II PETULU 1 - Embimbiliya - Bíblia Sagrada em Umbundu

¹ Ame ndi Simono Petulu ndukuenje wa Yesu Kristu, haime ndupostolo waye, Ndi sonehela ava va tambula ekolelo li kola lia lisoka lekolelo lietu vesunga lia Suku yetu lupopeli wetu Yesu Kristu.

² Ocali ci love kokuene kuenda ombembua osimbu wamiko oku kũlĩha Suku la Yesu Ñala yetu.

³ Unene u kola wa Suku wa tu iha ovina viosi vi tiamela komuenyo lesumbilo lioku sumbila Suku. Momo Suku wa panga okuti tu kũlĩha Kristu u wa tu kovongela kulamba waye lesunga.

⁴ Omo tua kũlĩha Kristu, oco Suku wa tu iha olohuminyo viaye via piãla haivio vi komohisa. Wa ci linga okuti, omo vu kasi lolohuminyo viaye, oco vu puluka kevĩho li kasi voluali mekonda lioloñeyi, kuenje vu tuwa nda Suku.

⁵ Oco, kolisiko lutima wosi, okuti kekolelo liene vu vokiyako esunga, kesunga vu vokiyako ukũlĩhiso,

⁶ kukũlĩhiso esuluviko, kesuluviko epandi, kepandi esumbilo lioku sumbila Suku.

⁷ Kesumbilo lioku sumbila Suku vokinyi ocisola coku sola vamanji, kocisola coku sola vamanji vokinyiko ocisola.

⁸ Momo, nda vu kuata ocili oviali evi kuenje vi lova kokuene, ca lomboloka okuti ukũlĩhiso woku kũlĩha Ñala yetu Yesu Kristu vu kasi lawo, ka vu kasi lawo lowesi pamue ndava ka va imi apako.

⁹ Wosi wa kamba oviali evi omeke, o lete ño eci ci kasi ocipepi, kuenje wa ivalako okuti wa yelisua kakandu aye osimbu.

¹⁰ Oco a vamanji, kolisiko oku sevetisa cocili okukovongiwa kuene lokunoliwa kuene, momo, nda vu ci linga, lalimue eteke vu kupuka.

¹¹ Oco noke, ku vu sokiyiwila uvelo unene wokuti wiñili vusoma ka u pui wa Ñala yetu Yesu Kristu haeye Upopeli wetu.

¹² Oco ñuete utima woku vu wivaluaisa ovina evi ndaño wa vi kũlĩhi ale kuenje wa sevetilui ale vocili vu kasi laco.

¹³ Nda soka siti, Ca sungulukila okuti, osimbu ñasi vosinge yetimba, ndu vetiyi loku vu vi ivaluisa.

¹⁴ Momo nda kũlĩha okuti okutunda kuange vosinge ku kasi ocipepi, ndeci Ñala yetu Yesu Kristu a ndekisa.

¹⁵ Kuenje ndi sokiya okuti, kovaso yokufa kuange, vu tẽla oku ivaluka ovina evi olonjanja viosi.

¹⁶ Momo, eci tuo sapuili unene wa Ñala yetu Yesu Kristu letukuluko liaye, ka tua kuamele olosapo via sovuiwa ño lovoloño esanda, puãi tua kala muẽle olombangi via mola lovaso uwale waye.

¹⁷ Momo, eci eye a tambula esivayo lulamba ku Suku Isiaye, leci ondaka ya tunda kulamba wa piãla yeya kokuaye kuenje ya popia yiti, U Omõlange wa soliwa, haeye ndo sanjukila,—

¹⁸ etu muẽle tua yeva ondaka yaco ya tunda kilu, momo tua kala laye komunda yi kola.

¹⁹ Ondaka yovaprofeto ya kolisua vali kokuetu londaka ya yevala komunda. Ciwa nda vu limbuka owanji waco wovaprofeto okuti wa linga ocinyi ci tuila owelema toke ku ca kuenje nanda o tuila vovitima viene.

²⁰ Tete puãi limbuki eci cokuti, la-umue owanji wovaprofeto u kasi vovisonehua wa eciwa lelomboluilo liomunu,

²¹ momo la-umue owanji wovaprofeto weya locipango comunu, puãi omanu va kola va vetiyiwa le Espiritu Sandu va popia ondaka ya tunda ku Suku.