II SAMUELE 10 - Embimbiliya - Bíblia Sagrada em Umbundu

¹ Kovaso yaco osoma ya va Amoni ya fa kuenje omõlaye Hanuni wa piñala komangu yaye.

² Daviti wa popia hati, Ndinga ohenda Hanuni, omõla a Nahase, ndomo soyaye a ndingaile ame ohenda. Oco Daviti wa tuma akuenje vaye oku ko lembeleka omo soyaye a fa. Akuenje va Daviti veya kofeka ya va Amoni.

³ Puãi akulu va va Amoni va popia la cime cavo Hanuni vati, Ove nga wa soka okuti omo Daviti a tuma kokuove ava va ku lembeleka oco wa ci lingila esumbilo lia so? Daviti nga ka tumĩle akuenje vaye kokuove okuti va kũlihisa imbo lilo loku li lavulula loku li papulula?

⁴ Oco Hanuni wa kuata akuenje va Daviti, wa va pemuisa olonjele onele yimosi, kuenda wa tetela uwalo wavo vombuelo yatako, oco wa va katula.

⁵ Eci ca yevala ku Daviti oco wa tuma oku landula alume vaco omo va kala losõi yalua. Soma yu wa tuma hati, Sikili ko Yeriko toke olonjele viene via lepa oco wiyi noke.

⁶ Eci va Amoni va limbuka okuti va suvukiwa la Daviti oco va Amoni va tuma oku pinga loku fetela va Suria va Beterehovi kuenda va Suria va Sova. Oco kokuavo kua tunda akũi avali kolohũlũkãi viasualali vakuakuendela posi. Soma ya Maaka layevo wa tuma ohũlũkãi yasualali. Va Tovi va tuma ekũi liolohũlũkãi kolohũlũkãi vivali viasualali.

⁷ Eci Daviti a ci yeva oco wa tuma Yoava kumue lolohoka viasualali vakuasimbu haivo va lunguka.

⁸ Va Amoni va tunda, va lialeka kepandavelo. Va Suria va Sova lava va Rehovi kuenda va Tovi la va Maaka va likalela kusenge.

⁹ Eci Yoava a limbuka ocilunga ndomo ca kala okuti konyima yaye ovita, kovaso yaye ovita, oco wa nola vamue pokati kasualali va velapo va va Isareli kuenje wa va aleka ha va yaki la va Suria.

¹⁰ Asualali vaye va supapo wa va eca peka lia manjaye Avisiai. Ovo wa va aleka ha va yaki la va Amoni,

¹¹ hati, Nda ame va Suria si va tẽla oco ove wiya o ñuatisa ame. Puãi nda ove va Amoni ku va tẽla oco njiya hu kuatisa ove.

¹² Kolisako. Tu lingi ndalume oku kuatisa omanu vetu loku kuatisa ovaimbo a Suku yetu. Yehova a linge eci co sunguluka.

¹³ Oco Yoava lalume vaye veya ocipepi la va Suria ha va yaki lavo. Kuenje vo tila.

¹⁴ Eci va Amoni va mõla okuti va Suria va tila lavovo va tila kovaso a Avisiai, kuenje va iñila vimbo. Oco Yoava wa tiuka koku yaka la va Amoni, weya ko Yerusalãi.

¹⁵ Puãi eci va Suria va limbuka okuti va yuliwa la va Isareli oco va liongolola.

¹⁶ Hadadesere wa tuma oku upa va Suria va kala kesinya liolui Ferati. Veya ko Helama. Usongui wavo, Siovaka, kesongo liovita via Hadadesere.

¹⁷ Eci ca yevala ku Daviti oco eye wongolola va Isareli vosi. Wa yoka Yordão, weya ko Helama. Va Suria va lialekela Daviti, va yaka laye.

^18-19 Va Suria va tila kovaso a va Isareli. Daviti wa ipaya ovita epanduvali via va Suria, alume vakuakuendisa akãlu, kuenda akũi akuãla kolohulukãi via vakuakuendela kotuvalu. Wasavo Siovaka, kesongo liovita viavo, okuti haiko a fila. Eci olosoma viosi vina via vumba Hadadesere via limbuka okuti via yuliwa la va Isareli oco va linala la va Isareli kuenje va va vumba. Oco va Suria va kala lohele yoku kuatisa vali va Amoni.