II PETULU 2 - Embimbiliya - Bíblia Sagrada em Umbundu

¹ Puãi, pokati komanu pa kaile ovaprofeto vesanda, ndeci pokati kene noke pa kala alongisi vesanda, ava va longisa uyombeki ovilongua vi nyõla omanu, haivo, omo va likala ndaño Ñala yavo, u wa va yovola, oco va likokela oku nyõleha ocipikipiki.

² Kuenda vali, va lua va ka kuama ovilinga viavo viupuepue, kuenje, mekonda liavo, onjila yocili yi sepuiwa.

³ Kuenje, locipululu cavo, vo lueyisi lolondaka viuhembi, oku vu lueyisila onganyu yavo. Tunde kosiahũlu episo liava lia va sokiyiwila, lokunyõleha kuavo ku va tãilili, ka kua pekelele.

⁴ Momo, nda Suku ka ecelele ovangelo va linga akandu, puãi wa va imba vonjembo, kuenje wa va kapa vovitunyu viowelema ha va talamela ekanga,—

⁵ nda ka ecelele oluali luale puãi wa popela umue Noha haeye Ndaka wa sapula esunga, kuenje wa popelavo vakuavo epanduvali eci a nena etande koluali luava va tomba Suku,—

⁶ nda ovaimbo a Sitomo la Gomora, poku a lingisa etiko, wa a pisa, okuti wa a tukuila oku nyõleha pe kuenje wa a lekisa ku vakuakutomba Suku ndongangu,—

⁷ kuenje nda wa popela ukuesunga Lote u wa sakalaisua enene lukahonga wa vakuevĩho;

⁸ momo ukuesunga waco Lote, eci a tunga lavo leci a mola loku yeva ovilinga viavo vĩvi, eteke keteke co vala kutima waye wesunga,—

⁹ nda Suku wa linga ovina evi viosi, wa kũlĩha oku popela vakuaku sumbila Suku eci va nyikiwa, kuenda oku selekela vakuakandu eyambulo toke keteke liekanga,

¹⁰ ca piãla vava va kuama kuama oloñeyi vietimba lumbondo, kuenje va sepula olombiali. Omanu ndovo vakuasiata haivo vakuacipango, kuenje, ndaño oku tomba ovangelo vakuolamba, kokuavo hacimueko.

¹¹ Osimbu ovangelo, ndaño va piãla kunene lokolohõlo, ka va va pisa lesepu kovaso a Ñala.

¹² Ovo puãi va lisoka ño lovinyama ka vi kuete olondunge, haivio via citiwila ño oku kuataiwa loku nyõlaiwa. Va tomba ovina ka va kũlĩhile, kuenje koku nyõla kuavo haiko va nyõlehela,

¹³ okuti akandu avo muẽle a va kokela ohali. Kokuavo, oku linga ukahonga utanya, esanju. Kolofesta viene va kasi ño ndatime latota. Va sanjukila ovina viosi va linyõla lavio.

¹⁴ Va kasi lovaso e yuka uponji kuenje ka va liweka kakandu. Va tamba omanu ka va pamele. Ovitima viavo va vi ikisa ocipululu. Va kasi muẽle omãla va siñaliwa.

¹⁵ Va sia onjila ya suñama, kuenje va tuñayala. Va kuama onjila ya Balama, omõla a Beore, una wa sola onima ya tunda kevĩho.

¹⁶ Eye puãi wa lemeliwila okulueya kuaye. Ocimbulu cimue ka ci popia popia ca popia ndondaka yomunu kuenje ca tateka uyui wuprofeto.

¹⁷ Ovo olono ka vi kuete ovava, haivo ombundu ya pungiwa lekungukungu. Owelema wonjembo wa va sokiyiwila.

¹⁸ Momo, oku lipanda lolondaka violonambelo, va yonja lovipango vietimba lumbondo ava ndopo va litepa la vakuakandu.

¹⁹ Va va likuminya umãmãle osimbu ovo muẽle apika vevĩho. Momo cosi ci yula omunu oco omunu a ci lingila upika.

²⁰ Momo eci va puluka ale kevĩho lioluali omo va kasi lukũlĩhiso wonjovoli yetu Ñala Yesu Kristu, nda va tangiwa vali lalio kuenje va yuliwa, esulilo liavo li vĩha enene, cina va kaile tete hise.

²¹ Momo ovo, hise nda ka va kũlĩhile onjila yesunga, oku konyoha ocihandeleko ci kola ca eciwa kokuavo, haico va ci kũlĩha ale, oco cĩvi enene.

²² Ca pita lavo ndolusapo luocili okuti, Mbua o tiukila kosanjo yaye. Ngulu wa lisukula kuenje o tiukila kocilivombelo.