II SAMUELE 1 - Embimbiliya - Bíblia Sagrada em Umbundu

¹ Kovaso yokufa kua Saulu, eci Daviti a tiuka koku kundula va Ameleke, oco Daviti wa tumala oloneke vivali vo Cikilage,

² Eteke liatatu oco kueya umue wa tunda kocilombo ca Saulu, uwalo waye wa toka toka, wa litila eve kutue. Eci eya ku Daviti wa wila posi, wa fendela.

³ Daviti yu wo pula hati, Wa tunda pi? Eye wo sapuila hati, Nda tila kocilombo ca va Isareli.

⁴ Daviti wo pula hati, Ca pita ndati? Sapuileko. Wo kumbulula hati, Omanu va tila kocilunga. Omanu valua va kupuka kuenje va fa. Saulu lomõlaye Yonatão lavovo va fa.

⁵ Oco Daviti wa popia lulume waco hati, Wa kũliha ndati okuti Saulu lomolaye Yonatão va fa?

⁶ Kuenje una wo sapuila, wa popia hati, Ca vetela ño okuti nda kala vomunda ya Giliboa kuenje Saulu yo, wa liyeka kosipata. Akũlu lavakuakuendela kotuvalu va kala ocipepi laye.

⁷ Leci a vanja konyima wa mõla kuenje wa mbilikiya. Ame nda kumbulula siti, Amilo.

⁸ Eye wa mula hati, Ove elie? Ndo kumbulula siti, Ame ndu Amaleke.

⁹ Wa popia lame hati, Enju ocipepi lame. Njipaye omo ongongo ya kãla ya nduila haimo ñasilili ño lomuenyo.

¹⁰ Oco ndeya ocipepi laye, kuenje ndo wipaya omo nda kuliha okuti tuli a kupuka ka kala vali lomuenyo. Nda nyañula ekolowa lia kala utue waye kuenda ocinunga ca kala kokuokuo kuenje nda vi nena ku cime cange.

¹¹ Daviti yu wa tola tola uwalo waye, haico ca linga alume vosi va kala laye.

¹² Kuenje va lila Saulu lomolaye Yonatão lomanu va Yehova kuenda epata lia Isareli, va lila loku tata loku likandangiya okulia toke oñolosi, oku lilila ava va fa losipata.

¹³ Daviti wa pula ulume wo sapuila hati, Wa tunda pi? Eye wa kumbulula hati, Ndimola ukualofeka umue u Amaleke.

¹⁴ Daviti wa popia laye hati, Ci kasi ndati okuti kua kaile lusumba woku olõla eka oku nyõla ombuavekua ya Yehova?

¹⁵ Oco Daviti wa kovonga umue palume vaye hati, Kuende, ko wipaye. Oco wo veta kuenja wa fa.

¹⁶ Daviti wa popia laye hati, Osonde yove ya peseka ya pesekela ongole yove muẽle omo omela wove muẽle wa ku imbila uvangi uti, Nda ipaya ombuavekua ya Yehova.

¹⁷ Daviti yu wa lia Saulu lomolaye Yonatão. Wa va lila loku va sovuila ocisungo ci tukuiwa Ocisungo cohonji.

¹⁸ Ocisungo caco ci kasi velivulu lia Yasare, kuenje Daviti wa tuma okuti ci longisiwa komanu va Yuda. Wa soneha hati,

¹⁹ Ulamba wove, a Isareli, wa fila volonumbuko. A mai we! Ava va pama va kupuka we!

²⁰ Ko ka ci sapule vo Gati. Ko ka ci yevalisi valuwa a Asikelone sanga omala vakãi va va Filisiti va yolela, sanga omala vakãi voviyamba volula lesanju.

²¹ Ene, alomunda via Giliboa, owume ka u keye kokuene, lombela ka yi ka loke kokuene, ndaño olono viene ka vi ka tumohe. Momo oko otevele yonoi ya vĩhĩsua, oyo otevele ya Saulu, haiyo ka ya wavekiwile lulela.

²² Kosonde yava va fa, ndaño kokuneta kuava va pama, ohonji ya Yonatão ka ya tiukileko, losipata ya Saulu ka yeyile upolokoso.

²³ Saulu la Yonatão! Va soliwa!! Va soliwa locili! Ndaño komuenyo, ndaño kokufa, ka va litepele. Kolupesi va velapo, olongonga vi sule. Kongusu va velapo, olohosi vi sule.

²⁴ Akãi va Isareli, lili Saulu. Wo walaisi ciwa evi vi kusuka. Wo yangoli lovingelengele viulu kuwalo wene.

²⁵ A mai we! Ava va pama va kupuka we! Va fila vocilinga we! Yonatão wa fila kolonumbuko viove.

²⁶ Ndi ku kuetele upongo, a manjange, a Yonatão. Ove wa kala lame ciwa ciwa. Ocisola cove lame ca piãlele enene. Ndaño ocisola cakãi ci sule.

²⁷ A mai we! Ava va pama va kupuka we! Ovimaleho viocilunga via taka we!