II OLOSOMA 3 - Embimbiliya - Bíblia Sagrada em Umbundu

¹ Yehorama omõla a Ahava wa fetika oku viala kIsareli, ko Samaria, kunyamo wekui lecẽlãla wa Yehosafata, Soma ya Yuda, kuenje wa viala anyamo ekui la avali.

² Wa lingainga eci cĩvi kovaso a Yehova, puãi ndeci ca isiaye la inaye, hacoko. Momo wa leñula ociñumañuma ca Baale cina ca tungile isiaye.

³ Haimo lumue wa kakatela akandu a Yerevoama, omõla a Nevata, ana a linga loku kokela Isareli oku lueya. Ka litepele lao.

⁴ Mesia, Soma ya Moavi, ukuakufuka olomeme, wa lambuila Soma ya Isareli ocita colohũlũkãi viotumeme locita colohũlũkãi viovitupi violomeme kumue lovonya avio.

⁵ Puãi eci Ahava a fa, Soma ya Moavi wa ñualelapo Soma ya Isareli.

⁶ Oco koloneke viaco, Soma Yehorama wa tunda ko Samaria, yu wa tenda Isareli yosi.

⁷ Wa katuka, yu wa tuma ku Yehosafata Soma ya Yuda, hati, Soma ya Moavi wa ñualelapo. Ove hẽ ku yongola oku enda lame ha tu liyaki la Moavi? Eye hati, Ngenda, ame haime ño ove, omanu vange omanu vove, lotuvalu tuange otuvalu tuove.

⁸ Kuenda vali hati, Tuenda lonjila yi pi? Yehorama wo kumbulula hati, Tu pita onjila yo vekalasoko li Edome.

⁹ Oco Soma ya Isareli wa enda kumue la Soma ya Yuda kuenda Soma yEdome. Va pita ohondo, kuenje va enda oloneke epanduvali. Olohoka ka via kaile lovava, ndaño ovinyama vina via va kuama.

¹⁰ Soma ya Isareli hati, A mai we! Yehova wa kongela pamosi olosoma evi vitatu ha vi eci peka lia Moavi!

¹¹ Puãi Yehosafata hati, Kulo ka kuli hẽ uprofeto umue wa Yehova, ha tu pulilako ku Yehova? Oco umue povakuenje va Soma ya Isareli wa kumbulula hati, Elisia omõla a Siafata o kasi kulo, una wa itilaile ovava povaka a Eliya.

¹² Yehosafata hati, Ondaka ya Yehova yi kasi laye. Oco Soma ya Isareli la Yehosafata kuenda Soma yEdome va lokila kokuaye.

¹³ Elisia wa popia la Soma ya Isareli hati, Ndi likuetele nye love? Kuende kovaprofeto va so lokovaprofeto va nyoho. Soma ya Isareli wa popia laye hati, Hacoko, momo Yehova wa kongela pamosi olosoma evi vitatu ha vi eci peka lia Moavi.

¹⁴ Elisia hati, La Yehova ukualohoka o kasi lomuenyo, haeye ndukuakuvumba, ocili, nda sia kuatelele Yehosafata Soma ya Yuda ocisõi, nda sia ku vanjele ale, ndaño oku ku mõla.

¹⁵ Puãi cilo, neneli usiki. Momo olonjanja viosi eci usiki a sika, oco unene wa Yehova wa wila Elisia.

¹⁶ Wa popia hati, Ca popia Yehova ceci, hati, Yukisi ocimbota cilo laluvila.

¹⁷ Momo ca popia Yehova ceci, hati, Ka vu moli ofela, ndaño ombela, haimo ocimbota cilo ci yuka to lovava, ho nyuiko, ene lolongombe viene lovinyama viene.

¹⁸ Ocina eci ca leluka ku Yehova. Leye ecavo va Moavi peka liene.

¹⁹ Kuenje vu kundula ovaimbo osi ovimbaka, lovaimbo osi a posoka; oviti viosi viwa vu vi timbula; ovisimo viosi viovava vu vi lembika; ovapia osi awa vu a nyola lovawe.

²⁰ Hela liaco omele, kowola yoku lumba ocilumba cokomele, oco tala, konele yo kEdome kua tundilila ovava, kuenje ofeka ye yuka to lovava.

²¹ Eci va Moavi vosi va yeva okuti olosoma via tundila oku liyaka lavo, oco ava vosi veya voku ambata ovimaleho, tunde kamalehe toke kakulu, vosi vongoluilua pamosi, yu va kala vongave.

²² Omele ociteketeke va pasuka, kuenje eci olosongo viekumbi via tuila vovava, va Moavi va mõla ovava kovaso avo, a kusuka nge ndosonde.

²³ Kuenje va popia vati, Oyo osonde, olosoma via liyaka pokati, yu via liponda. Oco kaliye, a Moavi, katuka oku punda!

²⁴ Eci veya kocilombo ca Isareli, va Isareli va katuka, ya va kundula va Moavi, oco va tila kovaso avo. Vamako loku kundula va Moavi, toke vofeka yavo.

²⁵ Va lundula ovaimbo; vovapia osi awa omunu omunu wa imbamo ewe liaye, yu va a yukisa to; ovisimo viosi viovava va vi lembika; kuenda va timbula oviti viosi viwa; toke va supisapo lika Kiri Hareseti lovawe alio. Puãi vakuapipili va li ñuala, yu va li asa.

²⁶ Eci Soma ya Moavi a mõla okuti ocilunga co tokotela enene, wa katuka kumue lovita epanduvali vialume vakualosipata, ha va tuiyila toke apa pa kala Soma yEdome. Puãi ka va ci tẽlele.

²⁷ Oco wa kuata omolaye uveli, una wa sesamelele oku piñala komangu yaye, kuenje wo lumba ocilumba coku pia elisi kilu liocimbaka. Onyeño yalua ya wengukila Isareli, kuenje va siapo Soma ya Moavi yu va tiukila kofeka yavo.