi loku enda ndati?

⁸ Daviti wa sapuila Uriya hati, Kuende konjo yove. Ka liyuise kolomãi. Oco Uriya wa tunda vonjo ya Soma kuenje ombanjaile ya tunda ku Soma yo kuama konyima.

⁹ Uriya puãi wa pekela kuvelo wonjo ya Soma kumue lakuenje va cime caye, kaile konjo yaye.

¹⁰ Eci va sapuila Daviti vati, Uriya ka endele konjo yaye, oco Daviti wa pula Uriya hati, Handopoko weya kungende? Nye kua endelele konjo yove?

¹¹ Uriya wa kumbulula Daviti hati, Ocikasia kuenda va Isareli la va Yuda va kasi volombalaka, lakuenje va cime cange va kasi ño posamua. Ame nga ngenda konjo yange oku lia loku nyua loku kala lukãi wange? Ndeci o kasi lomuenyo, lutima wove u kasi lomuenyo, ocina eci si ci lingi.

¹² Oco Daviti wa popia la Uriya hati, Usala kulo etali, hẽla hueca. Oco Uriya wa kala vo Yerusalãi eteke liaco, wosala vali eteke likuavo.

¹³ Kuenje Daviti wo laleka oco wa lia loku nyua kovaso aye. Wo koluisa. Uteke wa ka pekela pula kumosi lakuenje va cime caye. Ka endele konjo yaye.

¹⁴ Omele Daviti wa sonehela Yoava ukanda, wo tuma peka lia Uriya.

¹⁵ Vukanda wa soneha hati, Kapa Uriya vulala wokovaso, kuosi kuli okuyaka kua kãla. Noke tunda kokuaye okuti oco eye asiwe, a fe.

¹⁶ Osimbu Yoava a kala oku ñuala imbo ocingonja oco wa kapa Uriya oko wa kũliha okuti ku kala asualali va lunguka.

¹⁷ Oco alume vakuimbo va tunda oku yaka la Yoava. Pokati kava va fa pa kala akuenje vamue va Daviti. Uriya, u Hiti, layevo wa fa.

¹⁸ Oco Yoava wa tuma oku sapuila Daviti cosi ca pita vocilunga.

¹⁹ Wa sapuila omunga hati, Eci wa mala oku lomboluila Soma okuyaka kuosi,

²⁰ oco, nda Soma o tema, kuenje o ku Pula hati, Nye wa endeli ndomo ocituke limbo oku yaka? Ka wa kulihili okuti va laika oku londa kocimbaka ha vasi?

²¹ Helie wa ipaya Avimeleke, omõla a Yeruvesiete? Siti ukãi wa londa kocimbaka kuenje wo wasa ewe liombambo okuti wa fila vo Livesi. Wa endeli nye ocituke locimbaka? —oco ove kumbulula huti, Ukuenje wove Uriya u Hiti leyevo wa fa.

²² Oco omunga ya enda, yeya ku Daviti, yo sapuila cosi Yoava wo wusika.

²³ Omunga ya sapuila Daviti hati, Alume va si oku tu yula. Veya oku yaka letu vusenge. Etu puãi tua va tiuwiya loku va lupuisa toke va Pitila kepandavelo.

²⁴ Oco vakualohonji vamue va londa kocimbaka kuenje vasa akuenje vove. Vamue pokati kakuenje va Soma va fa. Ukuenje wove Uriya u Hiti wa favo.

²⁵ Daviti yu wa popia lomunga hati, Sapuila Yoava huti, Ka ci ka ku sakalaise omo osipata etali yi lia u, hẽla yi lia o. Kolisako oku yaka limbo. Li papupula. U kolisa muẽle.

²⁶ Eci ukãi wa Uriya wa yeva okuti veyaye Uriya wa fa oco wa lila calua veyaye.

²⁷ Eci okulila kuaco kua pita oco Daviti wa tuma oku wupa, wo nena konjo yaye. Eye wa linga ukãi waye, wo citila omõla ulume. Puãi eci ca linga Daviti ca sumuisa Yehova.